Read Paite Chin 2 KUMPIPATE 22 Bible Online

2 KUMPIPATE 22 - Paite Chin bible

2 KUMPIPATE 22

¹Josiah a lal pattung in kum giat a upa ahi. Jerusalem ah kum sawmthum leh khat a lal a; a nu min Jedidah, Boskath khua a Adaiah tanu ahi.

²Aman TOUPA mitmuh in thildik a hih a, a pu David lampi tot tengteng a tawn a, taklam ah hiam veilam ah hiam a pialkhe kei hi.

³Kumpipa Josiah a lal kum sawmlehgiat kum in hichi ahi a, kumpipa’n Mesullam tapa Azaliah tapa Laigelhmi Saphan kiang ah,

⁴“Siampu lianpen Hilkia kiang ah hohtou inla, kongkhak vengmite’n mite apan a na lakkhawm uh TOUPA inn a dangka kikoih sim uhenla;

⁵TOUPA inn lam nasemmite pia uhen; amau in sebawl TOUPA inn a nasemte pia uhen.

⁶Singlem bawlmite, inlammite, inn sia bawlmite’n inn siatna tak bawlna sing leh suangsek a lei theihna ding un, chi’n vagen in, chi in TOUPA inn ah a sawl hi.

⁷Himahleh dangka a piakte uh etpih nawn din a gelhsak tuankei, muanhuai tak a hihzel a hih ziak un” a chi hi.

⁸Siampu lianpen Hilkia in Laigelhmi Saphan kiang ah, “TOUPA inn ah dan laibu ka mu” a chi hi. Hilkia in huai laibu Saphan a pia a, aman a simta hi.

⁹Laigelhmi Saphan kumpipa kiang ah a hoh a, kumpipa kiang ah thu a vatun nawn a, “Na mite’n in a dangka om a pekhe vek ua: TOUPA inn lam nasemmite a pevek uh” a chi hi.

¹⁰Laigelhmi Saphan in, “Siampu Hilkia in laibu a honpia” chi in kumpipa a hilh a, huchi in Saphan in kumpipa ma ah a sim hi.

¹¹Kumpipa’n dan laibu a thute a zak in hichi ahi a, a puante a botkek hi.

¹²Huchi in kumpipa’n siampu Hilkia, Saphan tapa Ahikam, Mikaiah tapa Akbor, Laigelhmi Saphan leh kumpipa sikha Asahiah kiang ah,

¹³“Kei, mi tengteng leh Judah teng adin hiai laibu a thu tuang toh kisai in TOUPA hon dotsak un. I pi leh pute’n hiai laibu a thute zui dia a na ngaihkhiatlouh ziak un i tung uah TOUPA thangpaihna a thupi mahmah ngal a” chi’n thu a pia hi.

¹⁴Huchi in siampu Hilkia, Ahikam, Akbor, Saphan, Asahiah, puansilh kempa Harhas tapa Tikvah tapa Sallum zi zawlnei Huldah kiang ah a hoh ua, a va houpih uhi. Amah bel Jerusalem sehkhen nihna a teng ahi.

¹⁵Aman a kiang uah TOUPA, Israelte Pathian in hichi in a chi. “Ka kiang a nou hon sawlpa hilh un, TOUPA’N hichi in a chi hi.

¹⁶‘Ngai in, hiai mun ah leh asung a tengte tung ah thil hoihlou k’on tungsak ding, Judah kumpipa’n laibu a, a thusim tengteng bang in.

¹⁷Kei a hon paisan ua, pathian dangte kiang ah gimlim a hal ua, a khutsuak ua a hon thangpaihsak ziak un hiai mun ah ka thangpaihna nakpi’n a kuangdia, a mawkmih kei ding hi.

¹⁸Himahleh TOUPA dongdia nou honsawlpa Judah kumpipa kiang ah huchi in na chi ding uh. TOUPA, Israelte Pathian in hichi in a chi. Na thuzak tungtang thu ah,

¹⁹hiai mun leh, asung a tengte hihgam leh hamsiat in a om ding uh chih thu ka gen na zak a, na lungtang a nem a, TOUPA ma a na kiniamkhiak a, na puante na bohkeka, ka ma a na kah ziak in, ken leng na thu ka naza, TOUPA’N a chi hi.

²⁰Huchi in ngai in, na pi leh pute kiang ah k’on pi dia, na han ah lungmuangtaka piin na om dia, hiai mun a thil hoihlou ka tunsak ding tengteng na mit in a muvek kei ding” a chi hi. Huchi in huai thu kumpipa kiang ah a tun nawn uhi.