Read Paite Chin 2 KRONIKIL 19 Bible Online

2 KRONIKIL 19 - Paite Chin bible

2 KRONIKIL 19

¹Judah kumpipa Jehosaphat bel lungmuangtak in Jerusalem a a inn ah a pai nawnta hi.

²Huchi in zawlnei Hanani tapa Jehu in a na dawn a, kumpipa Jehosaphat kiang ah, “Migilou na panpih in TOUPA haw mite na it ding ahi maw? Hiai ziak in TOUPA thangpaihna, na tung ah a hong omta hi.

³Himahleh hiai gam a kipan Aserah na paimang a, TOUPA na zon ziak in hoihna lam banghiam khat na neilai hi,” a chi hi.

⁴Jehosaphat bel Jerusalem ah a om a; huan Beer — sheba a kipan a Ephraim tanggam pha in a mite lak ah a hoh nawn a, TOUPA, a pi leh pute uh Pathian lam ah aman a pi kiknawn vek hi.

⁵Huchi in khochih ah Judah gam kulhnei khua tengteng ah vaihawmmite a koih a, vaihawmmite kiang ah,

⁶“Na thilhih uh hoihtak a ngaihtuah in hih un, mihing ading a vaihawm na hi kei ua, TOUPA ading ahizaw ngal a; vaihawmna ah na kiang uah a tel zel ahi.

⁷Huaiziak in, TOUPA lau unla, pilvangtak in hih un; TOUPA i Pathian ah gitlouhna, khentuam neihna leh golh neknate a omkei” a chi hi.

⁸Huchi in Jehosaphat in Jerusalem ah TOUPA vaihawm ding leh thubuaite lemmi ding in Levite, siampute, Israel inkaw intekte a koih behlap hi.

⁹“TOUPA laudan siam kawm in muanhuaitak in, lungsim diktak pu in na hih ding uh ahi.

¹⁰Koilai khua a mi in leng thubuai a hong gen ua, tualthah thu, dan leh thupiak thu, thuseh leh vaihawm thute a hong kilan uleh, TOUPA tung a thil a hikhelhlouhna ding un amau pilvang in na hilh ding ua, nou leh na unaute uh tung ah thangpaihna a hongtung zenhouh kha ding; huchibang in hih le uchin, mawhsak in na omkei ding uhi.

¹¹Huan, Ngai dih ua, TOUPA lam thu tengteng ah siampu lianpen Amariah bel na heutu uh ahi a; kumpipa lam thu tengteng ah Judah inkaw tung a vaihawmmi Ishmael tapa Zebadiah ahi: Levite leng na heutute uh ahi sam ding uh. Hangtak in hih unla, mi hoihte kiang ah TOUPA om hen’ ” a chi hi.