Read Paite Chin 2 KUMPIPATE 17 Bible Online

2 KUMPIPATE 17 - Paite Chin bible

2 KUMPIPATE 17

¹Judah Kumpipa Ahaz kum sawmlehnih a lal kum in Elah tapa Hosea Israelte tung ah Samaria ah a lal pan a, kum kua sung a lal hi.

²TOUPA mitmuh in thil hoihlou tak a hih a, himahleh a ma a Israel kumpipate bangzen in zaw ahihkei hi.

³Assuria kumpipa Salmaneser in a vadou a, huchi in Hosea a sikha a honghi a, siah a pia hi.

⁴Assuria kumpipa’n Hosea Aigupta kumpipa So kiang a mi sawl in a guksawm chih a na theikhia a; a kum chin a, a piak zel bang in leng Assuria kumpipa kiang ah siah a pekei behlap lai a; huaiziak in Assuria kumpipa’n suangkulh ah hensa in a khumta hi.

⁵Huchi in Assuria kumpipa’n gam tengteng a tuan suakvek a, Samaria ah a hohtou a, kum thum a umkhum hi.

⁶Hosea kum kua a lal kum in Assuria kumpipa’n Samaria a la a, Israelte Assuria gam ah a pi a, Halah, Habor a Gozan lui leh Mediate khuate ah a koih hi.

⁷Huchibang a, a na omna uh bel Israel suante’n Aigupta kumpipa Pharo khut nuai apan, Aigupta gam apan a pikhepa TOUPA a Pathian uh tung a thil a hihkhelh ua, pathian dangte a lau ziak uh ahi.

⁸TOUPA’N Israel suante ma a, a na delhkhiaksa namte thuzoh leh Israel kumpipate thusehte a zuihzawk ziak uh leng ahi.

⁹Israel suante’n TOUPA a Pathian uh tung ah thil hoihlou tak a guk in a hih uh. A khaw teng uah galvilmite insang apan kulhnei khote pha in munsangte a bawl uhi.

¹⁰Tang sangteng ah pathian limte leh sing hing teng nuai ah suangphuhte phut in Aserah songte a bawl uhi.

¹¹Huai munsang tengteng ah TOUPA’N a ma ua a delhmangsa namte hihbang in gimlim a hal ua; TOUPA hehsak din thil gilou a hihlai uhi.

¹²TOUPA’N a kiang uah, “Hichibang hihkei un” a chih milim pathiante na leng a sem uh.

¹³TOUPA’N, Dan zuih ding na pi leh pute uh ka piak leh ka sikha zawlneite zang a k’on theihsak bangzel in, “Na omdan gilou uh lehngatsan unla, ka thupiakte leh ka thusehte zui un” chi’n Israelte leh Judah zawlnei chih leh muthei michih zang in a theisak hi.

¹⁴Huchi pipi in leng a zui nuam kei ua, a pi leh pute un TOUPA a Pathian uh gingta nuamlou a, a ngawng uh a khauhsak mah bang un, a ngawng uh a khauhsak uhi.

¹⁵A thusehte, a pi leh pute uh toh a thukhun, a kiang ua a thu theihsakte a nial ua; thil ginalou a zui ua, bangmah louphet a hong hita uh. A tungthu ua TOUPA’N, amau bang in zaw hihkei un, a na chihsa, a kiang ua namte a zui uhi.

¹⁶TOUPA a Pathian uh thupiak tengteng a lehngatsan ua, bawngnou limsun nih a bawl ua, Aserah song a bawl ua, van a om tengteng a bia ua, Baal na a sem uhi.

¹⁷A tapate uh leh a tanute uh mei tawn in a lutsak ua, aisan leh bum a ching ua, TOUPA hehna tokthou din a mitmuh in thil hoihlou hih din a kizuak uhi.

¹⁸Huaiziak in, TOUPA Israelte tung ah heh petmah in a heh a, a muh phaklouhna ding ah a suanmang a; Judah nam kia loungal a omta kei uhi.

¹⁹Judahte’n leng TOUPA a Pathian uh thupiakte a zuikei ua, Israelte bawltawm thusehte a zui zawta uhi.

²⁰Israel suante himhim a deihta kei a, amau a hihgenthei a, a muh phaklouh ua a suanmang masiah lokmite khut ah a pia hi.

