Read Paite Chin 2 KRONIKIL 15 Bible Online

2 KRONIKIL 15 - Paite Chin bible

2 KRONIKIL 15

¹Oded tapa Azariah tung ah Pathian kha a hongtung hi.

²Asa dawn ding in a paikhia a, a kiang ah, “Asa leh Judah mi tengteng leh Benjamin mite aw, ka thu ngaikhe dih ua, a lam a na pan sung teng un TOUPA nou lam ah a pang, amah na zon uleh na mu ding ua, amah na lehngatsan uleh aman a hon lehngatsan ding.

³Israel mite sawtpi Pathian tak neilou leh sinsakmi leh siampu neilou leh dan neilou in a om uhi.

⁴Himahleh, a mangbat ua TOUPA Israelte Pathian lam a ngat ua, a zon tak un a mu uhi.

⁵Huailai in a pawt lam leh a lut lamte ading in galmuanna a omkei a, gamsung a om tengteng adin mangbatna thupi mahmah ngen ahizaw.

⁶Nam leh nam, khua leh khua a kihihsia ua, Pathian in haksatna chiteng in a haksasak ahi.

⁷Himahleh, nou zaw hattak in om unla, kithadah sak kei un, na thilhih man uh na mu ding uhi” a chi hi.

⁸Huchi in Asa in huai thute leh zawlnei Oded thugente a zak in a kihangsaka, Judah gam leh Benjamin gam tengteng a kipan leh Ephraim tang gam a kholaka kipan a thil kihhuaite a paimang vek a; TOUPA inn lim chin a TOUPA maitam a bawlpha hi.

⁹Judah gam leh Benjamin gammi tengteng, a kiang a om Ephraim leh Manasseh leh Simeon gam a mite toh a samkhawm vek a: TOUPA Pathian a kiang ah a om chih a theih un Israel gam apan in a hong bel vek uhi.

¹⁰Huchi in Asa kum sawm leh kum nga a vaihawm kum, a kha thumna ah Jerusalem ah a ki kaikhawm uhi.

¹¹Huai ni’n a gallak uh bawngtal za sagih leh belam sang sagih in TOUPA kiang ah a kithoih uhi.

¹²A lungsim uh leh a lungtang tengteng un TOUPA a pi leh pute uh Pathian zong ding leh;

¹³Kuapeuh TOUPA Israelte Pathian zong lou a lian a neu, a numei a pasal in hihlup ding thu a khung uhi.

¹⁴Huchi in TOUPA kiang ah aw ngaihtak a ging in, kikou in, pengkul ging toh, pengkul binei ging toh a kichiam uhi.

¹⁵Judah mi tengteng a kichiamna uah a kipak ua, a lungtang tak ua kichiam a, kituak tak a a hih ziak un, muh leng a mu him ua; huchi in TOUPA’N munchih ah galmuang a omna a pia hi.

¹⁶Kumpipa Asa nu Maakah leng milim kihhuai tak Aserah a bawlsak ziak in a kumpinu hihna a tawpsak a; huchi in Asa in milim a phuk a, a hihzan vek a, Kidron lui ah a hal hi.

¹⁷Himahleh, Israel gam a kipan munsangte paihmang ahi kei a; himahleh Asa lungsim a vaihawm sung in a kizen gige hi.

¹⁸Apan thil a lat leh amah latte dangkasik, dangkaeng, tuium-belsuan Pathian inn ah a lalut hi.

¹⁹Asa vaihawm lai kum sawmthum leh nga sung in kidou himhim a omkei hi.