Read Paite Chin 1 KRONIKIL 29 Bible Online

1 KRONIKIL 29 - Paite Chin bible

1 KRONIKIL 29

¹Huan kumpipa David in mipi tengteng kiang ah, “Pathian telkhiak ka tapa Solomon a naupanglai in bangmah a thei naikei a, a sep ding lah a thupi ngal a, biakin mihing ading ahi kei a, TOUPA Pathian ading ahizaw hi.

²Huchi in ka Pathian inn ading in a dangkaeng lam thil adin dangkaengte, dangkasik lam thil adin, dangkasik, dal lam thil adin dal, sik lam thil adin sik, singlam thil adin sing theihtawk in ka na kisa khinta a, a zepna ding onik suang, suang kilawm, a silhding suang kilawm chi tuamtuam leh suang mantam chichih leh suangpak suang tampite ka pekhinta hi.

³Huaikia louleng ka Pathian inn ka deihsak mahmah a, keimah sum dangkaeng leh dangkate leng, inn siangthou adia ka na kisaksa tengteng chih louh in, ka Pathian inn ading in ka pia hi, huai bel bang zutna ding in Ophir dangkaeng,

⁴Dangkaeng talent sang thum leh dangkasik siang thou talent sang sagih, zatna lam tuamtuam a misiamte zat ding in, dangkaeng zatna ding a dangkaengte.

⁵Dangka sik zatna ding a dangkasikte ahi. Tuni in TOUPA ding a kipaktak a pephal kuakua na om ua?” a chi hi.

⁶Huchi in inkuan pipente, Israel nam heutute, sang heutute leh za heutute, kumpipa nasemte heutute toh kipaktak in a pia uhi.

⁷Pathian inlamna ding dangkaeng talent sang nga leh darik sing khat, dangkasik talent sing khat leh dal talent sing khat leh sang giat, sik talent nuai khat a pia uhi.

⁸Suangmantam neite’n TOUPA sum koihkhawmna a Gershon mi Jehiel kep ding in a koih uhi.

⁹Huchi in mipite a kipak mahmah ua, lungsim munkhat pu a kipaktak a TOUPA a piak ziak un, kumpipa David in leng nuamsak petmah in nuam a sa hi.

¹⁰Huchi in David in mipi tengteng ma ah TOUPA kiang ah kipahthu a gen hi,

¹¹“Aw TOUPA, ka pu uh Israel Pathian, tangtawn a phat in om hen. Aw TOUPA, thupina, thilhihtheihna, pahtawina, zohna, lalna nang a ahi a, lei leh van a om tengteng nang a ahi. Aw TOUPA, gam nang a ahi a, mitengteng a tungnungpen na hi.

¹²Hauhsakna leh pahtawina na kiang a kipan ahi, bangkim tung ah thu na nei a, thilhihtheihna na khut ah a om a, mi tengteng hihthupina leh hatna piaktheihna na khut ah a om hi.

¹³‘Huchi in ka Pathian uh kipahthu k’on hilh ua, na min thupi ka phat uhi,’

¹⁴“Himahleh kua ahia ka hih a, ka mite leng kua ahia a hih ua, hiaite kipaktak a k’on lat theih mahmah uh? Thil tengteng na kiang a kipan a pawt ahi ua, nang a hon penawn lel ka hi uhi.

¹⁵Ka pi leh pute uh bang in kou zaw na ma ah mikhual, mi kiang a omsam bang ka hi ua; leitung a damsung nite zaw limliap banglel ahi a, lamet ding himhim a omkei hi.

¹⁶TOUPA ka Pathian uh, na min siangthou ding a inn k’on lamsak ding a hiai thil ka na kisakna tengteng uh nangmah khutsuak ahi a, nang avek ahi.

¹⁷Ka Pathian, nang lungtangte na enchian sek a, diktatnate na kipahpih nak chih leng ka thei hi. Ken zaw lungsim taktak in hiai thil tengteng kipak mahmah in k’on lan ahi, hiai lai a na mite leng kipak mahmah a na kiang a honlan mite ka muh in ka kipak mahmah hi.

¹⁸Aw TOUPA, ka pu uh Abraham, Isak, Israelte Pathian, na mite’n hichibang lungsim a put gige theihna ding un a lungsimte uh nang ading in hihkip inla;

¹⁹Huan ka tapa Solomon na thupiakte, na thu theihsakte, na dante zui a, huaite tengteng hih ding leh ka kisakkholhna inlam ding in lungsim hoihkim pusak in” David in a chi hi.

²⁰David in mipi tengteng kiang ah, “Khaile, TOUPA na Pathian uh phat un” a chi a, huchi in mipi tengteng in TOUPA, a pi leh pute uh Pathian a phat ua, a kun ua, TOUPA leh kumpipa a bia uhi.

²¹A zing in TOUPA kiang ah kithoihna ding leh TOUPA kiang a haltum thillat ding in bawngtal sang khat leh belam sang khat leh belamnou sang khat, a dawn ding uh thillat toh Israelte tengteng adin kithoihna tampi a lan uhi;

²²Huchi in huai ni’n TOUPA ma ah nuamsatak in a ne ua, a om chiat uhi. David tapa Solomon bel kumpipa ding in a bawltuan nawn ua, TOUPA milian ding in sathau a nilh ua, huan, Zadok bel siampu ding in.

²³Huchi in Solomon TOUPA mangtutphah ah a pa David sik in kumpipa in a tuta a, lamzangtak in a om a; huan Israelte tengteng in a thu a zui uhi.

²⁴Huan heutute tengteng leh mi hat hangsante leh kumpipa David tapa dang tengtengte kumpipa Solomon lak ah a kipia uh.

²⁵TOUPA’N Solomon Israelte tengteng mitmuh in nakpitak in a hihthupi a, Israel gam a a ma a kumpipate lak ah kuamah in a tan ngeilouh uh, kumpipa hihna thupi mahmah a tangta hi.

²⁶Jesse tapa David in Israelte tengteng tung ah vai a hawm hi,

²⁷Israelte tung a a vaihawm sung kum sawmli ahi; Hebron khua ah kum sagih vai a hawm a, Jerusalem ah kum sawmthum leh thum vai a hawm hi.

²⁸Upa tak, tekkun a dam in, hausatak leh pahtawi loh in a si a; a sik in a tapa Solomon in vai a hawmta hi.

²⁹Ngai in, kumpipa David tanchin a tung a kipan a tawptan in, zawlnei Samuel laibu, zawlnei Nathan laibu, leh zawlnei Gad laibute ah a tuang hi,

³⁰A vaihawm thute, a thilhihtheihdan tengtengte, amah leh Israelte tung leh gam tengteng tung a thil hong omdante toh.