Read Paite Chin 2 KUMPIPATE 6 Bible Online

2 KUMPIPATE 6 - Paite Chin bible

2 KUMPIPATE 6

¹Huan, zawlneite tapate’n Elisha kiang ah, “En in, hiai mun na kiang a ka tenna uh kou adin a kawchik lua hi.

²K’on ngen uh. Jordan lui ah kahoh suk ding ua, huai ah sing ka vala chiat ding ua, ka tenna ding uh huai ah ka valam ding uh aw?” a chi uhi. Aman a dawng a, “Kuan ve ua” a chi hi.

³Mi khat in, “Na sikhate kiang ah hohsam in” a chi hi. Aman, “Hohsam leng a kei dia” chi’n a dawng hi.

⁴Huchi in a kiang uah a hohsamta hi. Jordan lui a tun un sing a phuk uhi.

⁵Mi khat in a phuk sanlai in, a heitang tui ah a kia hi. Aman, “Maizen! Pu, mi a kikhel eive” chi’n a kikou hi.

⁶Pathian mi in “Koilai ah ahia a kiak?” a chi hi. Aman a kiakna mun a ensak hi. Huchi in sing hiang khat a sat a, huai ah a pailut a, sik a hong kilam hi.

⁷Aman, “Tawm aw leh” a chi a; huchi in a sawk a, a tawmta hi.

⁸Suria kumpipa’n Israelte a hong dou a, huai mun ah giahphual ka sat ding, chi’n a sikhate thu a kum hi.

⁹Pathian mi’n Israel kumpipa kiang ah, “Huchibang mun a hoh lou din pilvang in. Huai ah Suriate a hongsuk ding uh” chi’n mi a sawl hi.

¹⁰Israel kumpipa’n Pathian mipa’n a na hilhna mun mi a va enkhesak zel hi. Huai ah nihvei khatvei phetlou in, a na kihumbit zel hi.

¹¹Huchi in huai thu ah Suria kumpipa lungtang a mangbang gawp hi. A sikhate a sam a, a kiang uah, “I lak ua mi a kua ahia Israel kumpipa lam a pang? N’on hilh kei ding ua hia?” a chi hi.

¹²A sikhate lak a mi khat in, “Kuamah pang kei ve ung e, kumpipa, ka toupa aw. Israel gam a om zawlnei Elisha in na dantan sunggil a na gente Israel kumpipa a na hilh zel ahizaw hi” a chi hi.

¹³Aman, “Koi a om ahia va zong un, ka va mansak ding” a chi hi; “Ngai in, Dothan ah a om” chi’n a hilh uhi.

¹⁴Huchi in sakolte, kangtalaite leh sepaih tampite huai ah a sawl a, zan in a vahoh ua, khua a um kim vel uhi.

¹⁵Pathian mi sikha zingkhang in a thou a, a va pawt khiak leh, ngai in, sepaihte’n sakol leh kangtalaite toh khua a na umsuakta uh. Sikha in a kiang ah, “Maizen! Pu aw, bang i chihta dia le?” a chi hi.

¹⁶Aman, “Lau ken; amau lam a pangte sang in ei lam a pangte a tam zaw hi” a chi hi.

¹⁷Huchi in Elisha a thum a, “TOUPA, a muh theihna din a mit vaksak in” a chi hi. TOUPA’N huai tangval mit a vaksak a; huchi in a mu samta a; ngai in, Elisha kimvel a mualte mei kangtalai leh sakol in a dim vekta hi.

¹⁸Amah lam a a hong paisuk uleh TOUPA kiang ah Elisha a thum a, “Hiai mite mit tawsak in” a chi hi. Huchi in Elisah thu bang in a mit uh a tawsakta hi.

¹⁹Elisha in a kiang uah, “Hiai lampi ahi kei, hiai leng khua ahi sam kei. Kei honzui un, na mi zonpa uh kiang ah k’on pi ding” a chi hi. Huchi in Samaria khua ah a pita hi.

²⁰Samaria khaw sung a tun un hichi ahi a, Elisha in, “TOUPA, hiaite’n a muh theihna ding un a mit uh vaksak in” a chi hi. Huchi in TOUPA a mit uh a vaksak a, a muta ua; ngai in, Samaria khaw sung ah a na omta uhi.

²¹Israel kumpipa’n amau a muh in Elisha kiang ah, “Ka Pa aw, ka that diam? Ka that diam?” a chi hi.

²²Aman a dawng a, “That ken; na namsau leh na thalpeu in na salmatte na that dia hia? Tanghou leh tui a ma uah lui inla, ne in dawn uhenla, a pu uh kiang ah pai kiknawn uhen” a chi hi.

²³Huchi in nekding thupi mahmah a bawlsak a; a nek ua a dawn khit un a paisak vek ua, a pu uh kiang lam ah a pai nawn uh. Huchi in Suria pawlte Israel gam ah a hong nawnta kei uhi.

²⁴Huai nung in hichi ahi a, Suria kumpipa Benhadad in a sepaih tengteng a kaikhawm a, Samaria khua a va umta hi.

²⁵Samaria khua ah kial a nasa mahmah a, ngai in, sabiltung lutang dangka sawmgiat in a khot uh leh begap kab mun li a khen mun khat dangka nga a lei ahihtan hial un, khua a um bikbek hi.

²⁶Israel kumpipa kulhdawn a a pailai in numei khat in, Aw kumpipa, ka toupa, honhuh in, chi’n a na sam hi.

²⁷Aman, “TOUPA’N a hon panpih ngal kei leh ken koi apan in ahia k’on panpih ding? Buhphual ahihkeileh grep sukna khuk apan in maw?”

²⁸Kumpipa’n a kiang ah, “Bang na chi a ahia awi?” a chi nawn hi. Aman a dawng a, “Hiai numei in ka kiang ah, Tuni in na tapa i nek din hon thoh ve, zingchiang in ka tapa i ne na keidia, a chi hi.

²⁹Huchi in ka tapa ka huan ua, ka ne uh. A zing in ken a kiang ah, Na tapa i nek din hon thohsam in, ka chi hi. Aman a tapa a selgu maimah hi” a chi hi.

³⁰Kumpipa’n numei thugen a zak in hichi ahi a, a puan a botkek a; kulh dawn a a pailai ahi a; mipite’n a et uleh, ngai in, a sa tung ah saiip puan a na silh nilouh hi.

³¹Huchi in aman, “Tuni a Saphat tapa Elisha in a lutang a puak lai peuhmah leh Pathian in a lohloh in honloh mai hen, huai sang a leng thupizaw in” a chi hi.

³²Elisha a inn ah a tu a, upate leng a kiang ah a tu sam uh. Kumpipa’n a kiang ah mi khat a sawl a, himahleh a misawl a kiang a tun ma in upate kiang ah, “Hiai tualthatpa tapa in ka lu la din mi a honsawl, chih na thei na uhia? Pau kei dih ua, a misawl a hongtun chiang in, kong na khak unla, kongkhak in na dal bikbek un. A nung ah a pu kalsuan ging a kiza kei maw?” a chi hi.

³³Huchi a amau a houpih sanlai in, ngai in, a mi sawl a hong tungsuk hi. Ngai in, kumpipa’n “Hiai thil hoihlou TOUPA honsawl ahi; TOUPA bangdi’n ka hungaih lailai dia?” chi ahi, a chi hi.