Read Paite Chin 1 KRONIKIL 19 Bible Online

1 KRONIKIL 19 - Paite Chin bible

1 KRONIKIL 19

¹Huan, huai nung in hichi ahi a, Ammon suante kumpipa Nahash a si a, a tapa in a sik in vai a hawm hi.

²David in, “A pa’n hon na hehpih zel ziak in ken leng Nahash tapa Hanun ka hehpih sam ding” a chi a. Huchi in David in a pa tungtang thu a lungmuan ding in mite a sawl hi. Huan David mite Ammon suante gam ah Hanun kiang ah amah lungmuan ding in a vatung uhi.

³Himahleh Ammon suan heutute’n Hanun kiang ah, “David in na pa a zahtak ziak a lungmuan ding mi na kiang a honsawl hi in na um ahia? A mite gam hihse ding a enchian leh enkhe ding a na kiang a hongpai ahi kha kei ding uam maw?” a chi uhi.

⁴Huchi in Hanun in David mite a man a, a khamul uh a metmai sak a, huan a puansilhte uh a laitak ah a tobou uh khuh pha minmen in a tansak a, a paisak ta hi.

⁵Huchi in kuate hiam in a mite a na hih dan David a vahilh ua. Huan a dawn ding mi a sawl a; amau lah a zum mahmah ngal uhi. Kumpipa’n, “Na khamul uh sau nawn ma Jeriko ah om unla, huai zoh chiang in hongkik un” a chi hi.

⁶Huchi in Ammon suante’n David zakdah lam a na hihta uh chih a kitheih un, Hanun leh Ammon suante’n Mesopotamia gam a mite, Suria maakah a mite, Zobah a mite, kangtalai leh sakol tungtuang mite goihna ding in dangkasik talent sang khat a khak uhi.

⁷Huchi in kangtalai sing thum leh sang nih, Maakah kumpipa leh a mite toh a pi ua, Medeba kiang ah panmun a bawlta uhi. Ammon suante a khua ua kipan a pawtkhia ua, a ki kaikhawm ua, kidou ding in a kuanta uhi.

⁸David in huai a zak in, Joab leh sepaih hangsante tengteng a sawlkhia hi.

⁹Ammon suante a hong kuan ua, khopi kongpi chin ah a kiphalh ua, kumpipa amau thu a hong kuante a tuam in pawn ah a om uhi.

¹⁰Huchi in a malam leh nunglam ah a honsual dek uh chih Joab in a theih in Israel mite lak a mi a hoihte a telkhia a, Suria mite sual ding in a ki zalh uhi.

¹¹Midang tengteng bel a unaupa Abisai khut ah a koihvek a. Ammon suante sual ding in amau leng a kizalh uhi.

¹²Huchi in aman, “Suria mite ka zoh kei dek leh, hon panpih in; Ammon suante na zoh kei dek leh k’on panpih ding.

¹³Hangsantak in om unla, i mite leh i Pathian khuate hum in i kipasal sak ding uh; TOUPA’N hoih a sak bangzel in hih hen” a chi hi.

¹⁴Huchi in Joab leh a kiang a mite’n kidouna mun a Suria mite a vanaih ua; huchi in a ma ah a taikekta uhi.

¹⁵Ammon suante’n Suria mite a taikek uh chih a theih un amau leng a unaupa Abisai ma ah a taikek ta ua, khua ah a lut uhi. Huchi in Joab Jerusalem ah a paita hi.

¹⁶Suria mite’n Israelte ma ah a pang theikei uh chih a na theih un, mi a sawl ua, Lui khenlam a Suria pawlte a sam khia ua, Hadadezer sepaih heutu Sophak bel a heutu pen uh ahi.

¹⁷Huai thu David a hilh ua; aman Israel mi tengteng a samkhawm a, Jordan lui a kan ua, a vamu ua, sual ding in a kiphalh uhi. Huchi in Suriate kidoupih dia David a kisakkhit in amah a kidoupihta uhi.

¹⁸Suria mite bel Israelte ma ah a taikek ua; David in Suria mi, kangtalai sang sagih tung a tuang leh sepaih sing li a that a, sepaih heutu Sophak leng a that hi.

¹⁹Huchi in Hadadezer mite’n Israelte ma ah a pangthei takei uh chih a theih un, David toh kilemna a bawl ua, a sikhate ding in a omta uh; Suria mite’n leng Ammon suante a panpih nuamta kei uhi.