Read Paite Chin 2 KUMPIPATE 16 Bible Online

2 KUMPIPATE 16 - Paite Chin bible

2 KUMPIPATE 16

¹Remaliah tapa Pekah kum sawmlehsagih a lal kum in Judah Kumpipa Jotham tapa Ahaz a lal pan hi.

²Ahaz a lal pattung in kum sawmnih a upa ahi a; Jerusalem ah kum sawmlehguk a lal hi. A pu David bang in TOUPA a Pathian mitmuh in thil hoih a hih sam kei hi.

³Israel kumpipate tot lampi a tawnsam a, ahi, TOUPA’N Israel suante ma a a delhkhiaksa namte thil kihhuaitak a hih bang un a tapa mei ah a lutsuak sak hi.

⁴Munsangte leh tangte tung ah leh sing hing chih nuai ah kithoih in gimlim a hal hi.

⁵Huchi in Suria kumpipa Rezin leh Israel kumpipa Remaliah tapa Pekah Jerusalem dou din a kuantou ua; Ahaz ava um ua, himahleh a zou theikei uhi.

⁶Huailai in Suria kumpipa Rezin in Elath khua Suria gam din a lanawn a, Judahte Elath khua apan a delhkhia a; huchi in Suriate’n Elath khua a va luah ua, tunitan in a tenglai uh.

⁷Huchi in Ahaz in Assuria kumpipa Tiglath-pileser kiang ah, Na sikha leh na tapa ka hi ka hia; kei hong dou dia hong kuan, Suria kumpipa khut apan leh Israel kumpipa khut apan hon hunkhe dihve, chi in mi a sawl hi.

⁸Ahaziah in TOUPA inn a dangka leh dangkaeng om peuhmah leh kumpipa in a gou koihkhawmte a la a, Assuria kumpipa kiang ah thilpiak din a khak hi.

⁹Assuria kumpipa’n a thugen a na pom a; huchi in Assuria kumpipa’n Damaska khua a vadou a, a la a, a mite Kir gam ah sal in a pi a, Rezin a that hi.

¹⁰Kumpipa Ahaz bel Assuria kumpipa Tiglath-pileser houpih din Damaska khua ah a hoh a, Damaska khua a maitam a va mu a huchi in kumpipa Ahaz in huai maitam lim leh a kibawl dan banggeih etton din siampu Urijah kiang ah a khak hi.

¹¹Siampu Urijah in maitam a bawl a; kumpipa Ahaziah in Damaska khua apan a khak banggeih in siampu Urijah in Damaska khua apan a Ahaz a hongpai nawn in a na bawl khinvekta hi.

¹²Damaska khua apan kumpipa a hongtun in maitam a mu a; kumpipa’n maitam a naih a, a tung ah thillatte a lan hi.

¹³Maitam ah a haltum thillat hal in tangbuang thillat a lan a, dawn thillat asung a, a lemna thillatte sisan a theh hi.

¹⁴TOUPA ma a dal maitam a la a, maitam leh TOUPA inn kikal a, inn mazawn apan a lasuan a, a maitam mallam pang ah a koih hi.

¹⁵Kumpipa Ahaz in, maitam lianpi tung ah zinglam haltum thillat, nitaklam tangbuang thillat, haltum thillat, tangbuang thillat, i gam ua mipi tengteng haltum thillat, tangbuang thillat leh dawn thillat toh hal in lan inla; a tung ah haltum thillat sisan tengteng leh kithoihna sisan tengteng theh in; dal maitam bel kei thudotna ding ahi, chi in siampu Urijah thu a pia hi.

¹⁶Huchi in siampu Urijah in kumpipa Ahaz thupiak bangbang in a hihta hi.

¹⁷Kumpipa Ahaz in tunna kuakte a atkhia a, kisilna bel a koih khia a; a tunna dal bawngtal apan lakhia in suanglep tung ah a tung hi.

¹⁸Sabbath adia a tungnei lampi in a bawl uleh in pawlam a kumpipa lutna TOUPA inn apan Suria kumpipa adin a kheng hi.

¹⁹Huchi in Ahaz thilhih tanchin dangte Judah kumpipate lal lai thugelhna bu ah a tuang kei maw?

²⁰Huchi in Ahaz a pi leh pute kiang ah a ihmuta a, a pi leh pute lak ah David khopi ah a vui ua; a tapa Hezekiah a sik in a lalta hi.