Read Paite Chin 1 KRONIKIL 17 Bible Online

1 KRONIKIL 17 - Paite Chin bible

1 KRONIKIL 17

¹Huan hichi ahi a, David a inn a a omlai in zawlnei Nathan kiang ah David in, “Ngai in, kei sidar sing inn ah ka om a, himahleh TOUPA thukhun bawm puanzak nuai maimah ah a om a” a chi hi.

²Nathan in David kiang ah, “Na lungsim a na vei bangtak in hih in; Pathian na kiang ah lah a om ngal a” a chi hi.

³Huai zan mah in hichi ahi a, Nathan kiang ah Pathian thu a hongtung hi:

⁴“Ka sikha David vahilh in: TOUPA’N hichi in a chi: Ka omna ding in nang inn n’on lamsak ding ahi kei;

⁵Israel suante Aigupta gam a kipan ka pikhiak a kipan tutan in inn lam ah ka omkei a; puanin leh biakbuk ah ka om zel hi.

⁶Israel tengteng toh ka paina himhim uah leng ka mite vak ding a thu ka piak Israelte vaihawmmite kiang ah, bangdia sidar sing inn hon lamsak lou, ka chi ngei ahia?

⁷Huaiziak in ka sikha David kiang ah huchi in gen in: Sepaihte TOUPA’N hichi in a chi: Belam tatna mun a kipan na belam ching lai ka mi Israelte tung a kumpipa ding in ka honla a;

⁸Na paina peuhmah ah na kiang ah ka om zel a, na melmate k’on hih mansak zel hi; lei a mi thupi mahmahte bang in min thupitak k’on bawlsak sin hi.

⁹Ka mi Israelte ading in mun ka sep ding a, kisuan nawn lou a amau tuam mun a a om gige theihna ding un amau ka phut ding hi;

¹⁰Tuma a ka mi Israelte tung a vaihawmmite ka sehlai a thulimlouhna tate’n a hihsek bang un a hihgenthei n’on sam kei ding uh; na melma tengteng leng ka zahlaksak lai ding hi. Huailou leng TOUPA inn kuan khat a hon dinsak ding chih k’on hilh ahi.

¹¹Huchi in na ni a bei a, na pi leh pute kiang a na pai hun chiang in, hichi ahi ding a, nanung a na suan, na tate lak a mi ka tungding ding a; a gam ka hihkip ding hi.

¹²Aman inn a hon lamsak ding a; a mangtutphah tangtawn in ka hihkip ding.

¹³Huchi in a pa ka hi ding a, amah ka tapa ahi ding; ka chitna na ma a ompa a kipan a ka lakmang bang in, amah zaw ka lamang kei ding hi;

¹⁴Ka inn ah leh ka gam ah amah tangtawn in ka ding kip sak ding a, a mangtutphah tangtawn a hihkip ahi ding hi, chi in.

¹⁵Huai thute tengteng leh huai kilakna bang geih in Nathan in David kiang ah a gen hi.

¹⁶Huchi in kumpipa David a lut a, TOUPA ma ah a tu a, “Aw TOUPA Pathian, kua ahia ka hih a, ka inkawte leng kua ahia a hih ua, hichi tantan n’on pi?

¹⁷Aw Pathian, huaite leng nang mitmuh in thil neuchik phet zaw ahi a; himahleh aw TOUPA Pathian, na sikha inkuan hong omdan ding thu kum tampi sung ading na nagenta a, mi lian bang in n’on seplai a, aw TOUPA Pathian.

¹⁸Na sikha pahtawi a a om tungtang thu ah David in na kiang ah bang a gen tuan nawn dia? Na sikha lah na theitel mahmah hi.

¹⁹Aw TOUPA na sikha ziak in nangmah lungsim a pawt bangzel in hiai thil thupi mahmah theisak ding in thil thupi mahmahte na hihta hi.

²⁰Aw TOUPA ka theih un nang bang mahmah a omkei ua, nang loungal Pathian himhim leng a omsam kei hi.

²¹Aigupta gam a kipan na tatkhiak a na mite ma a namdangte zahlaksak a, thil thupitak leh lauhuaitak hih a min thupitak bawlsak ding a Pathian in amah mite adia a hon tatkhiak na mi Israelte bang mahmah khovel ah namdang kua a om ua?

²²Na mi Israelte tangtawn a na mite ding in lah na bawlta ngal a; nang TOUPA a Pathian uh na hita.

²³“Huchi in aw TOUPA, na sikha tungtang thu leh a inkawte tungtang thu na gen tangtawn adin hihkip inla, na gensa bang in hih in.

²⁴Tangtawn in na min hihkip leh hihlet in om hen, ‘Sepaihte TOUPA Israel Pathian, Israelte adia Pathian mahmah ahi,’ na sikha David inkawte na ma ah hihkip in om uhen, chi in.

²⁵Aw nang ka Pathian, na sikha kiang ah inkuan na dingsak ding chihna na phuangta ngal a; huaiziak in na sikha in na kiang ah ka thum ngam lai ahi.

²⁶Aw TOUPA, nang zaw Pathian na hi a, hiai thil hoih na sikha na chiamta hi,

²⁷Na sikha inkawte na ma a tangtawn a om gige theihna ding un na vualzawl a; aw TOUPA, na vualzawl zaw tangtawn a vualzawlna ahi” a chi hi.