Read Paite Chin 1 KRONIKIL 16 Bible Online

1 KRONIKIL 16 - Paite Chin bible

1 KRONIKIL 16

¹Huchi in Pathian bawm a hon lalut ua, David in a bawlsak, puanin laizang ah a koihta uhi: Pathian ma ah haltum thillatte leh lemna thillatte a lan uhi.

²David in haltum thillat leh lemna thillatte a latkhit in TOUPA min in mite a vualzawl hi.

³Israel michih kiang ah, pasal leh numei michih kiang ah tanghou beu khat, sa bak khat, leh grepmin gaw beu khat a hawm hi.

⁴Huchi in TOUPA bawm mai a nasem ding leh TOUPA, Israel Pathian kipahpih ding, kipahthugen ding leh phat ding in Levi mite lak a kuate hiam a septa hi:

⁵Asaph a pipen, amah zawm in Zekariah, Semiramoth, Jeiel, Mattithiah, Eliab, Benaiah, Obed-edom, Jeiel, Pekging guisawm neite leh kaihgingte toh; Asaph dakkhutbette, ngaihtak a ging toh;

⁶Benaiah leh Jahaziel siampute Pathian thukhun bawm ma a, om nilouh louhte toh.

⁷Huchi in huai ni’n David in, Asaph leh a unaute khut ah, TOUPA kiang a kipahthute gen ding a hihkip masa penpen hi.

⁸Aw TOUPA kiang ah kipahthute gen unla, a min lou un; mite lak ah a thilhihte theisak un.

⁹Amah mai ah la sa unla, phatnalate sa un; a nasep lamdangte tengteng thu in houlim un.

¹⁰A min siangthou suang unla: TOUPA zongte lungtang kipak hen.

¹¹TOUPA leh a hatna zong unla; a mel zong nilouhlouh un.

¹²A hihkhitsa a thillamdangte theigige unla; a lamdannate leh, a kam a vaihawmte;

¹³Aw nou a sikha Israel chi, nou a mitel, Jakob tate.

¹⁴Amah TOUPA i Pathian ahi: aman lei tengteng vai a hawm hi.

¹⁵Tangtawn in a thukhun theigige unla, suan sang khatte kiang a a piak a thu;

¹⁶Thukhun Abraham toh a bawl, Isak kiang a a thuchiam;

¹⁷Huai mah thuseh ding in Jakob kiang ah a hihkip a, Israel kiang ah tangtawn thukhun ding in:

¹⁸Na kiang ah Kanaan gam, na goutan tuan, k’on pe ding, chi in:

¹⁹Mi tawmchik phet na hihlai un; ahi, tawmchik mahmah, asung a mikhual in;

²⁰Nam dangdang kiang ah a banhoh ua, gam dangdang a kipan in mi tuamtuamte kiang ah.

²¹Kuamah nuaisiah a phal kei a; ahi, amaute ziak in kumpipate leng a sal hi;

²²“Ka thaunilhte khoih kei unla, ka zawlneite leng hihna kei un,” chi in.

²³Leitung luahte tengteng aw, TOUPA pahtawi in lasa unla, ni teng in a hotdamna thu theisak un.

²⁴Namchih lak ah a thupidan gen unla, michihte lak ah a thilhih lamdangte genzak un.

²⁵TOUPA lah a thupi a, nakpi mahmah a phat ding a hih ziak in pathian tengteng sang a kihtak ding ahi.

²⁶Michih pathiante milim ahi ua; TOUPA’N bel vante a bawl hi.

²⁷Pahtawina leh thupina a ma ah a om a; hatna leh kilawmna a Mun Siangthou ah a om hi.

²⁸Mi chih a chichihte aw, TOUPA kiang ah pia unla, TOUPA thupina leh hatna pia un.

²⁹TOUPA a min thupina pia unla, thillat ding tawi unla, a ma ah hongpai un; siangthou kilawmna in TOUPA bia un.

³⁰Lei tengteng aw, a ma ah ling un; khovel a lin theihlouhna ding in hihkip in a om hi.

³¹Vante kipaktak in om uhenla, lei leng nuamsatak in om hen; namchih lak ah TOUPA’N vai a hawm, chi uhen.

³²Tuipi leh asung a thil om tengteng ging honhon henla; gam leh asung a om tengteng kipaktak in om hen;

³³Huai hun chiang in gamnuai a sing tengteng in TOUPA ma ah nuamsa in la a sa ding ua, lei vaihawm ding in a hong paisin ngal a.

³⁴Aw TOUPA kiang ah kipahthu gen un, amah lah a hoih ngal a; a chitna tangtawn a om ding ahi ngal a.

³⁵Aw, ka hotdamna uh Pathian, hon hondam inla, na min siangthou phat ding leh, na phatna suang ding in, namchih lak a kipan hon pikhawm inla, hon humbit in, chi un.

³⁶Israelte Pathian TOUPA phat in om hen, tangtawn a kipan tangtawn dong in. Mipi tengteng in, Amen, chi in, TOUPA a phatta uhi.

³⁷Huchi in huai a TOUPA thukhun bawm ma a ni teng a a kuldan bangzel a nasem ding in Asaph leh a unaute a koihta a;

³⁸Obed-edom leh a unau uh sawmguk leh giat te toh; Jeduthun tapa Obed-edom leh Hosah bel kongkhakngakmi ahi uhi;

³⁹Huan Zadok siampu leh, a unaute siampute, Gibeon a om mun sang a TOUPA biakbuk ma a,

⁴⁰Zingsang leh nitak a haltum thillat maitam tung a TOUPA adia haltum thillatte lan gige ding in, Israel kiang ah thupiak a piak TOUPA, dansung a kigelh dungzui in;

⁴¹A chitna tangtawn a a om ziak in TOUPA kiang a kipahthu gen ding Heman leh Jeduthun leh midang minloh a telkhiakte toh;

⁴²Heman leh Jeduthun in Pathian lasakna dia vanzatte, pengkulte leh dakkhutbette, ngaihtak a ginsak dingte a nei ua; kongkhakngakmi ding Jeduthun tapate toh.

⁴³Huchi in mipi tengteng amau inlam chiat ah a paita ua; huan David leng a inkawte vualzawl ding in a pai sam hi.