Read Paite Chin 2 KUMPIPATE 7 Bible Online

2 KUMPIPATE 7 - Paite Chin bible

2 KUMPIPATE 7

¹Elisha in, “TOUPA thu na za un. TOUPA’N hichi in a chi. Zingchiang hiai hun ding vel in Samaria kulh kongpi bul ah tangbuang nel tehna khat sekel khat in a khong ding ua, barli buh tehna nih sekel khat in” chi’n, a gen hi.

²Heutu khat kumpipa’n a khut a ngaknapa’n Pathian mi a dawng hi. “Ngai in, TOUPA’N van ah tohlette bawl leh leng hiai bang ahi thei mahmah dia hia?” a chi hi. Aman, “Ngai in, na mit in na mu dia, himahleh na nekei ding” a chi hi.

³Huailai in kulh lutna kongpi bul ah phak li a om uhi. Amau, “Bangdia sih ngak lel a tu nilouh i hi ua?

⁴Khopi sung ah lutni, chi leng, khopi sung kial a, huai a vasi mai ding hang a; hiai ah tu nilouh le hang lah, si thouthou ding hang a; huaiziak in tuin paini, Suria sepaihte kiang ah i valut peuhmah ding uh. A hon na hinghawi uh leh i hing dia; a hon na thah uh leh si i hi maike” chi’n a kihou uhi.

⁵Huchi in Suriate giahphual a hoh din khomui in a kuan uhi. Suriate giahphual tuah masak a vatun un, ngai in, kuamah a na omkei uhi.

⁶Toupa’n Suria sepaihte kangtalaite husa, sakolte husa leh sepaih tampi husa a na zasak hi. Huchi in, “Ngai un, Israel kumpipa’n Hit kumpipate leh Aigupta kumpipate ei hong dou dia guai eive” chi’n a kihou uhi.

⁷Huchi in a thou ua, khomui in a taikekta uh. A puaninte uh, a sakolte uh, a sabiltungte uh leh a giahphual uh a om ngeingei in a taisan ua, a taikekta uhi.

⁸Huai mi phakte giahphual tuah masak a vatun un puanin khat ah a lut ua, ne in a dawn uh. Dangkasik, dangkaeng leh puansilhte a la ua, a sel ua; a nung kiknawn ua, puanin dang ah a lut nawn ua, huai a leng a la ua, a sel uhi.

⁹“A denchiang in, i hihdik hetkei. Tuni tanchin kipahhuai tun ni ahi a, ei i daidide ua; khovak i ngak uleh gawtna i tuak ding uh. huaiziak in, kisa ni, kumpipa inkawte i va hilh ding uh” chi’n a kihou uhi.

¹⁰Huchi in khopi kongkhak vengmi a va sam ua; “Suriate giahphual ah ka va hoh ua, ngai in, kuamah a na omkei ua, mihing husa himhim leng a omkei, sakolte leh sabiltungte kia a na kikhih a, puaninte leng a om ngeingei in a na om uhi” chi’n a hilh uhi.

¹¹Kongkhak vengmite a sam a; amau kumpipa inn sung a mite a vahilh uh.

¹²Kumpipa zan in a thou a, a sikhate kiang ah, “Suriate hon bawldan k’on hilh ding. I gilkial dan uh a thei uh. Huaiziak in, khopi apan a hongpawt uleh a hing in i na man ding ua, khaw sung ah i lut ding uh, chi in gamlak a kibu dia a giahphual uh pawt khiak san ahi uh” a chi hi.

¹³A sikhate lak a khat in a dawng a, “Khopi a omsun sakol nga va pisak inla, ngai in, Israel mipi a damlai tengteng Israel mipite si bang a sehte ahi himhim uhi; huchi in amaute sawl in enkhia ni” a chi hi.

¹⁴Huchi in kangtalai kai sakol nih a pi ua; kumpipa’n, “Va en dih ua” chi’n, Suria sepaihte delh din a sawl hi.

¹⁵Jordan lui pha in a vadelh ua; ngai in, Suriate’n a kin ziak ua a paih uh puansilhte leh vante lamtawn in a om zelzul hi. Huchi in a mi sawlte a hong kiknawn ua, kumpipa a honghilh uhi.

¹⁶Huchi in mipi a pawtkhia ua, Suriate giahphual a valok uhi. Huchi in TOUPA thu bang ngei in tangbuang nel tehna khat Sekel khat in a khong ua, barli buh tehna nih Sekel khat mah in.

¹⁷Kumpipa’n sepaih heutu, a khut a ngakpa kulh kongpi vengmi in a sep hi. Mipite’n a kulh kongpi bul ah a chil uhi, Pathian mi’n a kiang a kumpipa a hong paisuklai a, a na gen bang in a sita hi.

¹⁸Hichi ahi a, Pathian mi’n kumpipa kiang a, Zingchiang hichih hun ding vel in Samaria kulh kongpi bul ah “Barli buh tehna nih Sekel khat in a khong ding ua, tangbuang nel tehna khat sekel khat mah in,” a chih a;

¹⁹sepaih heutu in Pathian mi dawng a, “Ngai in, TOUPA’N van ah tohlette bawl leh leng, huchibang ahi thei dia hia?” a chih a, aman, “Ngai in, na mit in na mu ngei dia, himahleh na ne kei ding” a chih bang in;

²⁰Huchibang in a tung ah a hongtungta hi; mipi’n kulh kongpi bul ah a chil ua, a sita hi.