Read Paite Chin 1 KRONIKIL 10 Bible Online

1 KRONIKIL 10 - Paite Chin bible

1 KRONIKIL 10

¹Philistia mite’n Israel a dou ua; huchi in Israel mite Philistia mite ma ah a taikek ua, Gilboa mual ah thahgam in a om uhi.

²Philistia mite’n Saul leh a tapate a delh vengveng ua; Philistia mite’n Jonathan, Abinadab leh Malkisua, Saul tapate a that uhi.

³Huchi in kidouna Saul ading in a haksa mahmahta a, thalkapmite’n amah a phata uhi; huan thalkapmite ziak in a lungkham mahmah hi.

⁴Huchih lai in Saul in a galvan pawpa kiang ah, “Na namsau dok khia inla, huai in hondawt pailet in; huchilou in zaw hiai zeksumlouhte hongpai in bawllouh louh in a honbawl kha ding uh,” a chi a. Himahleh a galvan pawpa a utkei; a lau mahmah ngal a. Huaiziak in Saul in a namsau a la a, kisiatnan a neita hi.

⁵A galvan pawpan Saul a sita chih a theih in, huai bangmah in aman leng a namsau kisiatna in a zang a, a sita hi.

⁶Huchi in Saul a sita a, a tapa thumte; huan a inkawte tengteng leng a sikhawmvek uhi.

⁷Guam a om Israel mite tengteng in Sepaihte taikek leh Saul leh a tapate a si uh chih a muh un a khopite uh a nusia ua, a taikekta uhi; Philistia mite a hong ua huaite ah a tengta uhi.

⁸A zingsang in hichi ahi, thahsate puante suah ding a Philistia mite a hong pailai un, Gilboa mual ah Saul leh a tapate a puk uh chih a mu uhi.

⁹Huan amah vante a suah ua, a lutang a la ua, a galvan leng, a milimte uh kiang leh mite kiang ah tanchin puak ding in Philistia mite gamsung ah a khak kimvel vek uhi.

¹⁰Huchi in a galvan a pathiante uh inn ah a koih ua, Dagon biakin ah a lutang a tak uhi.

¹¹Jabesh-gilead tengteng in Saul tung a Philistia mite thilhih tengteng a zak un,

¹²Mi hangsante tengteng a thou ua, Saul luang leh, a tapate luang a vala mang ua, Jabesh ah a honpua ua, Jabesh a tosaw sing nuai ah a guhte uh a vui ua, ni sagih an a ngawl uhi.

¹³Huchi in TOUPA tung a tatlekna hih a, TOUPA thu a zuihlouh a, dawizawl aisansiam thu a dot ziak in Saul a sita hi.

¹⁴Huai a thukan a, TOUPA a kipan thu a kanlouh ziak in: huaiziak in amah a that a, lalgam Jesse tapa David kiang ah a peta hi.