Read Paite Chin 1 KRONIKIL 13 Bible Online

1 KRONIKIL 13 - Paite Chin bible

1 KRONIKIL 13

¹Huchi in David in heutu leh makai chiteng, sangte leh zate heutute toh thu a kikum uhi.

²David in Israel kikhawmte tengteng kiang ah, “Hoih na sak ua, TOUPA i Pathian ua kipan ahihleh, mun chiteng a Israel gam tengteng nutsiata om i unaute kiang ah thu i khak ding ua, loupa munte nei a khopite ua a kiang ua siampute leh Levimite om, huchi a i kiang a a hong kikhop khawm theihna ding un:

³Huchi in i Pathian uh bawm i lakik nawn ding uhi: Saul hun lai in i na zong kei uhi” a chi hi.

⁴Kikhawmpi tengteng in huchibang in i hih ding uh a chi ua: mi tengteng mit ah huai thildik ahi ngal a.

⁵Huchi in David in Israel tengteng Aigupta gam luita Sihor a kipan Hamath lutna chiangpha in, Kiriath-jearim a kipan a Pathian bawm vala ding in a mite a kaikhawm hi.

⁶Huchi in David, Israel tengteng toh, Baalah huaibel, Kiriath-jearim ah ahi, huaibel Judah gam ahi a, huai a kipan a Pathian, TOUPA Cherubte tung a tupa, A minlohna om vala ding in a kuantou hi.

⁷Pathian bawm kangtalai thak in a pua ua, Abinadab inn a kipan a lakhia ua: huchi in Uzza leh Ahio in a hawl uhi.

⁸Huchi in David leh Israel tengteng Pathian ma ah a hatna tengteng un late, kaihgingte, pekging guisawm neite, khuangtate, dakkhutbette leh pengkulte toh lopna bawl in a om uhi.

⁹Huan Chidon buhchilna phual a hongtun un, bawngtalte a kisuih man un, Uzza in bawm len ding in a khut in a sawk hi;

¹⁰Uzza tung ah TOUPA hehna a souta a, bawm a a khut a khoih ziak in, amah a hihlumta hi: huchi in Pathian ma ah a sita hi.

¹¹TOUPA Uzza tung a a puahkhap ziak in, David a lungkimkei hi: huchi in huailai tunitan in, Perez-uzzah a chita hi.

¹²Huai ni’n David in Pathian a kihta a, bangchi’n Pathian bawm in ka kitun thei dia? chi in.

¹³Huchi in aman a kiang a, David khopi sung ah bawm a pawlut kei a, Git mi Obed-edom inn sung ah a pawlut zawta hi.

¹⁴Pathian bawm bel kha thum Obed-edom inkawte kiang ah inn sung ah a om a: huchi in TOUPA’N Obed-edom leh, a neih tengteng a vualzawlta hi.