Read Paite Chin 1 KRONIKIL 11 Bible Online

1 KRONIKIL 11 - Paite Chin bible

1 KRONIKIL 11

¹Huchi in Israel tengteng Hebron ah David kiang ah a hong kikhawm ua, “Ngai in, na guh leh na sa ka hi uh.

²Tuma lam in, Saul mahmah kumpipa a hihlai in, Israel pikhia a pilut nang na hi a; TOUPA na Pathian in na kiang ah, Israel ka mite na vak ding a, ka mite Israel tung ah lal na hi ding hi, honchi” a chi uhi.

³Huchi in Israel Upa tengteng Hebron ah kumpipa kiang ah a hongpai ua; huan David in Hebron ah TOUPA ma ah amau toh thukhun a bawlpih a; Samuel khut a TOUPA thu bang in, Israel tung a kumpipa ding in David thau a nilh uhi.

⁴David leh Israel tengteng Jerusalem, huai mah Jebus ahi, ah a hoh ua; huchi in Jebus mite, huai gam a tengte, huai ah a om uhi.

⁵Huchi in Jebus a tengte’n David kiang ah, “Hiai lam a na honglouh ding ahi” a chi ua. himahleh David in Zion kulh muanhuai a la a; huai mah David khopi ahi.

⁶David in, “Kuapeuh Jebus mite that masapen pen a lianpen leh heutu ahi ding” a chi a. Huan Zeruiah tapa Joab a kuantou masapen a, huchi in amah a lianpen a bawl in a omta hi.

⁷David bel kulh muanhuai ah a teng a; huaiziak in David khopi a chi uhi.

⁸Huchi in khopi a bawlsuak vek a, Millo kimvel a kipan nasan in: huchi in Joab in khopi dang a bawlpha vek hi.

⁹David bel a hongthupi semsem a; sepaihte TOUPA a kiang ah a om uhi.

¹⁰Hiaite David neih mi hatte lak a a pipente ahi uh, Israel tungtang a TOUPA thu bangzel a, amah kumpipa dia bawl ding a, Israel tengteng toh, a gamsung a amah lak a a hatna uh taklangte.

¹¹Hiai David in a neih mi hatte zah ahi: Jasobeam, Hakmon mi tapa, sawmthumte lak a pipen; za thumte dou ding in a teipi a lek a khatvei thu in amaute a that hi.

¹²Amah nung in Dodo tapa Eleazar, Ahoh mi, mi hat thumte lak a khat ahi hi.

¹³Pasdammim ah David kiang ah a om a, huai ah kidou tum in Philistia mite a kikhawm ua, barli buh a dimna mun ah; Philistia mite ma a kipan in mite a taikekta uhi.

¹⁴Huchi in huai mun laitak ah ading ua, a hum ua, Philistia mite a that uhi; TOUPA’N zohna thupitak in amau a hondamta hi.

¹⁵Heutu lian sawmthumte lak a thum suangpi a David kiang ah, Adullam kawkhuk ah a hohsuk uhi; Philistia mite tampite’n Rephaim phaizang ah puanin a kai uhi.

¹⁶Huailai in David bel kawhawm sung ah a om a, Philistia mite kulhpi bel Bethlehem ah a om hi,

¹⁷Huchi in David in tui a lunggulh a, “Aw kongpi kiang a om, Bethlehem tuileh tui dawn ding a hongpia mi khat om leh chi nang e!” a chi hi.

¹⁸Huai thumte’n Philistia mite tampi lak a phu paisuak ua, kongpi kiang a om, Bethlehem tuileh a kipan tui a vatawi ua, a honla ua, David kiang a hontun uhi: himahleh David in a dawn nuam kei a, TOUPA adin a bungkhe zaw hi.

¹⁹“Hiai ka hih, ka Pathian in honphal kei hen: a hinna uh lauhuaina a koih hiai mite sisan ka dawn ding hia? Amau lah a hinna uh lauthawnna toh in a hontawi uh ahi ngal ua” a chi hi. Huaiziak in a dawn nuamta kei hi. Hiai thilte huai mi hat thumte’n a hih uhi.

²⁰Abisai, Joab unaupa, huai thumte lak a khat ahi: aman za thumte dou ding in a teipi a lik a amau a that a, mi thumte lak ah min a neita hi.

²¹Thumte lak ah, nihte sang in, amah a zahtakhuai zaw hi huchi in a heutupa ding ua bawl in a om hi: hitamahleh thum masate zaw a pha kei hi.

²²Benaiah Jehoiada tapa, Kabzeel a mi hangsan, thilhih thupite hihpa tapa, Moab a Ariel tapate nihte a that a: a paisuk lai a, vuk kiak lai in kawkhuk lak ah humpinelkai a that hi.

²³Aigupta mi a that a, mi lian mahmah, tong nga a sang; huan Aigupta mi khut a a teipi siamganmi chiam bang ahi; huchi in a kiang ah chiang toh a hohsuk a, Aigupta mi khut a kipan teipi a la a, amah mah teipi in a hihlumta hi.

²⁴Hiai thilte Benaiah Jehoiada tapa in a hih a, huchi in huai mihat thumte lak ah min a nei hi.

²⁵Ngai in, sawmthumte sang in zahtakhuai zaw in a om a, himahleh thum masate zaw a pha kei hi: huchi in David in a galvil heutu in amah a koih hi.

²⁶Sepaih pawlte a mi hatte: Asahel, Joab unaupa, Elhanan Bethlehem a Dodo tapa;

²⁷Sammoth Haror mi, Helez Pelon mi;

²⁸Ira Tekoa mi Ikkes tapa, Abiezer Antoth mi;

²⁹Sibbekai Husat mi, Ilai Ahoh mi;

³⁰Maharai Netophath mi, Heled Netophath mi Baanah tapa;

³¹Ithai Benjamin tate Gibeah a Ribai tapa, Benaiah Pirathon mi;

³²Hurai Gaash luitate a, Abiel Arbath mi;

³³Azmaveth Baharum mi, Eliahba Saalbon mi;

³⁴Gizon mi Hasem tapate, Jonathan Sage Harar mi tapa;

³⁵Harar mi Sakar tapa Ahiam, Ur tapa Eliphal;

³⁶Hepher Mekerath mi, Ahijah Pelon mi;

³⁷Hezro Karmel mi, Naarai Ezbai tapa;

³⁸Joel Nahtan unaupa, Mibhar Hageri tapa;

³⁹Ammon mi Zelek, Beroth mi Naharai, Joab galvan pawmi Zeruiah tapa;

⁴⁰Ira Ithri mi, Gareb Ithri mi;

⁴¹Uriah Hit mi, Zabad Ahlai tapa;

⁴²Adina Reuben mi Siza tapa, Reuben mite lak a pipen leh a kiang a sawmthumte;

⁴³Hanan Maakah tapa, Josaphat Mithni mi;

⁴⁴Uzzia Asterath mi, Shama leh Jehiel Aroer mi Hotham tapate;

⁴⁵Jediael Simri tapa, Joha a unaupa, Tiz mi;

⁴⁶Eliel Mahavi mi, Jeribai, Josaviah, Elnaam tapate, Ithmah Moab mi;

⁴⁷Eliel, Obed, leh Jasiel Mezob mi.