Read Paite Chin 2 KUMPIPATE 23 Bible Online

2 KUMPIPATE 23 - Paite Chin bible

2 KUMPIPATE 23

¹Huan, kumpipa’n mi a sawl a, Judah leh Jerusalem khopi a upa tengteng a kiang ah a samkhawm uhi.

²Huchi in kumpipa Judah gam a mi tengteng leh Jerusalem khua a mi tengteng toh, siampute leh zawlneite toh, mipi tengteng toh, a neu a lian in TOUPA inn ah a hohtou ua; TOUPA inn a kimu thukhun laibu a tuang thu tengteng a bil ua zak in a sim hi.

³Kumpipa khuam zul ah ading a, huai laibu a tuang thukhun thu hihkip din lungtang tengteng leh a kha tengteng a TOUPA zui ding leh a thupiakte, a thu theihsakte, a thusehte zui din TOUPA ma ah thu a khung a; huchi in mipi tengteng in leng a khunpih uhi.

⁴Kumpipa’n siampu lianpen Hilkia leh a zom a siampute, kongkhak vengmite kiang ah TOUPA biakin sung a Baal, Aserah leh van a om tengteng adia kibawl tuium-belsuan tengteng lakhe vek din thu a pia hi. Huchi in Jerusalem pawlam, Kidron mun ah huai tengteng a hal a, a vute Bethel ah a paipih hi.

⁵Milim pathian bia siampute, Judah Kumpipate’n Judah gam khopi munsangte a, Jerusalem kim a gimlim haldia a na seh uh a tawpsak a; Baal adia, ni adia, kha adia, aksite adia van a omte tengteng adia gimlim halmite leng.

⁶TOUPA inn a Aserah pen Jerusalem pawlam Kidron lui a lakhia in a hal a, a siknen gawp a, a nen mi vantangte han ah a theh hi.

⁷Aserah puangan numeite omna, TOUPA inn kiang a pasal kizuakte omna innte a phelkhe vek hi.

⁸Judah khopi apan siampu tengteng a pikhia a, siampute’n gimlim a halna uh Geba apan Beer — sheba pha in a hihbuah vek a; khopi kongpi a veilam pang a om khopi ukpa Joshua kongpi ah a lut a kongpite a munsangte a chimsak hi.

⁹Munsang siampute Jerusalem a TOUPA maitam ah a hohtou kei ua, himahleh a unaute uh lak ah tanghou silngou sohlouh a ne uhi.

¹⁰Kuamah in a tapa hiam, a tanu hiam Molech kiang ah mei a paisuaksak nawnlouhna din, Hinnom suante guam a Tophet a hihbuah hi.

¹¹TOUPA inn lutna a inn huangsung a kumpipa inn vengmi Nathanmelek dantan chin a Judah Kumpipate’n ni adia sakol a piakte uh a lamang vek a; ni kangtalai mei in a hal hi.

¹²Ahaz inn chial tung a Judah Kumpipate’n maitam a bawlte uh leh Manasseh in TOUPA inn huangsung intual nih a maitam a bawlte kumpipa’n a hihchim a, a hihnen vek a, a nente Kidron lui ah a pai hi.

¹³Jerusalem ma a tatsiatna tang taklam pang a Zidonte pathian kihhuai mahmah Astoreth adia, Ammon suante pathian kihhuai mahmah Khemosh adia, Ammonte Pathian kihhuai mah Molech Israel kumpipa Solomon in munsang a bawlte kumpipa’n a hihbuah hi.

¹⁴Milimte a kitam gawpsak vek a, Ashera a hihpuk a, huai munte ah mihing guhte a koih hi.

¹⁵Huailou leng Israelte thil hihkhial sakpa Nebat tapa Jeroboam in Bethel a maitam leh Israelte thil hihkhial sakpa Nebat tapa Jeroboam in a bawl munsang, huai maitam a hihchim a munsang mei a hal in a sikzan a, Ashera a hal hi.

¹⁶Josiah a kihei a, tang a hante a mu a; huchi in han a guhte a va lasak a, huai thu Pathian min a na gen, TOUPA thu bangbang in maitam tung ah a hal a, a hihbuah hi.

¹⁷Huchi in aman, huai a ka muh kua suangphuh ahia? a chi a; khomite’n, Pathian mi, Judah gam apan hongpai, Bethel a maitam tung a tua na hih a na genkholpa han eive, chi in a hilh uhi.

