Read Paite Chin 1 KRONIKIL 23 Bible Online

1 KRONIKIL 23 - Paite Chin bible

1 KRONIKIL 23

¹David a dam sawt in a upa mahmah a; huchi in a tapa Solomon Israelte kumpipa in a bawlta hi.

²Huan Israelte makai tengteng siampute leh Levite toh a samkhawm hi.

³Levite kum sawmthum a kipan a tunglam sim ahi ua; a tamlam uh piching sing thum leh sang giat ahi.

⁴Huaite lak a “Sing nih leh sang li TOUPA inn lam heutute heutu ding ahi ua; sang gukte heutute leh vaihawmmi dingte ahi uh;

⁵Sang lite kongkhak ngakmite ding ahi ua, huan sang li te, Phatna ding a thil tumging chi ka bawl, David in a chihte zang a TOUPA phat ding mite ahi uhi.

⁶Levi ta Gershon, Kahath, Merari zah in David in pawl a bawl a,

⁷Gershon mite Ladan leh Shimei ahi uh.

⁸Ladan tate pipente Jehiel, Setham, Joel, thum ahi uh.

⁹Shimei tate Selomith, Haziel, Haran, thum ahi uh. Hiaite Ladan suan inkawte pipente ahi uh.

¹⁰Shimei tate bel Jahath, Zina, Jeush, Beriah ahi uh. Hiai lite Shimei tate ahi uh.

¹¹Jahath a upapen ahi a, Zizah a sang ahi; Jeush leh Beriahte’n bel ta a hau kei ua; huaiziak in inkuan khat bang a sim ahi uh.

¹²Kohath tate Amram, Izhar, Hebron, Uziel, li ahi uh.

¹³Amram tate Aron leh Mosi ahi uh; Aron bel amah leh a suante tangtawn a ding a thil siangthoutakte hihsiangthoua, tangtawn a TOUPA ma a gimlim hal a, a nasem a, a min a vualzawlpa ding a hihtuam ahi uh.

¹⁴Pathian mi Mosi bel, a tate Levi nam lak a sim ahi uh.

¹⁵Mosi tate Gershom leh Eliezer ahi uh,

¹⁶Gershomtate lak a upapen Sebuel ahi.

¹⁷Eliezer tate lak a upapen Rehabiah ahi. Eliezer in tapa dang a neikei; Rehabiah in bel tapa tampi a nei.

¹⁸Izhar tapate; Selmoth a pipen.

¹⁹Hebron tate lak a pipen Jeriah ahi a, a sang Amariah, a sang nawn Jahaziel, a sang nawn Jekameam ahi.

²⁰Uziel tate lak a upa zaw Mikah ahi a, a sang Jesiah ahi.

²¹Merari tate: Merari tate bel Mahli leh Musi ahi uh, Mahli tate, Eleazar leh Kish ahi uh.

²²Eleazar tapate neilou in a si a, tanute kia a nei a; Kish tapa a unaute un zi in a nei uh.

²³Musi tate Mahli, Eder, Jeremoth, thum ahi uh.

²⁴Huaite Levi suan, a inkuan uh bangzel a min gelha a sim uh inkuan pipen, TOUPA inn lam a kuan, kum sawmnih a kipan tunglam a simte uh ahi.

²⁵David in, “TOUPA, Israelte Pathian in a mite galmuangtak in a omsakta a, Jerusalem ah a om nilouh hi.”

²⁶Levite’n leng biakbuk leh a nasepna ding tuium-belsuan tengteng a zon uh a kiphamohta kei hi” a chi hi.

²⁷David thupiak nanung ziak in Levite kum sawmnih a kipan a tunglam tan in sim ngal ahi uhi.

²⁸A nasep uh Pathian inn a nasep a Aron tapate panpih a intual sung leh dantan sung a thil siangthoute hihsiangthoua, TOUPA inn a nasep lah ahi;

²⁹Tanghou koih dingte, tangbuang thillat ding a tangbuang nel mahmah, silngou hellouh tanghoupek hiam, bel a uk hiam, kan hiam, a teh leh a letdan bangteng ding bawlte toh;

³⁰Zingsang teng a TOUPA kiang a kipahthu gen leh amah phatte toh, nitak a leng huchi mah;

³¹Khawlnite, kha thakte a Ankuanglui neihte a hih ding seh bangzel a TOUPA kiang a haltum thillat tengteng TOUPA ma a lat gigete toh;

³²Kihoupihna puanin kepte, Mun Siangthou kepte, TOUPA inn a nasem a a unau Aron tapate’n hih ding a seh peuhmah uh hihte toh” a chi hi.