Read Paite Chin 1 KRONIKIL 22 Bible Online

1 KRONIKIL 22 - Paite Chin bible

1 KRONIKIL 22

¹Huchi in David in, “Hiai zaw TOUPA Pathian inn ahi hi; hiai zaw Israelte haltum thillatna maitam ahi hi” a chi hi.

²Huchi in David in Israel gam a namdang omte sapkhawm thu a pia a; huan, Pathian inn lamna ding in suangsekmite suang a seksak hi.

³David in intual kongkhak leh a bulhna ding kilhna ding sik tampi a bawlkhol a; dal tamtak buk senglouh toh; sidar sing simsenglouh toh;

⁴Zidon mi leh Tura mite’n David kiang ah sidar sing tampi a honla uhi.

⁵David in, “Ka tapa Solomon lah a naupanglai in, bangmah a thei naikei a, TOUPA inn lam ding thupitak, a min leh a thupina gamchih a thangkhe ding ahi a; huaiziak in ka kisakhol hi, a chi hi. Huchi in David a sih ma’n a kisakhol thupi mahmah hi.

⁶Huchi in a tapa Solomon a sam a, TOUPA Israelte Pathian inn lam ding in thu a pia hi.

⁷Huan David in a tapa Solomon kiang ah, TOUPA ka Pathian min ding in inn lam lungsim in ka nei gige hi;

⁸Himahleh, TOUPA thu ka kiang ah a hongtung a, Nang zaw sisan na naksuah tel a, kidoute na uangtel a; leitung ah ka mitmuh a sisan na naksuah ziak in, ka min ading in inn na lam kei ding;

⁹Ngai in, tapa chingkam n’on nei ding a, amah kei lungtuak mi ahi ding a, a kim gam a a melma tengteng lak ah galmuanna ka pe ding; a min Solomon ahi ding a, amah ziak in Israelte galmuang leh lungmuangtakin ka omsak ding;

¹⁰Aman ka min adin inn a lam ding a, amah ka tapa ahi ding a, kei a pa ka hi ding; huan, Israelte tung a a gam mangtutphah tangtawn adin ka hihkip ding.

¹¹Huchi in ka tapa, TOUPA na kiang ah om henla, lamzang zel inla, na tungtang thu a genkholhsa bang in, TOUPA na Pathian inn lam in.

¹²TOUPA’N pilna leh theihnate hon neisak peuhmah phot henla, Israelte tung a thuneihna honpia hen, huchi in TOUPA na Pathian dan na zui thei ding hi.

¹³Huchi in Israelte tungtang thu a thusehte leh vaihawmnate TOUPA’N Mosi a piak na zuih leh, na lamzang zel ding; hattak in om inla, hangsantak in om in; lau kenla, lunglel sam ken.

¹⁴Ngai in, ka lungzin lai in TOUPA inn adin dangkaeng talent nuai khat leh, dangkasik talent maktaduai khat ka na kisakhol khin a; dal leh sikte leng buk senglouh, tampi ahi; sing leh suang leng ka kisakhol khin ahi, huaite na sunzom theita ding.

¹⁵Nasemmi, singatmi leh suangsekmi leh khutsiamna chiteng semthei leng na hau hi;

¹⁶Simseng vuallouh dangkaengte, dangkate, dalte, sikte leng; thou inla, nasep pan in, TOUPA na kiang ah om hen, a chi hi.

¹⁷David in Israelte makai tengteng a tapa Solomon panpih ding in thu a pia hi.

¹⁸TOUPA na Pathian uh na kiang uah a om ka hia? Mun chih mual chih ah galmuanna a honpe ka hia? Hiai gam a mite ka khut ah a hon peta a, TOUPA ma leh a mite ma ah gam lak ahita.

¹⁹Tuin na lungtang uleh na lungsim uh TOUPA na Pathian uh zong ding in koih kip unla; huaiziak in thou unla, TOUPA min a inn lam ding suang, TOUPA thukhun bawm leh Pathian tuium-belsuan siangthoute laklutna ding in, Mun Siangthou lam un, a chi hi.