Read Paite Chin 1 KRONIKIL 20 Bible Online

1 KRONIKIL 20 - Paite Chin bible

1 KRONIKIL 20

¹Huan hichi ahi a, kum a hong bei a kumpipate kidou ding a a kuankhiak lai un, Joab in a sepaih hatte a pikhia hi. Ammon suante gam a suhsak a, Rabah khua a um uh. David bel Jerusalem ah a om. Huan Joab in Rabah khua a sual a, a lata hi.

²Huchi in David in a kumpipa uh lallukhu khuklai a laksak a, a gikdan dangkaeng talent khat ahi, suangmantamte leng a tel a; David a khusak ua; khopi a om gallak sum tampi a la hi.

³Huchi in huailai a mipite bel a pikhia a, singatnate, leilehna sik zumte, heipite in na a semsak a. Huchibang in Ammon tate khopi tengteng David in a hih hi. David leh mi tengteng Jerusalem ah a pai nawnta uhi.

⁴Huan hichi ahi a, huai nung in, Philistia mite toh Gezer ah kidouna a om a; huchi in Husat mi Sibbekai in milian suante lak a mi Sippai a that a; huchi in a vuallelta uhi.

⁵Philistia mite toh kidouna a om nawn a; Jair tapa Elhan in Git mi Goliath unaupa Lahmi a that a, a teikung chiampek bang ahi.

⁶Gath khua ah kidouna a om nawn a, huai ah mi sang mahmah, a khut langtuak a khutzung guk, a khe langtuak a khezung guk, avek a sawmnih leh li nei a om a; amah leng miliante lak a khat ahi.

⁷Aman Israel mite a simmawh a, David unau Simeah tapa Jonathan in a that hi.

⁸Huaite Gath khua a milian lak a piang ahi uh; huaite David leh a mite khut ah a si uhi.