Read Paite Chin 2 KUMPIPATE 9 Bible Online

2 KUMPIPATE 9 - Paite Chin bible

2 KUMPIPATE 9

¹Huan, zawlnei Elisha in zawlneite tapate lak a khat a sam a, a kiang ah, “Na puan teng inla, hiai sathau bawm tawi inla, Ramoth a Gilead khua ah va hoh in.

²Na vatun chiang in Nimshi tapa Jehosaphat tapa Jehu va zongkhia inla; valut inla, a unaute lak apan sam khia inla, dantan sunggil ah lut pih in.

³Huchi in sathau bawm la inla, a lu ah sung inla, TOUPA’N hichi in a chi. Israelte tung a kumpipa din sathau k’on nilh hi, chi in. Huchi in kong hong inla, taikhia in, om sawt ken” a chi hi.

⁴Huchi in tangval, zawlnei tangvalpa Ramoth a Gilead khua ah a hohta hi.

⁵A vatun leh ngai in, sepaih heutute a tukhawm ua; aman, “Sepaih heutu, na kiang a gen ding thukhah ka nei,” a chi hi. Jehu in, “Kua pen kiang ah eita?” a chi hi. Aman, “Nang kiang ah, sepaih heutupa” a chi hi.

⁶A thou a, inn ah a lut a; a lu ah sathau asung a, a kiang ah, “TOUPA, Israelte Pathian in hichi in a chi. TOUPA mipite, Israelte tung a kumpipa din thau k’on nilh hi.

⁷Ka sikha zawlneite sisan leh TOUPA’N sikha tengteng sisan phu Jezebel tung a ka lak theihna din na pu Ahab inkawte na that ding hi.

⁸Ahab inkaw tengteng a mangthang vek ding uh. Ahab apan pasal taphot Israel gam a zalen hin sikha hita leh ka hihmang ding hi.

⁹Ahab inkawte Nebat tapa Jeroboam inkawte leh Ahijah tapa Baasha inkawte bang in ka bawl ding hi.

¹⁰Uite’n Jezreel khaw kulh zul ah Jezebel a ne ding ua, amah vui ding mi a omkei ding” chi’n, a chi hi. Huchi in kong a hong a, a taikheta hi.

¹¹Huchi in Jehu bel a toupa sikhate kiang ah a hongpawt a; khat in a kiang ah, “Hoihlam thu hia? Huai mihaipa koi apan na kiang a hong ahia?” a chi hi. Aman a kiang ah, “Huai mi na thei ua; a thugen leng na thei uh” a chi hi.

¹²Amau “Thei maizen dia, tun honhilh in” a chi uh. Aman, “Hichibang in a honchi ahi: ‘TOUPA’N hichi in a chi. Israelte tung a kumpipa din sathau k’on nilh hi’ ” a chi hi.

¹³Huchi in michih in a puan uh a suah somsom ua, kailawn tung ah a phahsak chiat ua, “Jehu kumpipa ahita ” chi’n pengkul a mutta uhi.

¹⁴Huchi in Nimshi tapa Jehosaphat tapa Jehu in Joram thahna ding a guksawm hi. Suria kumpipa Hazael ziak in Joram leh Israelte tengteng in Ramoth a Gilead khua a veng uhi.

¹⁵Kumpipa Joram Suria kumpipa Hazael toh a kidouna ua Suria mite’n a sukliam uh Jezreel khua a kidamsak din a kiknawn hi. Huchi in Jehu in, “Kei lam a pang na hih uleh kuamah Jezreel khua a hiai thu gen di’n khua apan paikhe sak kei un” a chi hi.

¹⁶Huchi in Jehu bel kangtalai ah a tuang a, Jezreel khua ah a hoh a, Joram huai ah a lum hi. Judah kumpipa Ahaziah leng Joram veh din a hohsuk hi.

¹⁷Jezreel kulh ah galvilmi ading a, Jehu pawlte amah toh hongpai a mu a, “Mi tampi ka mu” a chi hi. Joram in, “Sakol tungtuang mi amau vadawn din sawl inla, Hoihlam thu hia?” va chi uhen, a chi hi.

¹⁸Huchi in mi khat sakol tung a tuang amau dawn din a kuan a, Kumpipa’n hichi in a chi: “Lemna thu toh hongpai na hi hia? a chi hi. Jehu in, Lemna thu toh hongpai leng, nang na theih ding bang a om a? Ka nung ah pai in” a chi hi. Galvilmi’n, “I misawl a kiang uh a vatung a, himahleh a hong kiknawn hetkei mawk” chi in a hilh hi.

