Read Paite Chin 2 KUMPIPATE 24 Bible Online

2 KUMPIPATE 24 - Paite Chin bible

2 KUMPIPATE 24

¹A lal lai in Babulon kumpipa Nebukadnezzar in huai gam a hongdou a, Jehoiakim bel a sikha in kum thum a om hi. Huai nung in a lehngatsan a, a tung ah a helta hi.

²TOUPA’N Kaldai pawlte, Suria pawlte, Moab pawlte, Ammon suan pawlte amah sual din a sawlkhia a, a sikha zawlneite zang a a gen TOUPA thu bang in Judah gam hihse sak din a sawl hi.

³Manasseh khelhna, a thilhih tengteng ziak a, a muh phak louhna a amaute suanmang din, Judah tung ah TOUPA thupiak a hongtung petmah hi.

⁴Midik sisan a suah ziak in leng; midik sisan a Jerusalem a hih dim ziak in leng TOUPA’N amah a ngaidam kei hi.

⁵Huchi in Jehoiakim tanchin dang leh a thilhih tengteng Judah kumpipate lal lai tanchin gelhna bu ah a tuang kei maw?

⁶Huchi in Jehoiakim bel a pi leh pute kiang ah a ihmuta a; a tapa Jehoiakin a sik in a lalta hi.

⁷Aigupta kumpipa a gam apan a hong kuan khe nawn kei hi. Babulon kumpipa’n Aigupta gam lui apan Euphrates lui pha a kumpipa gam huap tengteng a lak zoh tak ziak in.

⁸Jehoiakin bel a lal pat tung in kum sawmlehgiat a upa ahi a; Jerusalem ah kha thum a lal a a nu min Nehushta, Jerusalem khua a Elnathan tanu ahi.

⁹A pa hih dan tengteng hih in, TOUPA mitmuh in thil hoihlou mahmah a hih hi.

¹⁰Huchihlai in Babulon kumpipa Nebukadnezzar sikhate Jerusalem ah a hohtou ua, khua a va um uhi.

¹¹Huchi a a sikhate’n a va umlai un Babulon kumpipa Nebukadnezzar khua ah a va hohtou hi.

¹²Huchi in Judah kumpipa Jehoiakin, a nu, a sikhate, a miliante, a heutute toh Babulon kumpipa kiang ah a va pawtkhia ua; a lal kum giat kum in Babulon kumpipa’n a na man hi.

¹³TOUPA gen bang in, a in a gou tengteng leh kumpipa inn a gou tengteng a lavek a, TOUPA biakin a Israelte kumpipa Solomon in dangkaeng tuium-belsuan a bawl tengteng a satgawp vek hi.

¹⁴Jerusalem a mi tengteng, milian tengteng, mihat hangsan hoih tengteng, sing khat leh khutsiam leh siksekmi tengteng sal in a pivek hi. Huai gam a mi gentheite chihlouh kuamah a omta kei uhi.

¹⁵Jehoiakin bel Babulon ah a pi a; kumpipa nu, kumpinute, a heutute leh huai gam a mihatte Jerusalem apan Babulon ah sal in a pi hi.

¹⁶Babulon kumpipa’n pasal hoih tengteng sang sagih leh khutsiam leh siksekmi sang khat, mi hat hoih teng galdou thei mi ngen Babulon ah sal in a pi vek hi.

¹⁷A pa unaupa Mattaniah, Babulon kumpipa’n a sik in a lal sak a, a min Zedekiah chi in a kheksak hi.

¹⁸Zedekiah bel a lal pattung in kum sawmnih leh khat a upa ahi. Jerusalem ah kum sawmlehkhat sung a lal a; a nu min Hamutal, Libnah khua a Jeremiah tanu ahi.

¹⁹Jehoiakim hihdan tengteng bang in a hih a, TOUPA mitmuh in thil hoihlou mahmah a hih hi.

²⁰TOUPA hehna tawn in Jerusalem leh Judah tung ah Zedekiah Babulon kumpipa tung a a hel apan Aman a muh phaklouh dia a paihmang masiah hiai thilte a hongtungta hi.