Read Paite Chin 2 KUMPIPATE 21 Bible Online

2 KUMPIPATE 21 - Paite Chin bible

2 KUMPIPATE 21

¹Manasseh a lal pattung in kum sawmlehnih a upa ahi. Jerusalem ah kum sawmnga leh nga a lal a; a nu min Hephzibah ahi.

²TOUPA’N Israel suante ma a delhkhiaksa namte thil kihhuai tak a hihte uh bang, TOUPA mitmuh in thil hoihlou a hih hi.

³A pa Hezekiah in a hihsiatsa munsangte a dingsak nawn a; Israel kumpipa Ahab hih bang in Baal maitamte a dingsak a, Aserahte a bawl a, van a om tengteng a bia in a na uh a sem hi.

⁴TOUPA’N “Jerusalem ah ka min ka omsak ding” a chihna TOUPA inn ah maitamte a bawl hi.

⁵TOUPA inn huangsung intual nihte ah van a om tengteng adin maitamte a bawl hi.

⁶A tapa mei ah a paisuaksak a, aisan leh bum a hih a, dawi zawlte leh kha napeuh a dong hi. TOUPA mitmuh in thil hoihlou thupi mahmah Amah hehsak din a hih hi.

⁷TOUPA’N David leh a tapa Solomon kiang a, “Hiai inn leh Jerusalem khua, Israel chi tengteng lak a ka tel ah ka min tangtawn in ka omsak ding.

⁸Thu ka piak tengteng leh ka sikha Mosi in dan a piak tengteng a zuih peuhmah uleh a pi leh pute uh ka piaksa gam apan Israelte khete leng ka kalsuan khesak n’on sam kei ding” a na chih khitsa inn ah Aserah lim bawl in a koih hi.

⁹Himahleh amau a zuikei ua; TOUPA’N Israel suante ma a delhkhiaksa namte hih sang tham a thupizaw thil hihkhial din Manasseh in mite a lampial sak hi.

¹⁰TOUPA’N a sikha zawlneite zang in thu a gen hi.

¹¹“Judah kumpipa Manasseh in hiai thil kihhuai takte a hih a, Amorte sang tham in a hihkhial thupi hi. Judahte’n leng a milimte a thil a hih khelhsak ziak in” a chi hi.

¹²TOUPA, Israel Pathian in hichi in a chi. “Ngai dih ua, Jerusalem leh Judah tung ah a za peuhmahte bil langnih khengzou khop a thil hoihlou k’on tungsak ding hi.

¹³Samaria tehna khau leh Ahab inkaw ulum khai Jerusalem tung ah ka khung dia; min a kuangnul a kilumletsak bang in Jerusalem ka nul ding hi.

¹⁴Ka goutan omsunte ka taisan dia, a melmate uh khut ah ka pe ding.

¹⁵Huchi in a pi leh pute uh Aigupta gam apan a hongpawt nung uh tuni pha a ka mit muh a thil hoihlou a hih ua, hon hehsak ziak un, a melma tengteng mat ding leh gallak ding ahi ding uh” chi in, a chi hi.

¹⁶TOUPA mitmuh a thil hoihlou tak hih a Judahte thil a hih khelhsak, khelhna a simlou in Manasseh in poikhoihlou sisan nakpitak in a suah lai a, Jerusalem dung leh vai a dimsak hi.

¹⁷Manasseh tanchin dangte, a thilhih tengteng, a thilhih khelhte Judah kumpipate lal lai thugelhna bu ah a tuang kei maw?

¹⁸Huchi in Manasseh a pi leh pute kiang ah a ihmuta a, Uzza huansung a om amah inn huan mah ah a vui ua; a tapa Ammon a sik in a lalta hi.

¹⁹Ammon a lal pattung in kum sawmnih leh nih a upa ahi. Jerusalem ah kum nih a lal a; a nu min Mesullemeth, Jotbah khua a Haruz tanu ahi.

²⁰A pa Manasseh hih bangmah TOUPA mitmuh in thil hoihlou tak a hih hi.

²¹A pa lampi tot tengteng a tawnsam a, a pa septe milim pathiante na sem in amau a bia hi.

²²Huchi in TOUPA, a pi leh pute Pathian a paisan a, TOUPA lampi a tawn kei hi.

²³Ammon sikhate’n amah a guksawm ua, kumpipa amah inn ah a thatta uhi.

²⁴Himahleh huai gam a mite’n kumpipa Ammon guksawmmi tengteng a thatvek uhi. Huchi in huai gam mite’n a tapa Josiah a sik in kumpipa in a bawlta uhi.

²⁵Huchi in Ammon thilhih tanchin dangte Judah kumpipate lal lai thugelhna bu ah a tuang kei maw?

²⁶Uzza huan a amah han ah a vui ua; a tapa Josiah a sik in a lalta hi.