Read Paite Chin 1 KRONIKIL 15 Bible Online

1 KRONIKIL 15 - Paite Chin bible

1 KRONIKIL 15

¹Huchi in David khopi sung ah David in innte a kibawl a; Pathian bawm ading in mun a bawl a, puanin a kaihsakta hi.

²Huailai in David in, Levi mite chihlouh kuamah in Pathian bawm a paw ding ahi kei: TOUPA’N lah amau Pathian bawm paw ding leh tangtawn a amah na sepsak ding in amaute a natelta ngal a, a chi hi.

³A mun a bawlsaksa a TOUPA bawm hon latou ding in, David in Jerusalem ah Israel tengteng a kaikhawmta hi.

⁴Huchi in David in Aron tapate leh Levi mite a khawm a:

⁵Kohath tapate lak ah; Uriel a pipen leh a unaute za leh sawmnih:

⁶Merrari tapate lak ah; Asaiah a pipen leh a unaute za nih leh sawmnih:

⁷Gershom tapate lak ah: Joel a pipen leh a unaute za leh sawmthum:

⁸Elizaphan tapate lak ah; Semaiah a pipen leh a unaute za nih:

⁹Hebron tapate lak ah; Eliel a pipen leh a unaute sawmgiat:

¹⁰Uzziel tapate lak ah; Amminadab a pipen leh a unaute za leh sawmlehnih.

¹¹David in Zadok leh Abiathar siampute, Levi mite, Uriel, Asaiah, Joel, Semaiah, Eliel, leh Amminadab a samsaka,

¹²A kiang uah, “Noute Levi mite pipute inkawte lupente na hi ua: kihihsiang unla, nou leh na unaute uh, mun ka bawlsak sa a Israel Pathian, TOUPA bawm na lak theihna ding un.

¹³A masapen a na puaklouh ziak un, TOUPA i Pathian un i tung uah thuchiam a bawl a, hih ding dan dungzui in amah i zong kei uh” a chi hi.

¹⁴Huchi in siampute leh Levi mite, Israel Pathian, TOUPA bawm latou ding in a kisiangsak uhi.

¹⁵Huchi in Toupa thu bangbang a Mosi in thu a piak bang in Levi tate’n a liangzang uah huai a chiangtawnte in Pathian bawm a zawngta uhi.

¹⁶David in Levi mi pipente kiang ah a unaute uh lasamite tumging theihte toh, pekging guisawm neite leh kaihgingte leh dakkhutbette, ngaihtak a ging leh nuamsa a aw suah ding sepding in a hilh hi.

¹⁷Huchi in Levi mite’n Joel tapa Heman a sep ua; a unaute lak ah, Asaph Berekiah tapa; huan Merari tapate a unaute uh lak ah, Kusaiah tapa Ethan;

¹⁸Amau toh a unaute uh pawl nihnate, Zekariah, Ben, Jaaziel, Semiramoth, Jehiel, Unni, Eliab, Benaiah, Maaseiah, Mattithiah, Eliphelehu, Mikneiah, Obed-edom, Jeiel, kongkhak ngakmite.

¹⁹Huchi in lasamite, Heman, Asaph, Ethen te seh in a omta ua, ngaihtak a tum ding, dal dakkhutbette toh;

²⁰Zekariah, Aziel, Semiramoth, Jehiel, Unni, Eliab, Maaseiah, Benaiah, pekging guisawm neite Alamoth toh kituak a bawl toh;

²¹Mattithiah, Eliphelehu, Mineiah, Obed-edom, Jeiel, Azaziah, kaihgingte Seminith toh bawl, makai ding in.

²²Huan Kenaniah, Levi mite lak a a pipen, lapu in a pang a: a siam ziak in, la hilh in a pang hi.

²³Berekiah leh Elkanah bawm adia kongkhak ngakmite in a om uhi.

²⁴Sebaniah, Josaphat, Nethaneel, Amasai, Zekariah, Benaiah, Eliezer, siampute’n, Pathian bawm ma ah pengkulte a mut ua: Obed-edom leh Jehiah bawm a ding a kongkhak ngakmi in a om uhi.

²⁵Huan David leh Israel Upa, sangte tung a heutute, Obed-edom inn a kipan TOUPA’N thukhun bawm latou ding in nuamsatak in a kuanta uhi;

²⁶Hichi ahi a, Pathian in TOUPA bawm zawng Levi mite a panpih ziak in, amau bawngtal sagih leh belamtal sagih in a kithoih uhi.

²⁷David puanmalngat hoih puanaktual in a kizem a, bawm zawng Levimi tengteng leh, lasamite leh, la heutupa Kenaniah lasamite toh: huchi in David in puanmalngat siampulian puanak a silh hi.

²⁸Huchibang in Israel tengteng in TOUPA thukhun bawm kikou kawm leh, pengkul ging binei toh, pengkulte toh, dakkhutbette toh pekging guisawm neite leh kaihgingte ngaihtak a ging toh, a hon latouta uhi.

²⁹Huan hichi ahi a, TOUPA thukhun bawm David khopi a hongtun in, Saul tanu Mikal tohlet ah a dak khia a, David lam leh mawl a muta a; a lungtang in a musit hi.