Read Paite Chin 2 KUMPIPATE 3 Bible Online

2 KUMPIPATE 3 - Paite Chin bible

2 KUMPIPATE 3

¹Huan, Judah kumpipa Jehosaphat kum sawmlehgiat a lal kum in Ahab tapa Jehoram Israelte tung ah Samaria khua ah a lal pan a; kum sawmlehnih a lal hi.

²TOUPA mitmuh in thil hoihloupi a hih a; himahleh a nu leh a pa bangtel in zaw thil ahihkei hi. Ama’n a pa Baal suangphuh a paimang hi.

³Himahleh, Israelte thil hihkhial sak Nebat tapa Jeroboam khelhnate amah ah a belh chinten a; huai a paisan kei hi.

⁴Moab kumpipa Mesha belam vulmi ahi a; aman Israel kumpipa kiang ah belamnou nuai khat mul leh belampa nuai khat mul siah a liau hi.

⁵Himahleh Ahab sih nung in hichi ahi a, Moab kumpipa Israel kumpipa tung ah a helta hi.

⁶Huchihlai in kumpipa Jehoram Samaria khua apan a pawt a, Israel tengteng a kai khawmvek hi.

⁷Huchi in a pawt a, Judah kumpipa Jehosaphat kiang ah “Moab kumpipa ka tung ah a hel a, Moabte na hondou pih diam?” chi in mi a sawl hi. Aman “Hondou pih e, kei leh nang, ka mite leh na mite pumkhat i hi ua, ka sakolte leh na sakolte leng pumkhat ahi uh” a chi hi.

⁸Amahmah in, “Koi lampi ah ahia i kuan touh ding?” a chi hi. Aman a dawng a, “Edom gamdai lampi ah” a chi hi.

⁹Huchi in Israel kumpipa Judah kumpipa toh, Edom kumpipa toh, a kuanta ua; ni sagih a paikual ua; a sepaihte leh a gan tonpihte dawn ding tui a omta kei hi.

¹⁰Israel kumpipa’n, “E heh he! TOUPA’N kumpipa thumte Moabte khut a piak dia hon pikhawm ahi peuhmah ve” a chi hi.

¹¹Himahleh Jehosaphat in, “Hiai ah TOUPA hon dotsak ding TOUPA zawlnei kuahiam bek a omkei maw?” a chi hi. Israel kumpipa sikha khat in a dawng a, “Elijah khut tui buaksekpa Saphat tapa Elisha hiai a om eive,” a chi hi.

¹²Jehosaphat in, a kiang ah “Aman TOUPA thu a nei hi” a chi hi. Huchi in Israel kumpipa leh Jehosaphat leh Edom kumpipa a kiang ah a hoh sukta uh.

¹³Elisha in Israel kumpipa kiang ah, “Nang leh ken kizopna bang i nei a? Na pa zawlneite leh na nu zawlneite kiang ah vahoh in” a chi hi. Israel kumpipa’n a kiang ah, “Pailou e; kumpipa thumte Moabte khut a piak din TOUPA’N a hon pikhawm hi” a chi hi.

¹⁴Elisha in, “A kiang a ka dinna sepaihte TOUPA hinna lou in ka gen hi. Judah kumpipa Jehosaphat zahtaklou hileng nanglam leng ka nga kei dia, muh leng k’on mu hetkei ding.

¹⁵Himahleh, kaihging tumsiam mi honsam un” a chi hi. Kaihging tumsiam in a hontum leh, hichi ahi a, TOUPA khut a tung ah a hong omta hi.

¹⁶Aman, TOUPA’N hichi in a chi, “Hiai phaizang tengteng toukuak tektuk un.

¹⁷TOUPA mah in hichi in a chi. Huih himhim na mu kei ding ua, vuah himhim leng na musam kei ding uh. Himahleh hiai phaizang tui in a dim vek ding hi. Huchi in nou leh na bawnghonte uh leh na gante un a dawn ding uh.

¹⁸Hiai TOUPA ngaih in thil neuchik lel ahi a; Moabte na khut uah a honpiak behlap ding hi.

¹⁹Kulhpi nei khua tengteng leh khopi hoih tengteng na hihse ding ua, sing hoih tengteng na phuk ding ua, tuikhuk tengteng na hubing ding ua, mun hoih tata suang in na dengse vek ding uh” a chi hi.

²⁰Zingsang in, thillat lat hunlai in hichi ahi a, ngai in, Edom gam lam apan tui a hongluang a, a gam tui in a hong dimta hi.

²¹Moab tengteng in amau sual din kumpipate a hong kuantou uh chih a na zak un, galdou thei chiang tengteng a na kikaikhawm ua, gamgi ah a na pangta uhi.

²²Huchi in, zingkhang in a thou ua, ni in tui tung a hon salvak a, Moabte’n a zawn ua tui sisan bang a san in a mu uhi.

²³“Sisan eive, kumpipate amau le amau a kidou ua, amau leh amau kithat uh ahi mahmah ve. Kisa un, Moabte aw, gallak thil i vatuh ding uh” a chi uhi.

²⁴Israelte giahphual a vatun uleh, Israelte a hong thouphut ua, Moabte a sual ua, huchi in a ma uah a taikek uh. Moabte that kawm in a gam uah a delhlutta uhi.

²⁵Khuate a hihsia ua; amun hoih tata teng uh michih in a deng ua, suang in a dimgawpta hi. Tuikhuk tengteng a hubing ua, sing hoih tengteng a phuk ua; Kir hareseth khua a om suangte kia a khoihkei uhi. Huai leng vaisuanglot tawipawl in a um kimvel ua, a sual uhi.

²⁶Moab kumpipa’n a kidou uh zou din a kitheita kei a, Edom kumpipa kiang a tungdia phut paisuak tum in namsau tawi mi za sagih a pikhia a, himahleh a lohsam uhi.

²⁷Huchi in a tapa upapen, a sik a honglal ding pen kulhdawn ah haltum thillat in a lanta hi. Huchi in Israelte a tung ah a heh mahmah ua, a kisa ua, a gam uah a paikik nawnta uhi.