Read Paite Chin 1 KRONIKIL 14 Bible Online

1 KRONIKIL 14 - Paite Chin bible

1 KRONIKIL 14

¹Huchi in Tura kumpipa Hiram in David kiang ah sawltak mite a sawl a, sidar singte, suangsekmite, khutsiammite, inn lamsak ding in.

²David in Israel tung ah TOUPA’N amah kumpipa in a koihkipta chih a thei a, a gam lah, a mi Israelte, sangpi a tawisang in a omta hi.

³David in Jerusalem ah zite tamsem a pi a: huchi in David in tapate leh tanute tamsem a suangta hi.

⁴Hiaite Jerusalem a a neih tate minte ahi; Sammua, Sobab, Nathan, Solomon;

⁵Ibhar, Elisua, Elpalet;

⁶Nogah, Nepheg, Japhia;

⁷Elisama, Beeliada, Eliphalet.

⁸Philistia mite’n David Israel tengteng tung ah kumpipa a thaunilh ahi chih a zak un, David zong ding in Philistia mite tengteng a kuantou ua: David in huai a zak in, amaute dou ding in a kuankheta hi.

⁹Philistia mite a hong ua, Rephaim phaizang a tuam uhi.

¹⁰Huchi in David in Pathian a dong a, “Philistia mite dou ding in ka kuantou diam? Amau ka khut ah na honpe diam?” chi in. TOUPA’N a kiang ah, “Kuantou in; na khut a amau honpe ding ka hi” a chi hi.

¹¹Huchi in Baal-perazim ah a hongtou ua, David in amau a that a; huchi in David in, “Pathian in tuikhah bang in ka khut in ka melmate a hihsia” a chi a. Huaiziak in huai mun min ding in Baal-perazim a sa hi.

¹²Huai ah a pathiante uh a nusia ua; David in thupiak a pia a, mei in a hal uhi.

¹³Huchih nung in Philistiate’n phaizang a tuam nawnlai uhi.

¹⁴David in Pathian thu a dong nawn a; Pathian in a kiang ah, “Amau delh ding in na kuantou kei ding: amau kihei mangsan inla, singtheimi singte zawntak ah amau sual in” a chi hi.

¹⁵“Singtheimi singte dawn a taiging na zak chiang in; huaichiang in kidou ding in na kuankhe ding hi: Philistia mihonte that ding in na ma ah Pathian a kuankheta chihna ahi ding hi” a chi hi.

¹⁶Huchi in Pathian in amah thu a piak bang in David in a hih a: Gibeon a kipan Gezer pha in Philistia mihonpi a thatta uhi.

¹⁷Huan David min, gam tengteng ah a thangkheta a; huchi in TOUPA’N amah launa nam tengteng tung ah a tungsakta hi.