¹⁸Aman “Bangmah chih kei un; kuamah in a guhte lasuan kei hen” a chi hi. Huchi in a guhte Samaria gam apan zawlnei hong paipa guhte toh bangmah a chih kei uhi.

¹⁹Israel Kumpipate’n TOUPA hehsak dia a lam uh Samaria gam khua a mun sang in tengteng leng Josiah in a suanmang a, Bethel a ahihvek bang geih in a hih hi.

²⁰Huchi in huai a munsang siampu tengteng maitam tung ah a that a, huaite ah mihing guhte a hal a, Jerusalem ah a kiknawnta hi.

²¹Kumpipa’n mi tengteng kiang ah, “Hiai thukhun bu a tuang bang in TOUPA, Pathian adin Paikan Ankuang zang un” chi’n, thu a pia hi.

²²Israelte tung a vaihawmmite’n vai a hawm ua kipan Israel kumpipa tengteng, Judah kumpipate lal sung teng in huchibang hial Paikan Ankuang a zangngei naikei uhi.

²³Kumpipa Josiah lal kum sawmlehgiatna kum in Paikan Ankuang Jerusalem khua ah TOUPA adin hiai bang in a nei phet uhi.

²⁴Huai ban ah TOUPA inn a siampu Hilkia in a muh laibu a thu tuangte a kipsak theihna din dawi aisansiam zawlte, bumsiamte, pathian limte, Judah gam leh Jerusalem a thil kihhuai a muh tengteng Josiah in a hihmang vek hi.

²⁵Mosi dan tengteng a lungtang leh kha tengteng leh hatna tengteng a TOUPA pom amah bang mahmah a ma a kumpipate kuamah a omkei ua; a nung in leng amah bang kuamah a om n’on sam kei hi.

²⁶Huchipi in leng TOUPA’N a thangpaihna thupi mahmah, Manasseh in a na thangpaihsakna tengteng ziak in Judah tung a a thangpaihna a kihei san kei hi.

²⁷TOUPA’N, “Israel ka suanmang bang in Judah leng ka muh phak louhna ah ka suanmang sam dia, hiai khua ka tel Jerusalem ngei leh huai a inn ka min a omna ding, ka chih ka paimang ding” a chi hi.

²⁸Huchi in Josiah tanchin dangte, a thilhih tengteng Judah kumpipate lal lai tanchingelhnabu ah a tuang kei maw?

²⁹Amah a lal lai in Aigupta kumpipa Pharo Neko Assuria kumpipa dou din Euphrates lui ah a hohtou hi. Kumpipa Josiah in amah a na dou a; aman a muhtak in Meggiddo khua ah a that hi.

³⁰Huchi in a sikhate’n Meggiddo apan a luang kangtalai in a paipih ua, Jerusalem ah a lutpih ua, amah han ah a vui uh. Huchi in huai gam a mite’n Josiah tapa Jehoahaz a pi ua, thau a nilh ua, a pa sik in kumpipa in a bawlta uhi.

³¹Jehoahaz a lal pattung in kum sawmnih leh thum a upa ahi a; Jerusalem ah kha thum sung a lal a; a nu min Hemutal, Libnah khua a Jeremiah tanu ahi.

³²A pi leh pute hih bang in TOUPA mitmuh in thil hoihlou mahmah a hih hi.

³³Pharo Neko in Jerusalem a vaihawm thei nawnlou din Hamath gam a Riblah khua ah a koltang sak a; a gam uh dangka talent za khat leh dangkaeng talent khat siah a kipe sak hi.

³⁴Pharo Neko in Josiah tapa Eliakim, a pa Josiah sik in a lal sak a, a min Jehoiakim chi in a kheksak hi. Jehoahaz bel a pimang a; Aigupta gam ah a pai a, huai ah a sita hi.

³⁵Jehoiakim in dangka leh dangkaeng Pharo a pe phot a; himahleh a ma gam Pharo thupiak bang in dangka adin siah a liausak hi. Pharo Neko kiang a piak din michih liau dia a sehzah chiat bang in huai gam a mite dangka leh dangkaeng a liausak hi.

³⁶Jehoiakim a lal pattung in kum sawmnih leh nga a upa ahi a; Jerusalem ah kum sawmlehkhat a lal a; a nu min Zebudah, Rumah khua a Pedaiah tanu ahi.

³⁷Huchi in a pi leh pute hihdan bang in TOUPA mitmuh in thil hoihlou mahmah a hih hi.