Read Paite Chin 1 KRONIKIL 26 Bible Online

1 KRONIKIL 26 - Paite Chin bible

1 KRONIKIL 26

¹Kongkhak ngak pawl khen dan: Kora mi bel Asaph tapate lak a Kora tapa Meselemiah ahi a.

²Huan Meselemiah in tapate a nei a; a ta masa Zekariah ahi a, a zom Jediael, a thumna Zebadiah, a lina Jathniel;

³A ngana Elam, a gukna Jehohanan, a sagihna Elioenai ahi.

⁴Obed-edom in tapate a nei a; a ta chil Semaiah ahi a, a zom Jehozabad, a thumna Joah, a lina Sakar, a ngana Nethaneel.

⁵A gukna Amiel, a sagihna Issakar, a giatna Peulethai ahi, amah bel Pathian in a vualzawl hi.

⁶A tapa Semaiah a kipan tapa, a inkawte uh pipente leng a piang ua; mi hat hangsan ahi chiat uh.

⁷Semaiah tapate Othni, Rephael, Obed leh Elzabadte ahi ua, a unau uh Elihu leh Semakiah bel mi hat mahmah ahi uh.

⁸Huaite tengteng Obed-edom suante ahi uh: amau leh a tapate uh leh a unaute uh nasepna lamsang ah mi piching ahi uh; Obed-edom a kipan mite sawmguk leh nih ahi uhi.

⁹Meselemiah in tapa leh unau mi hat mahmah sawmlehgiat a nei.

¹⁰Merari suante lak a Hosah in leng tapate a nei a; Simri bel a pipen ahi a, ta chil ahi kei na a, a pa’n pipen in a bawl hi;

¹¹A zom in Hilkiah ahi a, a thumna Tebaliah, a lina Zekariah ahi. Hosah tapate leh a unaute avek un sawmlehthum ahi uh.

¹²Huai pipente lak a mi a unaute uh bang a TOUPA inn a nasem thilbawl a tantuan nei a kongkhak ngakmi pawl a a khente uh ahi hi.

¹³A neu a lian in, a inkaw dungzui zelun kongpi chih a om ding zonna ding in ai a san uhi.

¹⁴Huchi in suahlam adia aisan pen Selemiah tung ah a puk hi. Vaihawmmi piltak, a tapa Zekariah adin ai a san ua, mallam pen amah a tuamin apuk hi.

¹⁵Simlam bel Obed-edom tuam in; a tapate tuamin Asuppim.

¹⁶Tumlama toupaina lampi a Saleketh kongkhak venna toh, Suppim leh Hosah tuamin.

¹⁷Suahlam ah Levite guk a om ua, niteng in mallam ah li, simlam ah li, thil koihkhawmna in ah nih tuaktuak.

¹⁸Tumlam in umsung ading in a lutna ah li; in umsung ah nih.

¹⁹Huaite ahi uh, Kora tapate leh Merari mi tapate kongkhak ngakmi pawl a khente uh.

²⁰Huan a unaute uh Levite lak ah Ahijah Pathian sum koih khawmna inn leh thil siangthou koihkhawmna inn heutu ahi.

²¹Ladan tapate; Gershon mite tapate Ladante a te, pipute inkawte a pipen Gershon mi Ladan a te; Jehieli.

²²Jehieli tapate; Zetham, Joel a unaupa, TOUPA inn a sum koihkhawmna heutu ahi uh.

²³Amram mite a kipan, Izhar mite a kipan, Hebron mite a kipan, Uzziel mite a kipan:

²⁴Sebuel Gershomtapa, Mosi tapa, sum koihkhawmna heutu ahi hi.

²⁵A unaute bel Eliezer tapa Rahabiah, Jesaiah, Joram, Zikri leh Selomithte ahi.

²⁶Selomith leh a unaute bel kumpipa David leh a inkawte uh pipen sepaih sang heutute leh za heutute leh sepaih pawl heutute’n a hih siangthousa uh, thil siangthou koihkhawmna in tengteng kemte ahi uhi.

²⁷Kidouna gallak thilte TOUPA inn bawlphatna din a koih uhi.

²⁸Zawlnei Samuel, Kish tapa Saul, Ner tapa Abner leh Zeruiah tapa Joabte’n a hih siangthou tengteng uh, kuapeuh in thil a hih siangthousa peuhmah uh Selomith leh a unaute kep vek ahi.

²⁹Izhar mi Kenaniah leh a tapate Israel gam pawlam tungtang thu a heutute leh vaihawmmi ahi uh.

³⁰Hebron mi Hasabiah leh a unau mi hangsan sang khat leh za sagih Jordan gal tumlam a Israelte ukpa ahi uhi; TOUPA na tengteng leh kumpipa nasepna lam na ah.

³¹Hebron mi Jerijah bel a suan uh tungtang thu a inkaw pipen lam ah Hebronte pipa pen ahi. David kum sawmli a vaihawm kum a a zon un Gilead gam a Jazer khua ah mi hat hangsan a mukhia uhi.

³²A unau mi hangsante sang nih leh za sagih ahi uhi. Huaite inkuan pipen, kumpipa David in Pathian lam thil chiteng leh kumpipa na lam thu a Reuben, Gad leh Manassehte nam kimkhatte heutu dia bawlte ahi uh.