Read Paite Chin 2 KRONIKIL 16 Bible Online

2 KRONIKIL 16 - Paite Chin bible

2 KRONIKIL 16

¹Asa kum sawmthum leh guk a vaihawm kum in Israel kumpipa Baasha in Judahte a sual a, Judah kumpipa kiang a lut ding leh pawt ding dalna ding in Ramah khua a bawl hi.

²Huchi in Asa in TOUPA inn leh kumpipa inn a gou dangkasik leh dangkaengte a lakhia a, Damaska a Suria kumpipa Benhadad kiang ah,

³“Ka pa leh na pa kal a thukhun a om bangmah in i kikal ah thukhun a om a, ngai dih, dangkasik leh dangkaengte k’on khak ahi; kisa dih, Israel kumpipa Baasha in a hon tawpsanna ding in a kiang ah na thukhun phel nawn mai in” chi in a khak hi.

⁴Huchi in Benhadad in kumpipa Asa thu a na pom a; Israel khuate sual ding in sepaih heutute a sawl a, Ijon khua, Dan khua, Abel maim khua, Naphtali gam a van koihna khua tengteng a sual uhi.

⁵Hichi ahi a, Baasha in huai thu a zak in Ramah khua a bawl lai a khawlsan a, a thilhih tup a kikhelsakta hi.

⁶Huchi in, kumpipa Asa in Judah mi tengteng a pi a. Baasha in Ramah khua bawlna ding a suang leh sing a zatte a la vek ua, huaite in Geba leh Mizpah khua a bawl hi.

⁷Huailai in zawlnei Hanani Judah kumpipa Asa kiang ah a hong a, a kiang ah, “TOUPA na Pathian muang lou in Suria kumpipa na muang a, huaiziak in Suria kumpipa sepaih honte na khahta ahi.

⁸Ethiopiate leh Lubte sepaih hon liantak, kangtalai leh sakol tungtuangmite tampi ahi kei umaw? Himahleh TOUPA na muan ziak in na khut ah a honpia hi.

⁹A lam a lungsim diktak pumite tung a a hatdan hihlang ding in khovel tengteng ah TOUPA mit a vak dundun hi. Haihuai mahmah in thil na hihta a; tuban dou na nei gige ding a chi hi.

¹⁰Huchi in, Asa bel zawlnei tung ah a heh a, suangkulh ah a khumta a; a thugen ziak in a heh mahmah mai hi. Asa in mi khenkhatte leng a simmawh behlap lai hi.

¹¹Huan ngai dih ua, Asa tanchin a bul a kipan a a tawppha in Judah leh Israel kumpipate tanchin gelhna bu ah a tuang ahi.

¹²Kum sawmthum leh kua a vaihawm kum in Asa bel a khe a hong nata a; a natna thupitak ahi; himahleh a natna ah TOUPA zong lou in damdawi siamte a zong zaw hi.

¹³Huchi in Asa bel a pi leh pute kiang ah a ihmu a, kum sawmli leh khat a vaihawm kum in a si hi.

¹⁴David khopi a amah a tuam dia a hankhuak ah a vui ua, gimlim tak, gimlim bawlmite’n gimlim chi tuamtuam a dim a kibawl lupna ah a sial ua, amah a tuam ding in meikuang thupi mahmah a sem uhi.