Read Paite Chin 2 KUMPIPATE 19 Bible Online

2 KUMPIPATE 19 - Paite Chin bible

2 KUMPIPATE 19

¹Huan, kumpipa Hezekiah in huai a zak in hichi ahi a, a puansilhte a botkek a, saiip puan a silh a, TOUPA inn ah a lutta hi.

²Inn sung heutu Eliakim, Laigelhmi Sebnah leh siampu upate saiip puansilh in Amoz tapa zawlnei Isai kiang ah a sawl hi.

³Amau a kiang ah, Hezekiah in hichi in a chi. “Tuni mangbatna leh salhna leh minsiatna ni ahi. Naute lah a pian uh a hunta ngal a, piang sak ding in lah thahatna a om nawnta ngalkei a.

⁴A pu Assuria kumpipa’n Pathian hing gense dia a sawl Rabsakeh thugen tengteng, TOUPA na Pathian in a za dia, a thugen, TOUPA na Pathian in a thu a zak in a na salkha mai ding, huaiziak in, a omlai mite thumsak in” a chi va chi un.

⁵Huchi in kumpipa Hezekiah sikhate Isai kiang ah a hoh uh.

⁶Isai in a kiang uah, Na pu kiang ah huchi in gen in, TOUPA’N hichi in a chi, “Na zak, Assuria kumpipa mite’n a hon gensiatnate uh lau ken.

⁷Ngai in, asung ah kha ka omsak dia, thuthang a za dia, amah gam ah a pai nawn ding. Huchi in amah gam mahmah ah namsau puksak in ka omsak ding, a chi hi,” chi in, a chi hi.

⁸Huchi in Rabsakeh a kiknawn a, Assuria kumpipa’n Libna khua a na suallai a mu a; Lakish apan a pawt chih a zaksa him ahi.

⁹“Ngai in, Nang hondou din a pawtta” chi a Tirhak Ethiopia gam kumpipa tungtang mi gen a na zak in Hezekiah kiang ah mite a sawl hi.

¹⁰Hichi in Judah kumpipa Hezekiah kiang ah na gen ding uh, “Na Pathian na muan in Jerusalem khua Assuria kumpipa khut ah piak ahi kei ding, chi in hon zekhem kei hen.

¹¹Ngai in, Assuria Kumpipate’n gam tengteng hihse vek ua, a tung a a thilhih uh naza a; nang humbit na hi tuan dia hia?

¹²Namchih pathiante’n ka pi leh pute’n a hihmangte uh a humbit ua hia? Gozan, Haran, Reseph, Eden ta Thelasar khua a omte.

¹³Hamath kumpipa, Arpad kumpipa, Sepharvaim khopi kumpipa, Hena kumpipa, Ivah kumpipa te koi a om ahita ua? chi’n” a chi hi.

¹⁴Hezekiah in a misawlte khut apan lai a mu a, a sim a: Hezekiah TOUPA inn ah a lut a, TOUPA ma ah huai a phalh hi.

¹⁵Hezekiah TOUPA ma ah a thum a, “TOUPA aw, Cherubte tung a tu, Israel Pathian, nang, nang kia leitung gam tengteng Pathian na hi a; lei leh van nangmah siamsa ahi uh.

¹⁶TOUPA aw, na bil na doh inla, ngai dih ve; TOUPA aw, na mit hak inla, en dih ve; Pathian hing gense dia Sennakerib in thu a hong gen ngaikhe dihve.

¹⁷TOUPA, Assuria Kumpipate’n namte leh a gamte uh a hihse ngei ua, a pathiante uh mei ah a pai uh.

¹⁸Hiaite pathian ahi kei him ua, mihing khut a bawl sing leh suang ahizaw uhi. Huaiziak in, mei a pailut in a hihmang uhi.

¹⁹Huaiziak in, tuin TOUPA, ka Pathian uh aw, nang, nang kia TOUPA Pathian na hi chih leitung a lalgam tengteng in a theihtheihna ding un a khut apan hon humbit in” a chi hi.

