Read Paite Chin 1 KRONIKIL 4 Bible Online

1 KRONIKIL 4 - Paite Chin bible

1 KRONIKIL 4

¹Judah tapate: Perez, Hezron, Karmi, Hur leh Sobal.

²Sobal tapa Reaiah in Jahath a suang a; Jahath in Ahumai leh Lahad a suang. Hiaite mite Zorathit inkawte ahi uh.

³Huan hiaite Etam pa tapate ahi uh: Jezreel, Ishma, Idbash: huan a sanggamnu uh min Hazelelponi ahi:

⁴Gedor pa Penuel, Husah pa Ezer. Hiaite, Ephrathah ta masa, Bethlehem pa, Hur tapate ahi uh.

⁵Tekoa pa Asur in zi nih, Helah leh Naarah a nei.

⁶Naarah in Ahuzzam, Hepher, Temeni, Haahashtari a neihsak a. Hiaite Naarah tapate ahi uh.

⁷Helah tapate Zereth, Izhar, Ethnan ahi uh.

⁸Koz in Anub, Zobebah, Harum tapa Aharhel inkawte a suang hi.

⁹Huan Jabez bel a unaute sang in a zahtakhuai zaw a: a nun a min Jabez a sa a, lungkhamna toh amah ka neih ziak in, chi in.

¹⁰Jabez in Israel Pathian a sam a, Aw hon vualzawl mahmah in, ka gam liansak in, na khut ka kiang ah om in, hoihlou a kipan in kei honkem in, hon lungkham saklouhna ding in chi in. Huchi in Pathian in a nget a phalta hi.

¹¹Huan Kelub, Suah sanggampa’n, Eston pa, Mehir a suang hi.

¹²Eston in Bethrapha, Paseah, Irnahas pa Tehinnah a suang hi. Hiaite Rekah mite ahi uh.

¹³Huan Kenaz tapate: Othniel, Seraiah; huan Othniel tapate: Hathat.

¹⁴Meonothai in Ophrah a suang: Seraiah in Geharasim pa Joab a suang; khutsiammite chih in a om uhi.

¹⁵Jephunneh tapa Kaleb tapate; Iru, Elah, leh Naam: Elah tapa: Kenaz.

¹⁶Jahallel tapate; Ziph leh Ziphah, Tiria leh Asarel.

¹⁷Ezra tapate; Jether, Mered, Epher, Jalon: huan Miriam leh Sammai, Estemoa pa Ishbah a nei hi.

¹⁸A zi Jehudijah a numei in Jered Gedor pa, Heber Soko pa, Jekuthiel Zanoah pa a suang hi. Huchi in hiaite Mered in a pi, Pharo tanu Bithia tapate ahi uh.

¹⁹Huan Naham sanggamnu, Hodiah zi tapate, Gar mi Keilah pa, Maakah mi Estemoa pa ahi uh.

²⁰Simon tapate; Amnon, Rinnah, Benhanan, Tilon. Ishi tapate; Zoheth, Ben Zoheth ahi uhi.

²¹Huan Judah tapa Selah tapate; Lekah pa Er, leh Meresah pa Laadah leh puanmalngat hoih bawlte inkuante, Asbea inkawte;

²²Jokim, Kozeba mite, Joash, Saraph, Moab a vaihawmna nei, Jasubilehem. Huchi in chiamtehna laite a lui mahmah hi.

²³Hiaite belvelmite leh, Netaim leh Gedera a tengte ahi uh: huai ah a nasepna ziak in kumpipa kiang ah a teng uhi.

²⁴Simeon tapate: Nemuel, Jamin, Jarib, Zerah, Saul,

²⁵A tapa Sallum, a tapa Mibsam, a tapa Misma.

²⁶Misma tapate; a tapa Hammuel, a tapa, Zakkur, a tapa Shimei.

²⁷Shimei in tapa sawmlehguk leh tanu guk a nei a, himahleh a unaute’n tate tampi a neikei ua, Judah tate bang in, a inkawte tengteng uh leng a pungkei uhi.

²⁸Beer — sheba ah, Moladah ah, leh Hazar-shual ah a teng ua;

²⁹Bilhah ah, Ezem ah, Tolad ah;

³⁰Bethuel ah, Hormah ah, Ziklag ah;

³¹Beth-markaboth ah, Hazarsusim ah leh Bethbirei ah, Saaraim ah. Hiai David vaihawm tanpha in a khopite uh ahi.

³²Etam leh Ain, Rimmon, Token, Ashan, a khotate uh ahi, khopi ngate:

³³Huai kim a khotate tengteng Baal pha in ahi. Hiaite a tenna uh ahi a, khangthusuina a nei uhi.

³⁴Mesobab, Jamel leh Amaziah tapa Josah;

³⁵Joel leh Josibiah tapa Jehu, Seraiah tapa, Asiel tapa;

³⁶Elioenai, Jaakobah; Jesohaiah, Asaiah, Adiel, Jesimiel leh Benaiah;

³⁷Siphi tapa Ziza, Allon tapa, Jedaiah tapa, Simri tapa, Semaiah tapa;

³⁸Hiai minlohte a inkaw sung ua vaihawmte ahi uh: huan a pipute uh inkawte a khang mahmah uhi.

³⁹A ganhon uh adia loupanek zong ding in, guam suahlam pang tanpha in, Gedor lutna chiang pha in a pai uhi.

⁴⁰Loupa nek hoihna leh tamna a mu ua, gam za leh dai lah galmuang; tuma a huai a omte lah Ham a kipan ahi uhi.

⁴¹Hiai mingelhte Judah kumpipa Hezekiah damlai in a hongpai ua, a puaninte uh leh huai a om Meun in a sual ua, tunitan in, amaute a hihse vek ua, a mun uah a teng uhi; huailai a a gante uh adia louhing a om ziak in.

⁴²A lak ua khenkhatte, Simeon tapate, mi za nga, a heutute uh Ishi tapate Pelatiah, Neariah, Rephaiah, leh Uzziel makaih in Seir mual ah a hoh uhi.

⁴³A suakta Amalek mite lak a omlaite a sual ua, tunitan in, huai ah a tengta uhi.