Read Paite Chin 2 KUMPIPATE 4 Bible Online

2 KUMPIPATE 4 - Paite Chin bible

2 KUMPIPATE 4

¹Huan, zawlneite tapate zite lak a numei khat in Elisha kiang ah, “Na sikha, ka pasal a na sita hi. Na sikha in TOUPA a lau chih na thei a; a leibat napa’n ka tate a nih ua sikha dia pi din a hong kuan hi” chi in a mangbat thu a hilh hi.

²Elisha in a kiang ah, “Bang k’on hihsak dia? Honhilh ve, inn ah bang na nei a?” a chi hi. Aman Na sikhanu’n “Sathau um khat kia loungal inn ah bangmah ka neikei” a chi hi.

³Huchi in aman, vakuan inla, na invengte tengteng bel vuak va khel khawm in; tamlou kia zaw khel ken.

⁴Na honglut chiang in na tate toh kong kikhak khum unla, huai bel tengteng ah sathau thun inla; a dim dim in na tuamkoih ding“ a chi hi.

⁵Huchi in a kiang apan a paita a, amah leh a tapate toh kong a kikhak khum ua; amau belte a honla ua, aman a na thunzel hi.

⁶Belte a dim nung in, hichi ahi a, a tapa kiang ah, “Bel honla nawn dih” a chi hi. Aman a kiang ah “Bel a om nawn kei” a chi hi. Huchi in sathau a kangta hi.

⁷Huaikhit in Pathian mi kiang ah a vahoh a, thil omdan a va hilh hi. Aman, “Vapai inla, sathau vazuak inla, na leibat va din inla, a val in na tapate toh khosa un” a chi hi.

⁸Ni khat Elisha Shunem khua ah a vazin hi. Huai ah numei neizoutak khat a om hi. Aman an ne din a na sawl teitei hi. Huchi in a pai peuhmah chiang in huai ah an ne din a lut hi.

⁹Aman a pasal kiang ah, “Ngai in, hiai mi honnawk zelpa Pathian Mi Siangthou ahi, chih ka thei.

¹⁰Kisa dih, in pindan neu i bawlsak dia, lupna, dohkan, tutphah leh khawnvak koihna i koihsak ding. Huchi a i kiang a a hong chiang in a lutzel ding” a chi hi.

¹¹Ni khat a vahoh a, huai in pindan ah a valut a, a valum hi.

¹²A sikha Gehazi kiang ah, “Hiai Shunem numei honsam dih” a chi hi. A vasama maah a hongding hi.

¹³Aman a kiang ah, “Ngai in, Nang nakpitak in n’on deihthoh a, bang k’on hihsak sam dia, kumpipa hiam, sepaih heutu hiam hon houpihsak leng na ut hia? chi’n a kiang ah gen in” a chi hi. Aman a dawng a, “Ka chipihte lak maha teng ka hi” a chi hi.

¹⁴Aman “Amah a dia bang hihding ahia leh?” a chi hi. Gehazi in a dawng a, “Tapa zaw a neikei hi, a pasal lah a upata hi” a chi hi.

¹⁵Aman, “Vasam dih,” a chi hi. A va sam a, kongah a hongding hi.

¹⁶Aman, “Tu bang hun a hong tun nawn chiang in tapa na pomta ding” a chi hi. Aman, “Maizen, toupa, nang Pathian min na sikhanu kiang ah zuaugen ken” a chi hi.

¹⁷Huchi in numei a gai a, Elisha in a kiang a, a gen bang a ahun a hongtun nawn in tapa a neita hi.

¹⁸Naungek a hong khanglian a, ni khat a pa toh buhla mite kiang ah a kuansam hi.

¹⁹A pa kiang ah, “Ka lu, ka lu” a chi hi. A pa’n sikha valnou khat kiang ah, “A nu kiang ah pom in paipihin” a chi hi.

²⁰A paipiha, a nu kiang a tunin a pheitung ah suntan a tu a, huchi in a sita hi.

²¹A paitoua, Pathian mi lupna ah a siala, kong a khakkhum a, a pawtta hi.

²²Huchi in a pasal a sam a, “Sikha kuahiam leh sabiltung khat hon ngaihtuahsak dihve, Pathian mi kiang ah ka vatai dia, k’ong kiknawn ding” a chi hi.

²³Aman “Bangdia tuni chitchiata a kiang a hohtum na hia? Kha thak leng ahikeia, khawlni leng ahi ngalkeia” a chi hi. Aman, “A hoih ding” a chi hi.