¹⁹Huchi in mi khat sakol tung a tuang a sawl nawn a, huai mi leng a kiang uh a va tung a, Kumpipa’n hichi in a chi: “Lemna thu toh hongpai na hi hia?” a chi hi. Jehu in a dawng a, “Lemna thu toh hongpai leng, nang na theih ding bang a om a? Ka nung ah pai in” a chi hi.

²⁰Galvilmi leng a kiang uh a va tung a, amah leng a hong kiknawn hetkei mawk hi. “Huai kangtalai a kihawl dan leng Nimshi tapa Jehu hawl dan geih ahi; mihai bang mai in a hawl hi” a chi hi.

²¹Joram in, “Kimansak un” a chi a; kangtalai a kimansakta uh. Huchi in Israel kumpipa Joram leh Judah kumpipa Ahaziah amau kangtalai tuaktuak in a va pawtkhia ua, Jehu tuak din a taikhia ua, Jezreel mi Naboth huan ah a va mu uhi.

²²Joram in Jehu a muh in hichi ahi a, “Lemna toh hongpai na hia, Jehu?” a chi hi. Aman a dawng a, “Na nu Jezebel angkawmna leh bumna a tamlai teng bangchi’n lemna a omthei dia?” a chi hi.

²³Joram a kihei a, a tai a, Ahaziah kiang ah, “Kikhem a kilehbawlna om eive, Ahaziah” a chi hi.

²⁴Jehu in a thalpeu a theihtawp in a lai a, Joram liang leh liang kikal ah a kap a, thaltang in a lungtang a pailet a, a kangtalai sung ah a puklut hi.

²⁵Huchi in Jehu in a sepaih heutu Bidkar kiang ah, “Dom inla, Jezreel mi Naboth huan ah paikhia in. Tuma lam a nang toh a pa Ahab nung a i tuankhawm lai a TOUPA’N hiai puakgik a tung ah a nga hi.

²⁶TOUPA’N zan in Naboth sisan leh a tapate sisan ka muh ngei ahi” a chi hi. “TOUPA’N, hiai mun ngei ah k’on thuk ding” a chi nawn hi. Huchi in “TOUPA thu bang in dom inla, hiai mun ngei ah paikhia in” a chi hi.

²⁷Himahleh Judah kumpipa Ahaziah in huai a muh in huan in lampi ah a tai hi. Jehu in a delh a, “Amah leng huai kangtalai sung ah that un” a chi hi. Huchi in Ibleam kiang, Gur zottouhna ah a sat uhi. Meggiddo khua ah a tailut a, huai ah a sita hi.

²⁸A mite’n Jerusalem khua ah kangtalai in a paipih ua, amah han ah, a pi leh pute lak ah David khopi ah a vui uhi.

²⁹Ahab tapa Joram kum sawmlehkhat a lal kum in Ahaziah Judahte tung ah a lal pan hi.

³⁰Jehu Jezreel khua ah a valut chih Jezebel in a naza hi. Huchi in a mitte a nuh a, a sam a zem a, tohlet ah a na dak khia hi.

³¹Jehu kulh kongpi a, a honglut laitak in, “Na pu thatpa nang Zimri, lemna thu toh hongpai na hi hia?” a na chi hi.

³²Tohlet lam nga in amah a daktou a, “Kei lam a pang kuakua na om ua? Kua?” a chi hi. Michilgeh nih hiam, thum hiam amah lam nga in a hong dak khia uhi.

³³Aman “Hon lawnkhia un” a chi hi. Huchi in a lawnkhia ua; a si khenkhat in bang leh sakolte a theh nengnung a; aman lei ah a khe in a na chil hi.

³⁴Huchi in a lut a, ne in a dawn a; “Hamse thuaknu vadom unla, vavui un, kumpipa tanu lah ahi ngal a” a chi hi.

³⁵Vui din a kuan ua; himahleh a luguh, a khebomte leh a khutpek bomte kia loungal a mu kei uhi.

³⁶Huchi in a hongpai nawn in a honghilh uh. Aman, “Hiai TOUPA’N a sikha Tishbi mi Elijah zang a, Jezreel kulhchin ah uite’n Jezebel a ne ding ua;

³⁷Jezebel luang Jezreel khaw kulhchin a huan a ekchim bang ahi dia, huchi a, hiai Jezebel eive, a chih louhna ding un, chi a a gen ahi” a chi hi.