²¹Israelte lah David inkawte a hihna uh a paihsakta ngal a; huchi in Nebat tapa Jeroboam pen kumpipa din a bawl ua; Jeroboam in Israelte’n TOUPA a zuih uh a hawlkawi a, thil gilou thupi mahmah a hihsak hi.

²²Israel suante’n Jeroboam thil hihkhelh bangbang a hihsam ua;

²³TOUPA’N a zawlnei tengteng zang a a na gensa bang a a muh phaklouhna a, a suanmang masiah huaite a paisan ngalkei ua. Huchi in Israelte amau gam apan Assuria gam ah a pi ua, tunitan in huai gam ah omlai uhi.

²⁴Assuria kumpipa’n Babulon khomite, Kuth khomite, Ava khomite, Hamath khomite leh Sepharvaim khomite a thukhak khia a, Samaria khote ah Israel suante mun a luahsak a; huchi in Samaria gam a luah ua, a khuate ah a teng uhi.

²⁵Huailai a a om tung un hichi ahi a, Toupa laudan a siamkei ua, huchi in Toupa’n a lak uah humpinelkaite a sawl a, khenkhatte a keilum uhi.

²⁶Huchi in Assuria kumpipa kiang ah, “Na lakkhiaka, Samaria gam khuate a na koih namte’n hiai gam Pathian omdan a theikei ua, huaiziak in, a lak uah humpinelkaite a sawl a; ngai dih, hiai gam Pathian omdan a theihlouh ziak un a that uh” a chi uhi.

²⁷Huchi in Assuria kumpipa’n, “Huai a sal a na pite uh lak a siampu khat pi unla, hong omsam henla, huai gam Pathian biak dan sinsak hen” chi’n thu a pia hi.

²⁸Huchi in Samaria gam apan a pite uh lak a siampu khat Bethel khua ah a va teng a, TOUPA lauh ding dan a sinsak hi.

²⁹Himahleh namchih in amau pathian chiat a kibawl ua, Samari mite’n munsang a na bawl innte ah namchih in amau omna khua chiat ah huai a pathiante chiat uh a koih uhi.

³⁰Babulon mite’n Sukkoth benoth a bawl ua, Kuthte’n Nergal a bawl ua, Hamathte’n Ashima a bawl ua;

³¹Avate’n Nibhaz leh Tartak a bawl uhi. Sepharvaimte’n pathiante Adrammelek leh Anammelek kiang ah a tate a hal uhi.

³²Huchi in TOUPA laudan a siam ua, a lak ua mi neupente mun sang siampute in a bawl ua, munsang innte ah amau adin thil a lan uhi.

³³TOUPA a lau ua, a pikhiakna gam ua namte hihdan bang in amau pathiante na a sem uh.

³⁴Tuma lam a, a hihdan bang un tunitan in a hihlai lai uhi. TOUPA laudan a siamkei ua, TOUPA’N Jakob suan Israel a chihte kiang ah,

³⁵“pathian dangte zaw lau kei unla, amau bekei unla, a kiang ah kithoih kei un.

³⁶TOUPA, thilhihtheihna thupitak leh banzak hial a Aigupta gam apan nou hon pikhepa amah laudan na siam zawk ding uh ahi, amah na biak ding uh ahi a, amah kiang a na kithoih ding uh ahi.

³⁷Huchi in thusehte, vaihawmte, dante, thupiakte a hon na gelhsak sate tangtawn in na pom gige ding uh ahi; pathian dangte laudan na siam ding uh ahi kei.

³⁸Na kiang ua thu ka khun pen na mangngilh ding uh ahi kei; pathian dangte leng laudan na siam ding uh ahi sam kei hi.

³⁹TOUPA na Pathian uh laudan na siam ding uh ahi. Huchi in na melma tengteng khut apan aman a hon hunkhe dia, chi a thu a khun a, amau adia TOUPA thupiakte, thusehte, vaihawmte, danbawlte, a zui tuankei uhi” a chi hi.

⁴⁰Bangchi mah bang in leng a zui nuamtuan kei ua, tuma lam a a hihdan bang un a hihlai lai uhi.

⁴¹Huchi in huai namte’n TOUPA a lau ua; a milim bawltawmte uh na leng a semlai uh. Huchi mah bang in a suante uh leh a suante uh suante tan in leng tunitan in a pi leh pute uh hihbang in a hihlai lai uhi.