Read Paite Chin 1 KRONIKIL 28 Bible Online

1 KRONIKIL 28 - Paite Chin bible

1 KRONIKIL 28

¹Huan David in Israel heutu tengteng nam pipente, kumpipa nasem a kikheng zelzel pawl heutute, sepaih sang heutute, za heutute, kumpipa leh a tapate sum leh thil neih tengteng tung a heutute, milian mi hat, mihat hangsan tengtengte toh Jerusalem ah a samkhawm hi.

²Huchi in kumpipa David ading a, ka unaute leh ka mite aw, ka thu na ngaikhia dih ua; “Ken TOUPA thukhun bawm koihna leh i Pathian khengakna ding inn lam lungsim in ka nei gige a; lamna ding leng ka ngahkhin sipsip hi.

³Himahleh, Pathian in ka kiang ah, ‘Nang zaw kidoumi sisan suahmi na hih ziak in ka min adin inn na lam kei ding’ a chi hi.

⁴Himahleh TOUPA Israelte Pathian in, ka pa inkawte tengteng lak a kipan Israelte kumpipa dia tangtawn a om ding in a hon na telta a; Judah nampipen ding in a na telta a; Judah namte lak ah ka Pa inkawte; ka pa tapate lak a kipan Israel tengteng kumpipa din a hon na tel khe tuamta hi.

⁵Ka tapa tengteng lak ah, TOUPA’N tapa tampi a honpia a, Israelte kumpipa ding in TOUPA gam mangtutphah a tu ding in ka tapa Solomon a na telta hi.

⁶Huchi in ka kiang ah, Na tapa Solomon in ka inn leh ka intualte a dingsak ding; ka tapa ding in ka telta a, huchi in a pa ka hi ding.

⁷Ka thupiakte leh ka vaihawmte a pom gige leh tua na hih gige bang un a gam tangtawn adin ka kipsak ding hi.

⁸Huchi in TOUPA mipi, Israelte tengteng mitmuh in leh i Pathian zak in TOUPA na Pathian uh thupiak tengteng pom ding leh limsak ding in k’on hanthawn ahi; huchi in hiai gam hoih mahmah na luah ding ua, nanung uah na suante uh tangtawn adin na luahtou sawnsak zel ding uhi.

⁹Huan nang ka tapa Solomon, na pa Pathian thei inla, lungtang hoih bukim leh lungsim kilawptak in a nasep sem in; TOUPA’N lah lungtang a en sek a, lungsim a lunggel tengteng a thei vek hi; amah na zon leh na mu ding a, na lehngatsan leh bel tangtawn in a hon khahkhe ding hi.

¹⁰Pilvang in; munsiangthou adia inn lam ding in TOUPA’N nang a hon septa hi, hattak in om inla, pang in” a chi hi.

¹¹Huchi in David in a tapa Solomon kiang ah biakin inlim, a inlim, sum koihkhawmna inlim, a dantan tungnung lim, asung dantan lim, chitna tutphah lim.

¹²A lungsim a a lunggel bang tengteng, TOUPA inn umsung intual lim, a kim dantan tengteng lim, Pathian in a sum koihkhawmna in lim, thil tan koihkhawmna inlim a pia hi.

¹³Siampute leh Levite a pawlpawl a a omna ding uh lim, TOUPA inn a nasepna lam ding tengteng lim, TOUPA inn a nasepna ding tuiumbel suan tengteng lim leng.

¹⁴Nasepna lam adia tuium-belsuan chichih, dangkaeng tuium-belsuan ding, dangkaeng zatzel zah ding,

¹⁵Dangkaeng khawnvak koihna leh a khawnvak ding dangkaeng zatzel zah ding, khawnvak koihna leh a khawnvak tui ding a zatzel zah ding, khawnvak koihna a mun kiphamoh chiat bangzel a dangkasik khawnvak koihna ding adia zatzel zah ding toh;

¹⁶Tanghou at koihna ding dangkaeng dohkan leh, dangkasik dohkan bawlna ding a, dangkaeng zatzah ding leh dangkasik zatzel zah ding a tehna in a pia hi.

¹⁷Maiphiatna kuang, noute toh; dangkaeng belhbu ding, belhbu khat zel adia zatzel zah ding.

¹⁸Cherubte a kha uh zak a, TOUPA thukhun bawm tuam tuanna lim bang bawlna ding dangkaengte toh.

¹⁹David in, “Hiaite tengteng TOUPA’N amah mah khut a hon gelh, hiai a lim tengteng hon theisak hi in ka thei” a chi hi.

²⁰Huchi in David in a tapa Solomon kiang ah, “Hattak leh hangsantak in om inla, pang in; laukenla, lunglel sam ken; TOUPA Pathian ka Pathian na kiang ah a om hi; TOUPA inn lam nasep tengteng zoh ahihvek mateng a hon paisan in, a hon limsaklou kei ding hi.

²¹Huan ngai dih, Pathian in na chih teng semmi pawl siampute leh Levite a om ua, bang na peuh a, banglam peuh a nasep siam, hattak chiat a nang hon panpih ding na kiang ah a om zel ding uhi; heutute leh mipi teng in leng na thupiak peuhmah a zui ding uhi” a chi hi.