²⁴Huchi in sabiltung a bawl a, a sikha kiang ah, “Hawl inla malam ah pai in, thu k’on piak kei leh awl paiken” a chi hi.

²⁵Huchi in a paita hi, Pathian mi kiang ah Karmel tangah a vahoh hi. Pathian min gamlapi apan a na muh in, hichi ahi a, a sikha Gehazi kiang ah, “En in, huai ah Shunem numei a om.

²⁶Amah dawn din vatai inla, a kiang ah, na dam hia? Na pasal dam maw? Naupang leng dam maw? va chi in” a chi hi. Aman a na dawng a, “Dam e” a chi hi.

²⁷Tang a Pathian mi kiang a va tun in, a khe a len chinten a, amah hong sawnhang tum in Gehazi in a va naih hi. Himahleh Pathian mi’n “Bangmah chih ken, a lungsim a mangbang hi. Toupa’n ka lak ah a sel a a honhilh naikei hi” a chi hi.

²⁸Huchi in aman, “Ka toupa, tapa k’on ngen ahia? Honkhem ken, k’on chi hilou maw?” a chi hi.

²⁹Huchi in Gehazi kiang ah, “Na puan teng inla, ka chiang tawi in vahoh in. Kuapeuh mu lechin leng, chibai buk ken. Kuapeuh in chibai a honbuk uleh leng dawng ken. Ka chiang naupang maitang ah vanga in” a chi hi.

³⁰Naupang nun, “TOUPA hinna leh na hinna lou in ka gen hi, k’on khah hetkei ding” a chi hi. Huchi in a thou a, a zuita hi.

³¹Gehazi in amau a na makhelha, naupang mai ah chiang a na nga hi. Himahleh aw leh zak bangmah a omkei. Huchi in houpih din a kiknawn a, “Naupang hak hetkei veh aw” chi’n a hilh hi.

³²Elisha insung a va lut leh ngai in, naupang a si khinta a, a lupna ah a na lumsak lai uhi.

³³Huchi in a valut a, a nih un kong a khakkhum a, TOUPA kiang ah a thum hi.

³⁴A paitou a, naupang a bohkhuma, a muk leh a muk, a mit leh a mit, a khut leh a khut a sutuaha; a tung ah a kizana; huchi in naupang taksa a honglum hiaihiai hi.

³⁵Huchi in a kiknawn a, inn sung ah a kivialleh a; a hohtoua, a tung ah a bok a; huchi in naupang sagihvei a hong hahchiai a, a hong hakta hi.

³⁶Huchi in Gehazi a sam a, “Hiai Shunem numei honsam dih” a chi hi. A vasam a, a kiang a a valut leh, “Na tapa pom in” a na chi hi.

³⁷Huchi in a valut a, a khebul ah a khupboh a, a mai a leisi in a kuna; a tapa a pom a, a pawtkhia hi.

³⁸Gilgal ah Elisha a hohnawn hi. Huai gam ah kial a kia hi. zawlneite tapate a ma ah a tukhawm ua; aman a sikha kiang ah, “Bel lianpi suang inla, zawlneite tapate an huansakin” a chi hi.

³⁹Mi khat gam ah meh zong in a vakuana, gam khau a va mua, a gah khenkhat a lou a, a puan in a tun theihzah a tun a, a atnena, bel sung ah a kha hi. Bang ahia chih a thei kuamah a omkei uh.

⁴⁰Huchi in huai mite nek din a suakkhia ua, an huan a nek ua leh, hichi ahi a, “E, Pathian mi, bel sung a sihna om a kei maw” a chi kheukhou ua; a ne theita kei uhi.

⁴¹Aman, “Tangbuang hon ladih ua” a chi a; huai bel ah a kha hi; “Mite nek din hon suakkhe dih ua” a chi hi. Huchi in bel ah lauhuai bangmah a omta kei hi.

⁴²Baal Shalisha apan mi khat a hong a, Pathian mi adin buh thak masapen a bawl barli buh sangpek sawmnih leh buh thak vui a ip in a hontawi a; aman, “Hiai mite nekdin pia in” a chi hi.

⁴³A sikha in, “Bang e, mi za khattak hiai ka lui ding maw?” a chi hi. Aman hiai mite nekding pia in. Toupa’n hichi in a chi, “A ne ding ua, a khamval lai ding uh” a chi hi.

⁴⁴Huchi in a lui a, a ne ua, TOUPA chih bang ngei in a khamval lai uhi.