Read Paite Chin 2 KRONIKIL 1 Bible Online

2 KRONIKIL 1 - Paite Chin bible

2 KRONIKIL 1

¹Huan, David tapa Solomon a gamsung ah hatsak in a om a; TOUPA a Pathian a kiang ah a om a, nakpi mahmah in a thupisak hi

²Solomon in Israel tengteng, sepaih sang heutu, za heutu, vaihawmmi, Israel gam tengteng a milian, inkuan a intekpen tengteng a houpih hi.

³Huchi in, Solomon leh kikhawm tengteng Gibeon khua a mun sang ah a hoh ua; huai ah TOUPA sikha Mosi in gamdai a a bawl Pathian biakna buk a om hi.

⁴Pathian bawm bel David in a nabawl khitsa mun ah Kiriath-jearim a kipan David in a latou khin a; Jerusalem ah a koihna ding puanin a zak khitsa him ahi.

⁵Huan, Hur ta Uri tapa Bezalel bawl dal maitam TOUPA biakna buk chin ah a om behlap a; Solomon leh mipite’n a vazuan uhi.

⁶Solomon bel kihoupihna puanin chin a dal maitam omna TOUPA ma ah a hohtou a, haltum thillat sang khat a lan hi.

⁷Huai zan in Solomon kiang ah Pathian a kilak a, a kiang ah, “Bang ahia k’on piak ding hon ngen in” a chi hi.

⁸Huchi in Solomon in Pathian kiang ah, “Ka pa David kiang ah hehpihna thupitak na langsak a, a sik in kumpipa in n’on bawlta a

⁹Aw TOUPA Pathian, ka pa David kiang a na thuchiam hih tangtun in; nang lei a leivui zah mipite kumpipa in n’on bawlta hi.

¹⁰Huchi in hiai mipite ma a lut leh pawt a ka om theihna ding in pilna leh theihna honpia in; na mi hiai zahzah vai kuan ahia hawmsak thei ding?” a chi hi.

¹¹Huchi in Pathian in Solomon kiang ah, “Hichibang lungsim na puta, sum leh paite, hauhsaknate, pahtawinate, nang hon mudahte hinnate ngen lou a, damsawtnate leng ngenlou a, a tung ua kumpipa a k’on bawl na mite vai na hawmsak theihna ding a pilna leh theihnate n’on nget zawk ziak in, pilna leh theihna piak na hita hi.

¹²Huchi in na ma a Kumpipate’n a na neih ngeilouh uh, nang nung a leng a neih hetlouh ding uh sum leh paite, hauhsaknate, pahtawinate k’on pelai ding” a chi hi.

¹³Huchi in Solomon mun sang chin a biakbuk omna Gibeon khua a zin Jerusalem ah a pai a, Israel tung ah vai a hawmta hi.

¹⁴Huan, Solomon in kangtalaite leh sakol tungtuangmite a kaikhawm a; kangtalai sang khat leh za li leh sakol tungtuangmi sing khat leh sang nih a nei a, huaite kangtalai koihna khuate leh Jerusalem khua a kumpipa omnate ah a koih hi.

¹⁵Huchi in kumpipa’n Jerusalem khua ah dangkaeng leh dangkasikte suangtum bang mai in a koih a, sidar singte leng phaizang a theipi sing bang a tam in a koih lai hi.

¹⁶Solomon neih sakolte Aigupta gam a kipan a lakkhiak ahi; kumpipa sumsinmite’n huaite a honhon in a khakzel ua, a hon a leizel ahi.

¹⁷Aiguptate gam a kangtalaite bel dangkasik sekel za guk zel in a leikhiaksak zel ua; sakolte dangkasik sekel za leh sawmnga zel in; huchi mah bang in Hitte kumpipa tengteng leh Suria kumpipate kiang ah leng a zuaksawn zel uhi.