Read Paite Chin 2 KRONIKIL 12 Bible Online

2 KRONIKIL 12 - Paite Chin bible

2 KRONIKIL 12

¹Huan, hichi ahi a, Rehoboam gam a hon phuhkipa, mi hattak a hong hihnung in amah lam a pang Israel tengteng toh TOUPA Dan a lehngatsan uhi.

²Hichi a honghi a, kumpipa Rehoboam vaihawm kum ngana kum in, TOUPA tung a a tatlek ziak un, Aigupta kumpipa Sisak Jerusalem sim ding in a hong kuantou hi,

³Kangtalai sing khat leh sang nih leh sakol tungtuang mi sing guk toh: Aigupta gammi honzui simvuallouh ahi uh; Lubte, Sukite, Ethiopiate ahi uhi.

⁴Judah gam a kulhnei khuate a la a, Jerusalem a vatung hi.

⁵Zawlnei Semaiah, Rehoboam leh Judahte intekpen, Sisak ziak a Jerusalem a kikaikhawmte kiang ah a hohtou a, a kiang uah, “TOUPA’N hichi in a chi, n’on lehngatsanta ua, huaiziak in ken leng nou Sisak khut ah k’on koihta ahi a chi” a vachi hi.

⁶Huchi in Israel intekpente leh kumpipa a kiniamkhiak ua, “TOUPA a diktat hi” a chi uhi.

⁷TOUPA’N a kiniamkhiak uh a theih in TOUPA thu Semaiah kiang ah a hongtung a, “A kiniamkhiakta ua; ka hihmang vek kei ding a, khenkhat ka humbit ding a, Sisak zang in Jerusalem tung ah ka hehna ka sungbaw kei ding hi.

⁸Himahleh a sikhate ahi ding ua, ka nasep leh gamdang mi nasep dan a theihna ding un” chi in.

⁹Huchi in Aigupta kumpipa Sisak Jerusalem sim in a paitou a, TOUPA inn a goute leh kumpipa inn a goute a la a; a lakhin vek hi; Solomon bawl dangkaeng lumte leng a la hi.

¹⁰Kumpipa Rehoboam in huaite tang in dal lumte a bawl a, kumpipa inn kongkhak ngakmi sepaih heutute a kemsak hi.

¹¹Hichi ahi a, kumpipa TOUPA inn a lutteng in vengmite’n a vapi ua, amah dantan ah a kha kiknawn zel uhi.

¹²A kiniamkhiak ziak in hih manthat ahihlouhna ding in a tung a TOUPA thangpaihna a kiheimangta a; Judah gam leng a hoih gige hi.

¹³Huchi in kumpipa Rehoboam in a vaihawmna Jerusalem ah a kipsakta hi: Rehoboam a vaihawm pattung in kum sawmli leh kum khat a upa ahi, TOUPA’N a min omsakna ding a Israel nam tengteng lak a tel khua Jerusalem ah kum sawmlehsagih vai a hawm a; a nu min Naamah, Ammon mi ahi.

¹⁴TOUPA zong dia a lungsim a zatlouh ziak in thil hoihlou a hih hi.

¹⁵Huchi in Rehoboam tanchin a bul a kipan a tawppha in zawlnei Semaiah gelh tanchin bu ah leh zawlnei Iddo gelh tanchin bu a suante tanchin lak a gelh ahi kei maw? Rehoboam leh Jeroboam bel a kidou nilouhlouh uhi.

¹⁶Huan, Rehoboam a pi leh pute kiang ah a ihmu a, David khua ah a vui ua: a sik in a tapa Abijah in vai a hawm hi.