Read Paite Chin 2 KRONIKIL 14 Bible Online

2 KRONIKIL 14 - Paite Chin bible

2 KRONIKIL 14

¹Huchi in Abijah bel a pi leh pute kiang ah a ihmu a, David khopi ah a vui ua, a sik in a tapa Asa in vai a hawmta: a vaihawm sung in a gam uh kum sawm galmuang in a om hi.

²Asa in TOUPA a Pathian mitmuh in thil hoih leh thil dik a hih gige hi.

³Gamdang pathian maitamte leh munsangte a lamang a, suangphuhte a hihchim a, Aserah songte a hihtam hi.

⁴Judahte TOUPA a pi leh pute uh Pathian zong ding leh a dan leh a thupiak zui ding in thu a pia hi.

⁵Huan, Judahte khua tengteng a munsangte leh milimte a lamang vek a; amah nuai ah a gam galmuang in a om hi.

⁶Judah gam ah kulhnei khuate a bawl a, gam galmuang in a om a, huai kumte in kidouna a neikei a, TOUPA’N galmuanna a piak ziak in.

⁷Judahte kiang ah, “Hiai khuate bawl phanawn ni e, kulh in um le hang, insangte, kulh kongkhakte, a kalhnate bawl ni: TOUPA i Pathian i zon tak ziak un gam i nuai uah a hong omta ahi: amah i zong ua, aman kilchih ningchih a galmuang a omna hon peta ahi” a chi hi. Huchi in a bawlpha ua, a lamzang zelta uhi.

⁸Asa in Judah mi lum leh tei tawi mi sepaih nuai thum a nei a: Benjamin mi phaw leh thal zangmi nuai nih leh sing giat; huai tengteng mi hat hangsan vek ahi uhi.

⁹Huan, Ethiopia mi Zerah, sepaih maktaduai khat leh kangtalai za thum toh amau sual ding in a hong kuan a; Maresah a hongtung hi.

¹⁰Huchi in Asa bel sual din a vakuan a, Maresah ah Zephathah guam ah a kiphalh uhi.

¹¹Asa in TOUPA a Pathian a sam a, “TOUPA kia loungal mi hattak lak a hatlou panpih a omkei a; aw TOUPA ka Pathian uh, hon panpih ve; nang hon muang in na min in hiai mipite ka hongsual uhi. Aw TOUPA, ka Pathian uh na hi a, mihing in nang hon zou kei uhen” a chi hi.

¹²Huchi in TOUPA’N Asa leh Judahte ma ah Ethiopia mite a sual a; Ethiopia mite a taikekta uhi.

¹³Asa leh a heute’n Gerar tan in a delh ua, Ethiopia mite si a tam mahmah ziak un a pang theikei ua; TOUPA leh a sepaihte ma ah vuallelh sak in a omta ua; gallak tampi a la uhi.

¹⁴Gerar kim a khua tengteng a sual ua, TOUPA launa a tung uah a om a, khua tengteng a lok ua, gallak a tam ngial hi.

¹⁵Ganpute puaninte leng a sual ua, belam leh sangawngsau tampi a hawl ua, Jerusalem ah a pai nawnta uhi.