Read Paite Chin 2 KUMPIPATE 8 Bible Online

2 KUMPIPATE 8 - Paite Chin bible

2 KUMPIPATE 8

¹Huan, Elisha in a tapa a hihdamsak numei kiang ah, “Thou inla, nang leh na inkawte na om theihna munmun uah va kialtai tadih un. TOUPA’N lah kial a kesak ngal a, hiai gam ah kum sagih sung kial a ke ding” a chi hi.

²Huchi in numei a thou a, Pathian mi thugen bang in a hih a; a inkawte toh Philistiate gam ah kum sagih a va kialtai uhi.

³Kum sagih a hong kivei nung in hichi ahi a, huai numei Philistiate gam apan a kiknawn a; a inn leh lou ngen din kumpipa a zuan hi.

⁴Kumpipa’n Pathian mi sikha Gehazi a houpih a, “Elisha in thil thupi a hih tengteng honhilh dihve” a chi hi.

⁵A sisa mi khat a hinsak nawn thu kumpipa a na hilhlaitakin hichi ahi a, ngai in, a tapa a hinsak nawn numei in a inn leh lou kumpipa kiang ah a hong ngen hi. Gehazi in, “Ka toupa, kumpipa aw, hiai numei ahi, hiai ahi a tapa, Elisha in a hinsak nawn” a chi hi.

⁶Kumpipa’n numei a dot leh a hilh hi. Huchi in kumpipa’n heutu khat a sehsak a, “Amah a tengteng, a lou a thilpiang tengteng tan in, hiai gam a pawt khiak san apan tuni tan a teng penawn vek un” a chi hi.

⁷Elisha Damaska khua ah a hoh a; Suria kumpipa Benhadad a chi a na hi. “Pathian mi hiai ah a hongve” chi’n a hilh uh.

⁸Kumpipa’n Hazael kiang ah, “Thilpiak tawi inla, Pathian mi houpih din vahoh inla, ka chinatna apan ka hoih khenawn thei diam, Toupa hon na dotsak leh” a chi hi.

⁹Hazael amah houpih din a kuan a, thilpiak ding Damaska khua a thil hoih chiteng, sangawngsau sawmli puak khop a tawi a, a ma ah a va ding a, “Na tapa Benhadad, Suria kumpipa in, ka chinatna apan ka hoih khenawn diam chidin na kiang ah kei a honsawl hi” a chi hi.

¹⁰Elisha in a kiang ah, “Pai nawn inla, a kiang ah, na hoihkhe nawn na mah ke, a chi ve, va chi in. Himahleh a taktak in bel a si ngeingei ding chih, TOUPA’N a hon theisak hi” a chi hi.

¹¹Huchi in amah adia zumhuai khop in Elisha in a ensal gegu a; huchi in Pathian mi a kapta hi.

¹²Hazael in, “Bangdia ka toupa kap ahia?” a chi hi. Aman a dawng a, “Israel suante tung a na thil hoihlou hih ding ka theih ziak in ahi. A kulhte uh na hal dia, a tangvalte uh namsau in na that dia, a tanu neu chikchikte na paizan dia, naupai lai a numeite uh na pik kek ding” a chi hi.

¹³Hazael in, “Kei na sikha ui leltak in hiai thil thupi hihthei ding ka hi mahmah ahia?” a chi hi. Elisha in a dawng a, “Suriate tung ah na honglal ding chih TOUPA’N a hon theisak hi” a chi hi.

¹⁴Huchi in Elisha kiang apan a pawt a, a pu kiang ah a paita hi. Aman, “Elisha in bang a hon na hilh a?” a chi hi. Aman, “Na hoih khenawn na tham ding, chi in a honhilh” a chi hi.

¹⁵A zing in hichi ahi a, puansahpi khat a la a, tui ah a diah a, a mai a khuhsak a, huchi in a sita a; a sik in Hazael a lalta hi.

¹⁶Israel kumpipa Ahab tapa Joram kum nga a lal kum in huailai in Jehosaphat bel Judah kumpipa ahi, Judah kumpipa Jehosaphat tapa Jehoram a lal pan hi.

¹⁷A lal patlai in kum sawmthum leh nih a upa ahi a; Jerusalem khua ah kum giat vai a hawm hi.

¹⁸Ahab inkawte bang in, Israel kumpipate lampi tot a tawn a; Ahab tanu zi in a nei hi. Huchi in TOUPA mitmuh in thil hoihloupi a hih hi.

¹⁹Himahleh TOUPA’N a sikha David ziak in Judah gam a hihse nuamkei a, a suante tan a khawnvak neihsak gige a na chiamtak ziak in.

²⁰A damlai in Judahte tung ah Edomte a hel ua, a tung ua kumpipa ding a ki bawltawm uhi.

²¹Huchi in Joram bel Zair ah kangtalai tengteng toh a hoh hi. Zan in a kisa khia a, amau um Edomte leh a kangtalai tung ua heutute a va sualta hi. Huchi in mite a puaninte uah a tai uhi.

²²Edomte tunitan in Judahte tung ah a hel lailai uhi. Huai hun mah in Libnah leng a na helsam uhi.

²³Jehoram tanchin dangte leh a thilhih tengteng Judah kumpipate lal lai thugelhna bu ah a ki gelh keimaw?

²⁴Huchi in Jehoram a pi leh pute kiang ah a ihmuta a, a pi leh pute lak ah David khopi ah a vui ua; a sik in a tapa Ahaziah a lalta hi.

²⁵Israel kumpipa Ahab tapa Joram lal kum sawmlehnih kum in Judah kumpipa Jehoram tapa Ahaziah a lal pan hi.

²⁶Ahaziah in vai a hawmpat in kum sawmnih leh nih a upa ahi. Jerusalem ah kum khat vai a hawm hi. A nu min Athaliah ahi a, amah Israel kumpipa Omri tanu ahi.

²⁷Ahab inkawte lampi tot a tawn sam a, Ahab inkawte hih bang in TOUPA mitmuh in thil hoihlou a hih hi; Ahab inkawte makpapa a hih ziak in.

²⁸Amah Ahab tapa Joram in Ramoth a Gilead khua a Suria kumpipa Hazael a va douna ah a pangsam hi. Suriate’n Joram a na hihliam uhi.

²⁹Kumpipa Joram Suria kumpipa Hazael a douna ua Suriate’n Ramah khua ah a na hihliam uh, Jezreel khua a kidamsak din a kiknawnta hi. Judah kumpipa Jehoram tapa Ahaziah Ahab tapa Joram a damlouh ziak in veh din Jezreel khua ah a hohsuk hi.