Read Paite Chin 2 KUMPIPATE 18 Bible Online

2 KUMPIPATE 18 - Paite Chin bible

2 KUMPIPATE 18

¹Huan, Elah tapa Israel kumpipa Hosea kum thum a lal kum in hichi ahi a, Judah kumpipa Ahaz tapa Hezekiah a lal pan hi.

²A lal pattung in kum sawmnih leh nga a upa ahi a; Jerusalem ah kum sawmnih leh kua a lal a; a nu min Abi, Zakariah tanu ahi.

³A pu David thilhih tengteng hihsam in, TOUPA mitmuh in thil hoih a hih hi.

⁴Munsangte a hihgawp a, suangphuhte a hihchim a, Aserahte a phuk a; Mosi dalgul bawl a kitam nensak vek a; huai hun tanpha in Israel suante’n a kiang ah gimlim a hal ngal ua, aman huai Nehustan a sa hi.

⁵Aman TOUPA, Israelte Pathian a muang a; huchi in a nung a Judah kumpipa tengteng lak ah amah bang kuamah a omkei ua, a malam in leng a omsam kei uh.

⁶TOUPA a len chinten a, amah zuih a tawp nuam kei a, a thupiak, TOUPA’N Mosi a piakte a zui hi.

⁷Huchi in TOUPA a kiang ah a om a; a vak khiakna peuh ah a lamzang a; Assuria kumpipa tung ah a hel a, a na a semta kei hi.

⁸Philistiate Gaza khua tan in a gamgi chiang tengteng toh, galvilmi insang apan kulhnei khopi tan in a that vek hi.

⁹Kumpipa Hezekiah kum li a lal kum, Israel kumpipa Elah tapa Hosea kum sagih a lal kum in hichi ahi a, Assuria kumpipa Salmaneser in Samaria a hong dou a, a um kimvel hi.

¹⁰Kum thum a chin kum in a lazou a; Hezekiah kum guk a lal kum, Israel kumpipa Hosea kum kua a lal kum in ahi Samaria khua a lakzoh.

¹¹Assuria kumpipa’n Assuria gam ah Israel a pimang a, Halah, Habor, Gozan lui leh Mediate khuate a koihta hi.

¹²TOUPA a Pathian uh thu manglou a, a thukhun a bohse zaw a, TOUPA’N a sikha Mosi thu a piak tengteng a zuihlouh ziak un.

¹³Kumpipa Hezekiah kum sawmlehli a lal kum in Assuria kumpipa Sennakerib Judah gam a khaw kulh nei tengteng dou din a hohtou a, a lata hi.

¹⁴Judah kumpipa Hezekiah in Lakish khua a Assuria kumpipa kiang ah, “Thil ka na hihkhial hi, kei apan kiknawn in, ka tung a n’on got peuhmah ka paw ding” chi a gen din mi a sawl hi. Assuria kumpipa’n Judah kumpipa Hezekiah dangka talent za thum leh dangkaeng talent sawmthum a bikhiah sak hi

¹⁵Huchi in Hezekiah in TOUPA inn a dangka om teng leh kongkhak a dangkaeng tengteng leh kumpipa gou koihkhawmna a om tengteng a pia hi.

¹⁶Huai tungmah in Hezekiah in TOUPA biakin kongkhak a leh, Judah kumpipa Hezekiah inn khuampite dangkaeng a luante a lakhe vek a, Assuria kumpipa a pia hi.

¹⁷Assuria kumpipa’n Tartan, Rabsari leh Rabsakeh sepaih tampi toh Lakish khua apan Jerusalem khua a kumpipa Hezekiah kiang ah a sawl hi. Jerusalem khua a tungtou ua; a tun touh un puansawpmi lamlian lampi a dil saknung zaw tuilakna kiang ah ading uhi.

¹⁸Kumpipa a sap uleh, inn sung heutu Hilkiah tapa Eliakim, Laigelhmi Sebnah leh tanchin gelhmi Asaph tapa Joah a kiang uah a hong pawtkhia uhi.

¹⁹Rabsakeh in a kiang uah, “Hezekiah kiang ah vagen dih ua, Kumpipa thupitak Assuria kumpipa in hichi in a chi: Na gin a na muan bang ahia oi?

