Read Paite Chin 1 KRONIKIL 18 Bible Online

1 KRONIKIL 18 - Paite Chin bible

1 KRONIKIL 18

¹Huai nung in hichi ahi a, David in Philistia mite a sual a, a zou a, Gath khua leh a khopelte Philistia mite a suhsak hi.

²Moabte a sual nawn a, Moab mite David sikhate a hong hita ua, siah a pe zel uhi.

³Euphrates lui a a gam kipsak ding a David a paikawm in Zobah kumpipa Hadadezer leng Hamath chin ah a sual nawn hi.

⁴Huchi in David in kangtalai sang khat leh sakol tungtuangmi sang sagih leh sepaih sing nih a matsak a; David in kangtalai kaimi sakol tengteng a thagui a sattansak a, kangtalai za kai ding bel a hawi hi.

⁵Huan Damaska a Suria mite Zobah kumpipa Hadadezer huh ding in a hong kuan ua, David in Suria mi sing nih leh sang nih a that hi.

⁶Huchi in David in Damaska a Suria mite lak ah a sepaih a koih a; huchi in Suria mite David sikhate a hong hita ua, siah a pe zel uhi.

⁷David in Hadadezer pawlte dangkaeng lumte a laksak a, Jerusalem ah a paipih hi.

⁸Hadadezer khua Tibhath leh Chun a kipan David in dal tampi a pua a, huaite in Solomon in dal lohte, tunnate, dal tuium-belsuante a bawl hi.

⁹Huchi in Hamath kumpipa Tou in Zobah kumpipa Hadadezer sepaih tengteng David in a zou chih a zak in.

¹⁰Hadadezer a sim a, a thah ziak a chibai buk ding leh kipahpih ding in a tapa Hadoram David kiang ah a sawl a; Hadadezer leh Tou te lah kidou sek ahi ngal ua; dangkaeng leh dangka sik leh dal tuium-belsuan chichih leng a tawisak lai hi.

¹¹Huaite leng gamdang a zoh tengteng a dangka sik leh dangkaeng a lakte toh David in TOUPA kiang ah a lan a; Edomte lak a te, Moabte lak a te, Ammon suante lak a te, Philistiate lak a te, Amalekte lak a te.

¹²Huailou leng, Zeruiah tapa Abisai in Edomte sing khat leh sang giat Chi guam ah a that hi.

¹³Edom gam ah sepaihte a koih a; huchi in Edom mi tengteng David sikhate a hong hita uh. TOUPA’N David a paina peuh ah a zousak zel hi.

¹⁴Huchi in David in Israel mi tengteng tung ah vai a hawm a; a mi tengteng tung ah diktattak in vai a hawm hi.

¹⁵Zeruiah tapa Joab bel sepaih heutu pen ahi a; Ahilud tapa Jehosaphat bel tanchin gelhpa ahi.

¹⁶Ahitub tapa Zadok leh Abiathar tapa Abimelek bel siampu ahi ua, huan Savsa bel Laigelhmi ahi a;

¹⁷Jehoiada tapa Benaiah bel Kereth mi leh Pelet mite heutu ahi a, David tapate bel kumpipa kim a heutulian ahi uhi.