Read Paite Chin 2 KUMPIPATE 20 Bible Online

2 KUMPIPATE 20 - Paite Chin bible

2 KUMPIPATE 20

¹Huailai in Hezekiah muanmoh in a china hi. Huchi in Amoz tapa zawlnei Isai a kiang ah a hong a, a kiang ah, TOUPA’N hichi in a chi, “Na inkawte omdan ding gen in; damkhe zoulou ding na hi ngal a” a chi hi.

²Huchi in bang lam nga in a kihei a, TOUPA kiang ah,

³“ TOUPA aw, na ma a thutak leh lungtang hoihkim pu a ka omdan leh na mitmuh a thil hoih ka hihdan hehpih in theigige in” chi’n a thum hi. Huchi in Hezekiah kah petmah in a kap hi.

⁴Isai huangsung intual laitak a tunma in hichi ahi a, TOUPA thu a kiang ah a hongtung hi.

⁵“Kiknawn inla, ka mite heutu Hezekiah kiang ah gen in, TOUPA’N, na pu David Pathian in hichi in a chi, ‘Na thumna ka za a, na khitui kia leng ka mu hi. Ngai in, k’on damsak ding; ni thum ni’n TOUPA inn ah na hohtou ding.

⁶Na damsung kumte kum sawmlehnga in ka behlap dia; nang leh hiai khopi Assuria kumpipa apan ka humbit ding’. Keimah ziak leh ka sikha David ziak in hiai khopi ka hum ding” a chi, chi in.

⁷Isai in, Theipi gah beukhat honla un, a chi a; huchi in a honla ua, a meimatum ah a tat a, a hong dam nawnta hi.

⁸Hezekiah in Isai kiang ah, “TOUPA’N a hon damsak dia, TOUPA inn ah ni thum nin ka hohtou ding, chih chiamtehna bang ahi dia?” a chi hi.

⁹Isai in, TOUPA’N a thilgen a hihngei ding chih hiai nang adin TOUPA apan chiamtehna ding ahi ding: “Limliap kalbi sawm tan a mailam a a kintouh hia na deih kalbi sawm tan a a nunglam a a kin?” a chi hi.

¹⁰Hezekiah in a dawng a, “Limliap kalbi sawm tan a malam a kintouh a baihtel a, huaizaw hi kei hen, limliap kalbi sawm tan in nunglam ah nungkik zaw hen” a chi hi.

¹¹Huchi in zawlnei Isai in TOUPA a sam a; huchi in Ahaz dakzah theihna a limliap niamsa kalbi sawm tan in nunglam ah a kiksak nawn hi.

¹²Huailai in Baladan tapa Babulon kumpipa Merodakbaladan in laikhakte leh thilpiakte Hezekiah a khak a; Hezekiah chi a na chih a na zak ziak in.

¹³Huchi in Hezekiah in amau a na kipahpih a, a thil manpha koihna inn a thil manpha tengteng, dangka, dangkaeng, gimlimte, sathau manpha, a galvan koihna inn teng leh a gou koihkhawmna inn sung a om tengteng a ensak a: a inn leh a gamsung a Hezekiah in a etsak louh a neikei hi.

¹⁴Huailai in zawlnei Isai kumpipa Hezekiah kiang ah a hong a, a kiang ah, “Huai mite’n bang ahia a gen uh? Koi apan na kiang a honghoh ahi ua?” chi’n a dong hi. Hezekiah in, “Gam gamla, Babulon apan hong ahi uh” a chi hi.

¹⁵Huchi in aman “Na inn ah bangbang ahia a muh uh?” a chi a; Hezekiah in, “Ka insung a om tengteng a muvek ua, ka gou lak ah ka etsak louh a omkei ” chi’n a dawng hi.

¹⁶Isai in Hezekiah kiang ah, “TOUPA thu ngaikhia in.

¹⁷Ngai in, na insung a om tengteng leh tuni tan a na pi leh pute’n a na kholkhawmte uh Babulon khua ah a paipih nite uh a hongtung ding; Bangmah nutsiat a neikei ding uh TOUPA’N a chi.

¹⁸Na gil a gah, na suan ding, na tate ngei leng a paimangpih ding ua; Babulon kumpipa in ah michilgeh ahi ding uh” a chi hi.

¹⁹Huchi in Hezekiah in Isai kiang ah, “Na gen TOUPA thu a hoih ahi” a chi hi. “Ka damsung a lemna leh thutak a om ding nakleh hoih himailou hia?” a chi hi.

²⁰Huchi in Hezekiah tanchin dangte, a thilhih theihdan tengteng leh dil leh tuilakna a bawl a, khopi sung a tui a laklut thute Judah kumpipate lal lai thugelhna bu ah a tuang kei maw?

²¹Huchi in Hezekiah bel a pi leh pute kiang ah a ihmuta a; a tapa Manasseh a sik in a lal hi.