Read Paite Chin 1 KRONIKIL 12 Bible Online

1 KRONIKIL 12 - Paite Chin bible

1 KRONIKIL 12

¹Huchi in hiaite Kish tapa Saul ziak a a ki hepmang lai a Ziklag a David kiang a hongpaite ahi uh: huchi in kidouna a amah panpihmite mi hatte lak ah a om uhi.

²Thalte in a kigalvan ua, suangkap leh thalpeu a thalkap ah khut taklam leh veilam a zangthei ua; amaute Saul unau, Benjamin a kipan ahi uhi.

³A pipen Ahiezer ahi, huan Joash, Gibeah mi Semah tapate; Azmaveth tate Jeziel leh Pelet; Berkah, Antoth mi Jehu;

⁴Gibeon mi Esmaiah, sawmthumte lak a mi hat, sawmthumte tung ah; Jeremiah, Jahaziel, Johanan leh Geerath mi Jozabad;

⁵Eluzai, Jerimoth, Bealiah, Semariah, Sephatiah Haruph mi;

⁶Elkanah, Jesiah, Azarel, Joezer, Jasobeam, Korahith mi;

⁷Joelah, Zebadiah, Gedor a Jeroham tapate. Gad nam a kipan

⁸Gad mite ahihleh gamdai a kulh ah David lam ah a kituamseh ua, mi hangsan, kidouna adia chilsa, lum leh teipi khoih theite; a maitang uh humpinelkaite maitang bang a, mual a sazate bang a kin;

⁹Ezer a pipen, Obadiah a zom, Eliab a thumna;

¹⁰Mismannah a lina, Jeremiah a ngana;

¹¹Attai a gukna, Eliel a sagihna;

¹²Johanan a giatna, Elzabad a kuan a;

¹³Jeremiah a sawmna, Makbannai a sawmlehkhatna.

¹⁴Hiai Gad tapate lak a te sepaihte heutute ahi uh: a neupen za khat toh a kikim a, a lianpen pen sang khat toh.

¹⁵Hiaite Jordan lui piaute tui in a tuplai a, kha khatna a kan a paite ahi ua; huchi in phaizang a om tengteng, suahlam leh tumlam tuaktuak, delhzakte ahi uhi.

¹⁶Benjamin leh Judah tate lak a mi, kulh ah David kiang ah a hong ua.

¹⁷Huchi in amaute tuak ding in David a paikhia a, amaute kiang ah, “Hon panpih dia lemna deih a ka kiang a hong na hih ua leh, nou adin ka lungtang phankhawm ahi ding; himahleh ka khut ah bangmah hiamgamna a omkei chih thei a, ka galte adia kei honman ding a hongpai na hih uleh, ka pipute uh Pathian in huai en henla, sal hen” a chi hi.

¹⁸Huailai in sawmthumte lak a pipenpa, Amasai tung ah kha a hongtung a, “Nang David, Jesse tapa, nang a, nang lam a pang ka hi uh: muanna, na kiang ah om henla, nang hon panpihmite kiang ah muanna: na Pathian in lah nang a hon panpih ngal a,” a chi hi. Huailai in David in amaute a na kipahpih a, pawl heutute ding in a bawlta hi.

¹⁹Manasseh a kipan in leng khenkhatte, kidouna a Saul dou ding a Philistia mite toh a hongpai in David lam ah a pukmang uhi; himahleh amau amaute a panpih kei uh: Philistia mite toupate’n thuhilh in amah a sawlmang ngal ua, i lupente uh lauthawnghuaina ding in Saul, heutupa lam ah a pukmang ding, chi in.

²⁰David Ziklag a a hoh in, Manasseh a kipan amah lam ah hong puklut a om ua, Adnah, Jozabad, Jediael, Mikael, Jozabad, Elihu, Zilthai, Manasseh a kipan sangte heutute ahi uhi.

²¹Huan galguk bawlte dou ding in David a panpih uh: amau lah mihat hangsante leh sepaih lak a heutute ahi ngal ua.

²²Sepaih pawl thupi, Pathian sepaih pawl bang a hong hih masiah uh niteng in David kiang ah amah panpih ding in a hong paikhawm uhi.

²³Hiaite TOUPA thu bang a Saul gam amah adia bawl dia kidou ding a kigalvante huaite lupente Hebron a David kiang a hongpaite ahi uhi.

²⁴Judah tate lum leh teipi tawi theite sang guk leh za giat, kidou ding a kigalvan.

²⁵Simeon tate ah kidouna ding a, mihat hangsante, sang sagih leh za khat.

²⁶Levi tate ah sang li leh za guk.

²⁷Jehoiada bel Aron inkawte pipa ahi a, amah toh sang thum leh za sagih a om uhi;

²⁸Tangval hat hangsan, Zadok, leh a pa inkawte heutu sawmnih leh nih.

²⁹Benjamin tate, Saul unaute, sang thum: amaute lak a thupipen pente’n Saul inkawte lam ah a ginom lailai uhi.

³⁰Ephraim tate ah sing nih leh za giat, mihat hangsan, a pipute uh inkawte a mi minthangte.

³¹Manasseh nam kimkhatte sing khat leh sang giat, hong a, David kumpipa a bawl dia, min a genkhiakte,

³²Issakar tate, hunte theihsiamna nei mite, Israel in bang a hihdia chih thei ding; amaute lupente za nih ahi uh; huan a unaute tengteng uh amau thupiak in a om uhi.

³³Zebulun a kipan, sepaih pawl kuankhe theite bang, kidouna van chichih toh a, kidouna bawl a thupethei sing nga; kidouna bawl a thupe thei, lungsim thuah nih neilou mite.

³⁴Naphtali a kipan heutu sang khat, amaute kiang ah lum leh teipi tawi sing thum leh sang sagih.

³⁵Dan mite kidouna a thupethei, sing nih leh sang giat leh za guk.

³⁶Asher a kipan, sepaih pawl a kuankhe thei, kidouna a thupe thei, sing li.

³⁷Jordan lehlam gal ah, Reuben mite leh, Gad mite, leh Manasseh nam kimkhatte a kipan, kidouna ading a kidouna vanzat chichih toh nuai khat leh sing nih.

³⁸Hiaite tengteng, kidou mi ngen hi in, kidouna thupe thei, lungtang hoihkim toh Hebron ah David Israel tengteng tung a kumpipa dia bawl ding in a hongpai ua: David kumpipa a bawl ding in Israel dang tengteng in lungkhat a pu chiat uhi.

³⁹Huchi in huai ah David kiang a, ne leh dawn in, ni thum a om uh: a unaute un lah amau ading in kisakna a bawl ngal ua.

⁴⁰Huai ban ah Issakar, Zebulun leh Naphtali tanpha a teng amau kiang nai a omte’n, sabiltungte leh sangawngsaute leh sakol neute leh bawngtalte in tanghou a honpua ua, annek ding, theipi gah beute, grep min bomte, uain leh sathau, a tam a tam bawngtalte leh belamte: Israel nopsakna thupi ahi.