Read Paite Chin 2 KRONIKIL 18 Bible Online

2 KRONIKIL 18 - Paite Chin bible

2 KRONIKIL 18

¹Huchi in Jehosaphat bel a hong hau in a thupi mahmah a, huchi in Ahab toh kizopna a bawl hi.

²Kum bangzah hiam nung in Samaria ah Ahab kiang ah a hohsuk a, Ahab in amah leh a heute belam leh bawngtalte tampi a na goh a, Ramoth Gilead khua a hoh touhpih ding in a chial hi.

³Israel kumpipa Ahab in Judah kumpipa Jehosaphat kiang ah, “Ramoth Gilead khua ah i hohtou khawm kei dia hia?” a chi hi. Aman a dawng a, “Kei leh nang, ka mite leh na mite pumkhat i hi ua, gal i dou khawm ding uh” a chi hi.

⁴Jehosaphat in Israel kumpipa kiang ah, “TOUPA thu hungaih phot lai in” a chi hi.

⁵Huchi in Israel kumpipa’n, zawlneite mi za li a samkhawm a, a kiang uah, “Ramoth Gilead khua sual ding in ka kuan ding uam, kuan lou ding?” a chi hi. Amau “Kuan in, Pathian in kumpipa khut ah a pe ding” a chi uhi.

⁶Himahleh Jehosaphat in, “TOUPA zawlnei kuate hiam i dot ding a omkei ua eita aw?” a chi hi.

⁷Israel kumpipa’n Jehosaphat kiang ah, “TOUPA hon dotsak ding mi khat a om hi; himahleh amah bel ka muhdah lamtak ahi; ka tungtang thu a hoihlou lam kia loungal a hoih lam himhim a gen ngeikei a; huai mi bel Imla tapa Mikaiah ahi” a chi hi.

⁸Huchi in Israel kumpipa’n heutu khat a sam a, “Imla tapa Mikaiah honpi meng dih” a chi hi.

⁹Israel kumpipa leh Judah kumpipa Samaria kulh kongpi lutna chin mun awng ah a kumpi puan ua kizem in a mangtutphah tuaktuak uah a tu ua; zawlnei tengteng in a ma uah thu a gen uhi.

¹⁰Kenaanah tapa Zedekiah in sik kite a bawl a, TOUPA’N hichi in a chi, “Hiaite in Suriate mangthang sipsip khop in na sual ding a chi” a chi hi.

¹¹Huchi mah bang in zawlnei dangte’n leng, “Ramoth Gilead ah hoh inla, lamzang in; TOUPA’N kumpipa khut ah a pe ding hi” chi in a gen uhi.

¹²Mikaiah sam dia a sawlpa un, “Ngai dih, zawlneite’n kithutuak in a hoihlam in kumpipa kiang ah thu a gen chiat ua; huaiziak in nang leng a chihsa bang un a hoihlam in vagen samdih ve” chi’n a gen hi.

¹³Huan, Mikaiah in, “TOUPA hinna lou in ka chi hi, ka Pathian in a chih bang geih in ahi ka gen ding” a chi hi.

¹⁴Huchi in kumpipa kiang a tun in kumpipa’n a kiang ah, “Mikaiah Ramoth Gilead khua sual ding in ka kuan ding uam kuan lou ding?” a chi hi. Aman, “Kuan unla, va lamzang un, na khut a piak ahi ding hi,” a chi hi.

¹⁵Kumpipa’n a kiang ah, “Thutak keleu lou ka kiang ah TOUPA min a genlou ding in bangzahvei ahia nang k’on kichiamsak ding?” a chi hi.

¹⁶Aman “Belam chingtu neilou bang in Israel tengteng tang ah dalhzak in ka mu a; TOUPA’N, hiaite’n heutu a neikei ua, amau in lam ah lungmuangtak in pai diam uhen a chi” a chi hi.

¹⁷Israel kumpipa’n Jehosaphat kiang ah, “Ka tungtang thu zaw a selam kia loungal a hoihlam himhim ahihleh a gen sam kei ding chih k’on hilh ahi kei maw?” a chi hi.