²⁰Kidouna adin geldan siam leh hatna ka nei uh, na chi a; himahleh huaizaw paukam lel ahi. Kua ahia na muan a ka tung a na hel maizen?

²¹Tuin, ngai in, hiai sialluang chiang, Aigupta muang na hita a; huai a mi a kingaih leh a khut a sun ding hi. Aigupta kumpipa Pharo bel amah muang tengteng tung ah huchibang ahi naknak hi.

²²Ahihkeileh, Ka kiang ah, TOUPA ka Pathian uh ahi ka muan uh, na chih uleh, amah pen Hezekiah in Judah leh Jerusalem kiang a Jerusalem a hiai maitam ma ah na biak ding uh ahi, chi a munsangte leh a maitamte a lakmang sakpa ahi ka hia? chi in.

²³Huchi in ka pu Assuria kumpipa toh thu kichiam dih ua, huchi in a tung a tuangmi ding na muhtheih peuhmah ding leh sakol sang nih k’on pe ding.

²⁴Bangchi’n ahia kangtalaite leh sakol tungtuang mite thu in Aigupta tung a na muanna koih in, ka pu mite lak a neupen heutu khat lel leng na nankik zoh mahmah ding?

²⁵Hiai gam TOUPA lou a hihse ding a hong kuantou ka hi ahia? TOUPA’N ka kiang ah, hiai gam dou inla, hihsia in, chi ahi” chi in a chi hi.

²⁶Hilkiah tapa Eliakim leh Sebnah leh Joahte’n Rabsakeh kiang ah, “Hehpih in na sikhate Suria pau in hon houpih in; huai lah ka theisiam ngal ua; kulh tung a mite ziak in Judah pau in hon houpih nawn ken” a chi uh.

²⁷Himahleh Rabsakeh in a kiang uah, “Ka pu in na pu uh kiang leh nou kiang kia ah hiai thu gen din a honsawl ahia? Kulh tung a tute, noute leh a ek uh ne dingte kiang ah leng a honsawl ahi kei maw?” a chi hi.

²⁸Rabsakeh ading a, Judah pau in aw ngaihtak in a kikou a, “Kumpipa thupitak Assuria kumpipa thu ngaikhia un.

²⁹Kumpipa’n hichi in a chi, Hezekiah zekhem in omkei un; aman lah a khut apan nou hon humbit theilou ding ahi.

³⁰Hezekiah in, TOUPA’N a hon humbit dia; hiai khopi Assuria kumpipa khut a piak ahi kei ding, chi in TOUPA ah hon muangsak kei hen.

³¹Hezekiah thu pom kei un. Assuria kumpipa’n hichi in a chi. Hon kileppih unla, ka kiang ah hong pawtkhia un; michih in amah grepgui leh amah theipi kung a nechiat uhenla, michih in amah tuikhuk tui dawn chiat hen.

³²Noumau gambang a buh leh uain gam, tanghou leh grephuan gam, olive leh khuaizu gam, silou a na hin theihna ding uh gam a k’on pi masiah, Hezekiah in, TOUPA’N hon humbit ding, chi a nou a hon zekhem in leng pom kei un.

³³Nam chihte pathian mawngmawng lak a himhim in a gam uh Assuria kumpipa apan a humbit ngeita uh hia?

³⁴Hamath leh Arpad pathiante koi a omta uh ahia? Sepharvaim, Hena leh Ivah pathiante leng koi a omta ahi ua? Samaria ka khut apan a humbit uhia?

³⁵Gamchih pathian tengteng lak a kuate ahi ua a gam uh ka khut apan humbit a, TOUPA’N Jerusalem khua kei apan a humbit mahmah ding?” chi’n, a chi hi.

³⁶Amau a dai sipsip ua, kam khat in leng a dawng kei uh: kumpipa thupiak dan, “Amah dawng ken” chih ahi ngal a.

³⁷Huchi in kumpipa inn sung heutu Hilkiah tapa Eliakim, Laigelhmi Sebnah leh tanchin gelhmi Asaph tapa Joahte’n a puansilh bohkekte uh silh in Hezekiah kiang ah a hoh ua, Rabsakeh thu gente a hilh uhi.