²⁰Huailai in Amoz tapa Isai in Hezekiah kiang ah, TOUPA Israel Pathian in hichi in a chi. Assuria kumpipa Sennakerib siatna dia ka kiang a na thum ka za, chih gen din mi a sawl hi

²¹Amah tungtang TOUPA’N a gen hiai ahi: Zion tanu nungak siangthou in nang a hon musit a, a hon nuihsan a; Jerusalem tanu in a lu a hon sinkhum hi.

²²Kua na minse sak a, kua na gensia a? Kua tung ah ahia na aw na san sak a, na mit na hah sang? Israelte Mi Siangthoupa tung ah ahi.

²³Na misawlte zang in TOUPA na minse sak a, Ka kangtalai tampi toh Lebanon gamgi tangsangte k’ong tungtouta hi. Huai a Sidar sing sang pipite leh taksing hoih pipite ka phuk dia; a lei hoihna mun gammang a tenna mun ngil pen ah ka lut ding.

²⁴Gamdang tui ka laikhia a, ka dawn zel a, ka khepek nuai ah Aigupta lui tengteng ka kangsak vek ding, na chi hi.

²⁵Keimah in nidanglai apan huai ka hih ahihdan bang, malai apan huai ka bawl ahihdan bang naza ka hia? Khaw kulhneite in chinkhawm lel bang a hihsepa din nang k’on septa hi.

²⁶Huaiziak in, asung a omte’n hatna a neikei ua, a lauthawng ua, a hong zahlakta uhi. Gamlak loupa bang leh loupa hing bang leh, intung a loupa bang leh, buh a let ma a hai vuai bang ahi uhi.

²⁷Ken bel na tut, na lut, na pawt leh ka tung a na hehte ka thei hi.

²⁸Ka tung a na heh ziak leh, uangtak a na pau ka bil a a hong luttouh ziak in ka nakbulh na nak ah ka bulh dia, ka sikbah na muk ah; na hong kuanna lampi mahmah ah k’on kiksak nawn ding, chi in.

²⁹Hiai nang adia chiamtehna ahi ding. Tukum in buhsang na sen ding ua; kum nawn chiang in a sang mah; kum thumna ah buh na tuh ding ua, at unla, grephuante bawl unla, a gahte ne un.

³⁰Huchi in Judah inkawte lak a damlai omsunte’n a suklam in zung a kai ding ua, a toulam in a gah nawn ding uhi.

³¹Jerusalem apan a omsunte Zion tang apan a damlaite a pawt khe ding uhi. TOUPA phatuamngaihna in huaite a hih ding, a chi hi.

³²Huaiziak in, TOUPA’N Assuria kumpipa tungtang thu huchi in a gen, Hiai khopi ah a hong tungkei ding, hiai ah leng thal a kap sam kei ding, lum toh a kiang ah lah a hongpai kei dia, a khozul ah lah lei a se sang kei ding hi.

³³A hong kuanna lampi ah, huai mah ah a nung kiknawn dia, hiai khopi a hongtung kei ding, TOUPA’N a chi.

³⁴Kei ziak leh ka sikha David ziak in hiai khopi humbit ding in ka veng ding hi, chi in.

³⁵Huchi in huai zan in hichi ahi a, TOUPA angel a kuan khia a, Assuriate giahphual ah mi nuai khat leh sing giat leh sang nga a that a; zingkhang a a hongthoh uleh, ngai in, misi luang ngen a na om maimah hi.

³⁶Huchi in Assuria kumpipa Sennakerib a pawt a, a kiknawn a, a pai zel a, Ninevi khua ah a omta hi.

³⁷A pathian Nisrok inn a amah a biaklai in hichi ahi a, Adrammelek leh Sarezerte’n namsau in a that ua; huchi in Ararat gam ah a tai lutta uh. Huchi in a tapa Esar haddon a sik in a lalta hi.