¹⁸Mikaiah in a gennawn a, “TOUPA thu ngaikhia un, TOUPA a mangtutphah a tu, van mipite tengteng a taklam leh a veilam ading ka mu hi.

¹⁹TOUPA’N Israel kumpipa Ahab Ramoth Gilead a vakuana, va si ding a kua’n ahia khem ding? a chih chiang in khat in, ‘Huchi khachi in,’ a chi a, midang in, ‘huchibang khachibangin’ a chi hi.

²⁰Kha khat a hongpawt a, TOUPA ma ading in, ‘ken ka khem ding,’ a chi hi. TOUPA’N a kiang ah, bang in eita? a chi hi.

²¹Aman, ‘ka vahoh ding a, zawlneite tengteng kam ah kha zuauthei in ka vasuak ding,’ a chi hi. Huan aman, na va khem ngei ding a, na lohching ding, kuan inla, huchibang in hih in,’ ” a chi hi.

²²Huchi in ngai dih, TOUPA’N “Hiai zawlneite kam ah kha zuauthei a koih a; na tungthu TOUPA’N a hoihlou lam in a genta ahi,” a chi hi.

²³Huaitak in Kenaanah tapa Zedekiah in a vanaih a, Mikaiah biang ah a beng a, “Na kiang a thugen ding TOUPA kha in koilam a hon pawtsan ahia?” a chi hi.

²⁴Mikaiah in, “Ngai dih, dantan sunggil a bu ding a na lut ni chiang in n’on thei ding” a chi hi.

²⁵Huchi in, Israel kumpipa’n, “Mikaiah pi unla, khaw ukpa Ammon leh kumpipa tapa kiang ah paipih nawn un,

²⁶Kumpipa’n hichi in a chi a, ‘hiai mi suangkulh ah khum unla, lungmuangtak a ka hongpai nawn masiah gimthuakna an leh gimthuakna tui pia un,’ a chi a, na chi ding uh” a chi hi.

²⁷Huan, Mikaiah in, “Lungmuangtak a na hongpai nawn peuhmah leh TOUPA’N kei honzang a thu genlou a hi ding hi” a chi a, amahmah in, “Nou mipi tengteng in leng na za un” a chi hi.

²⁸Israel kumpipa leh Judah kumpipa Jehosaphat bel Ramoth Gilead khua ah a vahoh tou uhi.

²⁹Israel kumpipa’n Jehosaphat kiang ah, “Kei ka kibawl lamdang ding a, kisualna ah ka hoh sam ding; nang zaw na kumpipa puan kisilh in” a chi hi. Huchi in Israel kumpipa bel a kibawl lamdang a, kidouna ah a hoh tou hi.

³⁰Suria kumpipa’n a kangtalaite tung a heutute kiang ah, “Israel kumpipa loungal mi neu leng milian leng na sual ding uh ahi kei” chi’n thu a pia hi.

³¹Hichi ahi a, “Kangtalai tung a heutute’n Jehosaphat a muh uleh Israel kumpipa eive” a chi ua. Huchi in sual tum in a umta uhi; himahleh Jehosaphat a kikou a, TOUPA’N a panpihta a, huchi in Pathian in amau amah a nuse sak hi.

³²Huchi in hichi ahi a, kangtalai tung a heutute’n Israel kumpipa ahi kei chih a theih un delhlou in a kiksan nawnta uhi.

³³Mi khat in ngim tuam neilou in a thalpeu a lai a, Israel kumpipa a awmphaw leh a awmphaw kikal ah a kap a, huchi in a kangtalai hawlpa kiang ah, “Leh hawl inla, mipi lak a kipan hon paikhiakpih in, liamna natak ka tuak hi” a chi hi.

³⁴Huai ni’n kisualna a thupi mahmah a; Israel kumpipa bel Suriate lam nga in a kangtalai ah nitaklam tanpha in ading a; huan nitum kuan in a sita hi.