Read Paite Chin 1 KRONIKIL 21 Bible Online

1 KRONIKIL 21 - Paite Chin bible

1 KRONIKIL 21

¹Huan Setan in Israelte a sual a, David bel Israelte sim utna a neisak hi.

²Huan David in Joab leh a miliante uh kiang ah, “Kuan unla, Beer — sheba a kipan Dan tan in Israel mite sim unla, a zah uh ka theihtheihna ding in honghilh nawn un” a chi hi.

³Joab in kumpipa kiang ah, “TOUPA’N a mite a mun za in zong hihpung leh, kumpipa ka toupa, ka toupa mite mah hilou uh ahi maw? Bangdia ka toupa’n huai theih kilawp ahia? Bangdia Israelte siamlouh tanlohna hi ding ahia oi?” a chi hi.

⁴Huchi in Joab a pawtkhia a, Israel gam tengteng ah a pai a, Jerusalem ah a pai nawn hi.

⁵Joab in mihing om zah David a hilh hi. Israel gam a namsau tawi mi tengteng maktaduai khat leh nuai khat ahi uh; huan Judah gam a namsau tawi mi bel nuai li leh sing sagih ahi uh.

⁶Levite leh Benjaminte bel a sim tel kei a; kumpipa thu Joab zakdah lamtak ahi ngal a.

⁷Huai thil ah Pathian a kipak kei a; huchi in Israelte a gawtta hi.

⁸Huchi in David in Pathian kiang ah, “Hiai thil ka na hihna ah nakpitak in ka na hihkhialta ahi; himahleh na sikha thulimlouhna hehpih in ngaidam in, haihuai tak in ka na hihta hi” a chi hi.

⁹Huan TOUPA’N zawlnei Gad kiang ah,

¹⁰“Kuan inla, David kiang ah, TOUPA’N hichi in a chi: ‘Thil thum k’on tah: na tung a ka hih ding in a lak ua khat tel in a chi’ ” va chi in.

¹¹Huchi in David kiang ah Gad a vahoh a, a kiang ah, “TOUPA’N hichi in a chi:

¹²‘A koi ahia na deih tel in; kum thum kialpi tun, na melmate namsau a delhphak a om a kha thum na melmate vuallelhsak hia, ni thum hipi len ding, TOUPA namsau a TOUPA angel in Israel gam tengteng a mi hih manthat zel?’ chi in. Huchi in kei hon sawlpa bang ka chi dawn dia, kingaihtuah inla, honhilh in” a chi hi.

¹³David in Gad kiang ah, “Ka lungzing mahmah; TOUPA khut ah puklut peuhmah maileng; a chitna lah a thupi mahmah ngal a; mihing khut ah zaw hon puklut sak mahmah ken” a chi hi.

¹⁴Huchi in TOUPA’N Israelte lak ah hipi a lengsakta.

¹⁵Huan Jerusalem khua hihse ding in Pathian in angel a sawl a; a hihsiat dek laitak in, TOUPA’N a en a, thil hoihlou hih a tup a khiama, mite hih mangthang angel kiang ah, “A hunta; na khutlik nawn ken” a chi hi. Huchi in TOUPA angel Jebus mi Ornan phual chin ah ading hi.

¹⁶David a daktou a, TOUPA angel, namsau phawisa a Jerusalem lam ngima, lei leh van kikal ading a mu hi. Huchi in David leh a upate’n saiip puansilh in lei ah a khupboh uhi.

¹⁷David in Pathian kiang ah, “Keimah ka hi ka hia mipite sim ding chih thu pepa? Keimah ka hi ginat huailou tak a thil na hihkhial, hiai belamte’n bang thil ahia a hihtei uh? Aw TOUPA ka Pathian, keimah leh ka inkawte tung ah na khutkha inla, na mite’n hipi thuak nawn kei uhen” a chi hi.

¹⁸Huchi in TOUPA angel in Gad David kiang a va hohtou a, Jebus mi Ornan phual a TOUPA dia maitam doh ding a David hilh ding in thu a pia hi.

¹⁹Gad in TOUPA min a a thugen ziak in David a hoh touta hi.

²⁰Ornan a kilehhei a, angel a mu a; a tapa li a kiang a omte a buta uhi. Ornan in buh a na chil ahi.

²¹David Ornan kiang a tun in, Ornan a kihei a, David a muta a, huan phual a kipan a pawtkhia a, a mai a leisi in David ma ah a khupboh hi.

²²Huchi in David in Ornan kiang ah, “Hiai phual TOUPA dia maitam ka bawlna din hon pedih ve; a man kimgeih la in honpia in, mipite lak a hi a kikhin theihna ding in” a chi hi.

²³Ornan in David kiang ah, “Tang in, TOUPA ka kumpipa’n pha a sak bang in hih hen; haltum a lat ding in bawngtalte, sing ding in phual vanzatte, tangbuang thillat ding in buhte ka honpia hi; k’on sutuah vek ding” a chi hi.

²⁴Huan kumpipa David in Ornan kiang ah, “Hilou e; a man kimgeih in ka leizaw ding, manbei in nang a TOUPA din ka lakei ding, haltum thillat leng ka lan kei ding” a chi a.

²⁵Huchi in David in huai mun leina in Ornan dangkaeng sekel za guk a pia hi.

²⁶David in huai ah TOUPA ding in maitam a bawl a, haltum thillatte, leh lemna thillatte a lan a, TOUPA a sam hi; amah maitam tung ah mei in van a kipan in a dawngta hi.

²⁷Huan TOUPA’N Angel thu a pia a, a namsau a pai ah a thun nawnta hi.

²⁸Huchi in David in Jebus mi Ornan phual ah TOUPA’N a hondawng chih a theih in huai ah a kithoihta hi.

²⁹Huailaiin Mosi in gamdaia Toupa biakbuk leh haltum thillatna maitam a bawl Gibeon khua munsang ah a om ahi.

³⁰Himahleh David bel TOUPA angel namsau a kihtak ziak in Pathian dong ding in huai ah a hoh theikei hi.