Read Paite Chin 1 KRONIKIL 5 Bible Online

1 KRONIKIL 5 - Paite Chin bible

1 KRONIKIL 5

¹Huan Israel ta masapen Reuben tapate, amah piang masapen ahi; himahleh a pa lupna a hihbuah ziak in, a upa hihna Israel tapa Joseph tapate kiang a piak ahi; huchi in upatna dungzui in khangthu a kisim kei hi.

²A unaute tung ah Judah a vualzou a, amah a kipan in vaihawmtu a hongom a; himahleh upatna Joseph a ahi:

³Israel ta masapen Reuben tapate; Hanok, Pallu, Hezron, Karmi.

⁴Joel tapate: Semaiah a tapa, Gog a tapa, Shimei a tapa,

⁵Mikah a tapa, Reaiah a tapa, Baal a tapa;

⁶Beer a tapa, Assuria kumpipa Tilgath pilneser in a pimang; Reuben mite vaihawmtu ahi.

⁷Huan a khangthute uh khangthusutna a kisim lai a a inkuan kuan ua a unaute; hausapa, Jeiel, Zekariah,

⁸Bela Azaz tapa, Shema Joel tapa, Aroer teng, Nebo leh Baal meon pha a teng:

⁹Suahlam ah luipi Euphrates a kipan gamdai lutna pha in a tengta hi: Gilead gam a a gante uh a pun ziak in.

¹⁰Huan Saul damlai in Hagri mite toh a kidou ua, huaite a zou a: Gilead suahlam gam tengteng ah a puaninte uah a teng uhi.

¹¹Huan Gad tapate amau zawntak ah, Salkah tan in Bashan gam ah a teng uh:

¹²Joel hausapa leh, a zom Sapham, leh Janai, leh Saphat Bashan ah:

¹³A pipute uh inkawte a unaute uh: Mikael leh, Mesullam leh, Sheba leh, Jorai leh, Jakan, leh Zia, leh Eber, sagih.

¹⁴Hiaite Huri tapa Abihail tapate ahi uh, Jaro tapa, Gilead tapa, Mikael tapa, Jesisai tapa, Jahdo tapa, Buz tapa;

¹⁵Ahi Abdiel tapa, Guni tapa, a pipute uh inkawte hausapa.

¹⁶Bashan a Gilead ah, a khopite, Saron huapkhakte tengteng, a gamgi tanpha un, a teng uhi.

¹⁷Hiaite tengteng Judah Kumpipa Jotham damlai leh Israel kumpipa Jeroboam damlai in a khangthute in sim in a omvek uhi.

¹⁸Reuben tapate leh, Gad mite leh Manasseh nam kimkhat mihangsante, namsau leh lum thuahthei mite, leh thalpeu a kap ding, kidou siam, galkap dia kuanthei, singli, sangli, za sagih leh sawmguk ahi uh.

¹⁹Hagarit mite, Jetur toh, Naphish toh, Nodab toh a kidou uhi.

²⁰Amaute dou ding in panpih in a om ua, huchi in Hagarit mite a khut ua piak in a om ua, a kiang ua om tengteng toh; amau lah Pathian kiang ah kidouna ah a kap ngal ua, Pathian in a ngetna uh a za a; amah a muanna uh a koih ziak un.

²¹Huchi in a gante uh a lamang ua; a sangawngsau uh sing nga, belam nuai nih leh sing nga, sabiltung za nih, mite nuai khat.

²²Kidouna Pathian a a hih ziak in, mi tampi petmah a puk uhi. Huchi in saltanna tanpha in a mun uah a tengta uhi.

²³Huan Manasseh nam kimkhatte tate gamsung ah a teng ua: Bashan a kipan Baal hermon leh Senir leh Hermon mual tan in a pung uhi.

²⁴Hiaite Epher, Ishi, Eliel, Azriel, Jeremiah, Hodaviah, Jahdiel, mi hat hangsante, mi minthangte, a pipute uh inkawte lupente ahi uhi.

²⁵Huchi in a pipute uh Pathian dou in a talek ua, a ma ua Pathian in a hihsiat, gam a mite pathiante lak ah ang a kawm uhi.

²⁶Israel Pathian in Assuria kumpipa Pul kha leh, Assuria kumpipa Tilgath pilneser kha a tokthou a, huchi in amaute a pimang a, Reuben mite leh, Gad mite leh, Manasseh nam kimkhatte mahmah, tunitan in Halah, leh Habor, leh Hara, ah amaute a pia, Gozan lui pha in.