Read Paite Chin 2 KUMPIPATE 5 Bible Online

2 KUMPIPATE 5 - Paite Chin bible

2 KUMPIPATE 5

¹Suria kumpipa sepaih heutu Naaman, Toupa’n Suriate humbitpa a a zat ziak in, a pu ngaih in thupi leh zahtakhuai tak ahi. Amah mi hat ahi lai a, himahleh a phak hi.

²Suriate a pawlpawl in a kuan khia ua, Israel gam apan numei naupangnou khat sal in a honpi ua; aman Naaman zi na a sem hi.

³Aman a pi kiang ah, “Ka toupa Samaria khua a zawlnei kiang a om hileh chi nang e! A phakna a na hihdamsak ding hi a” a chi hi.

⁴Mi khat a valut a, a toupa kiang ah, “Israel gam a numei naupang nou in huchibang khachi bang in a gen” chi in a pu a hilh hi.

⁵Suria kumpipa’n “Vahoh hen aw, Israel kumpipa kiang ah lai ka khak ding” a chi hi. Huchi in a pawt a, dangkasik talent sawm leh, dangkaeng khal sang guk leh silhlehten kikhenna ding sawm a keng hi.

⁶Huailai in Israel kumpipa a vapia a, huai ah hiai a kigelh hi. “Hiai lai na mu dia, ngai in, ka sikha Naaman a phakna na hihdam sak din na kiang ah k’on sawl hi” chih.

⁷Israel kumpipa’n huailai a sim a, hichi ahi a, a puan a botkek a, “Mite that thei a, hingsak nawn thei Pathian hia ka hih? Hiai mi in phak hihdam dia ka kiang ah a honsawl mawkmawk. Ngaihtuah unla, ka tung ah thusia a zong hi, chih theidih ua” a chi hi.

⁸Pathian mi Elisha in Israel kumpipa’n a puan a botkek chih a na zak in, hichi ahi a, “Bangdia na puan botkek na hia? Ka kiang ah hongpai leh a ke, huchi in Israel gam ah zawlnei a om chih a theimai ding” va chi din kumpipa kiang ah mi a sawl hi.

⁹Huchi in Naaman a sakolte leh a kangtalaite toh a vahoh a, Elisha inn kongbul ah a va ding hi.

¹⁰Elisha in, “Jordan lui ah sagihvei va kisil inla, na sa in ngeina a pu nawn dia, huchi in na siangta ding” chi din mi a sawl hi.

¹¹Himahleh, Naaman a heh mahmah a, a paikhia a, “Ngai un, amah mah ka kiang a hongpawt dia, a hongding dia, TOUPA a Pathian min a sam dia, ka phakna tung ah a khut a koih dia, ka phak damsak ding eive, chimah hiveng in, a chi hi.

¹²Damaska khaw luite Abana leh Pharpar Israel gam lui tengteng sang in a hoihzaw ka hia? Huaite a kisil in ka siangthou theikei dia hia?” a chi hi. Huchi in a kilehhei a, heh mahmah in a pai hi.

¹³A sikhate’n a vanaih ua, a va houpih ua, “Ka pa aw, zawlnei in thil haksatak hon hihsak dek lehleng na hihmai kei dia hia? Va kisil inla, hong siangthou in, a chih pen hihzawk tuaklua hilou maw?” a chi uhi.

¹⁴Huchi in a hohsuk a, Pathian mi gen bang in Jordan lui ah sagihvei a va kidiaha; huchi in a sa naungek sa bang a hong hinawn a, a hongsiangta hi.

¹⁵Amah leh a heu tengteng Pathian mi kiang ah a kiknawn ua, a ma ah a va ding uhi. Aman “Ngai in, Israel ah loungal leitung tengteng ah Pathian a na omkei, chih ka theita. Huaiziak in, tuin na sikha vualzawlna la din k’on ngen” a chi hi.

¹⁶Himahleh aman “A kiang a ka omna TOUPA hinna lou in ka gen hi. Bangmah ka lakei ding” a chi hi. Huchi in aman la din a ngen a; himahleh a la utkei bikbek hi.

¹⁷Naaman in, “Ahihkeileh, kei na sikha sabiltung nih puak khop leitang hon lasak in. Tuban siah kei na sikha in TOUPA kiang kia ah ngallou haltum thillat leh kithoihna himhim pathian dangte kiang ah ka lan nawn hetkei ding hi.

¹⁸Hiai thil ah TOUPA’N na sikha ngaidam hen. Rimmon inn a be dia ka ban a kingai a ka toupa a lut chiang a, keileng ka kunsam a ngaih chiang in TOUPA’N hon ngaidam hen” a chi hi.

¹⁹Aman a kiang ah, “Lungmuangtakin pai in” a chi hi. Huchi in a kiang apan a pawt a, gamla lou a paikhe man hi.

²⁰Himahleh Pathian mi Elisha sikha Gehazi in, “Ngai in, ka pu in Suria mi Naaman thil hontawite la hetlou in a paisak mawka. TOUPA hinna lou in ka gen hi, ka vadelh dia, a neih banghiam bek ka vala ding” a chi hi.

²¹Huchi in Gehazi in Naaman a delhta hi. Naaman in kuahiamin a delh a muh in, na houpih din kangtalai apan a kumkhia hi. “Hoihvek na maw?” a chi hi.

²²Aman, “Hoihvek mah e. Ka pu in, Ngai in, tumah in Ephraim tang gam apanin zawlneite tapate lak a tangval nih ka kiang ah a hong ua, amaute dangkasik talent khat leh puansilh kikhenna ding nih pia in” chih gen ding in a hongsawl hi” a chi hi.

²³Naaman in, “ Khamuang inla, Talent nih lave” a chi hi. Huchi in ladin a ngen a, dangkasik talent nih puansilh kikhenna ding nih toh ip nih ah a thuna, a sikhate nih a pawsaka, a ma ah a paipihta uhi.

²⁴Tang a vatun un a laksaka, inn sung ah a koih a; huchi in mite a paisakta hi.

²⁵Amah a lut a, a pu ma ah a va ding hi. Elisha in a kiang ah, “Koi a hong kipan na hia, Gehazi?” a chi hi. Aman, “Na sikha koimah ah ka hohkei” a chi hi.

²⁶Aman a kiang ah, “Nang mu dia kangtalai apan huai mi a hong kumlai in ka lungtang na kiang ah a paikei maw? Sum, puansilhte, olive huante, grephuante, belamte, bawngtalte, sikhapate leh sikhanute lakhun ahi ahia?

²⁷Huaiziak in, Naaman phak nang ah a belh dia, tangtawn in na suante ah leng a belh ding” a chi hi. Huchi in a omna apan vuk bang a ngouin phaksa in a paikheta hi.