Read Paite Chin 2 KRONIKIL 2 Bible Online

2 KRONIKIL 2 - Paite Chin bible

2 KRONIKIL 2

¹Huan, Solomon in TOUPA min ading inn leh kumpipa inn ding toh lam a tum hi.

²Solomon in van paw ding mi sing sagih leh, mual a sing phukmi sing giat leh amau vengmi sang thum leh za guk a sep hi.

³Solomon in Tura kumpipa Huram kiang ah, “Ka pa David thil na hihsak a, a omna inn lamna ding sidarte na khak bang in, keileng hon kithuahpih sam in.

⁴Ngai dih, TOUPA ka Pathian min a inn amah adia lam a, a ma a gimlim hala, tanghou siah koih gige a, khawlnite, kha thakte, TOUPA ka Pathian Ankuanglui nite a zingsang leh nitak a haltum thillat latna ding inn ka lam ding ahi. Hiaite Israelte ading in tangtawn thuseh ahi.

⁵Huchi in ka inn lam tup thupi mahmah ding ahi, ka Pathian uh Pathian tengteng sang a thupizaw a hih ziak in.

⁶Van, vante van ah leng talou ahi ngal a, kuan ahia a inn lamsak thei ding? Kei, a ma a gimlim halna ding lel chihlouh ngal kei leltakin ka lamsak thei mahmah ding hia?

⁷Huchi in Judah gam leh Jerusalem a mi khutsiamte ka pa David in a na zatsek tuin ka kiang a omte lak a sem ding in mi khat, dangkaeng, dangkasik, dal, sik lam khoih thei, puan sandup, sanau, dumpuang bawl siam, gelh bangchibang peuh siammi honsawl in.

⁸Lebanon a sidar sing, meilah sing, algum sing leng hon khak lechin; na mite’n Lebanon a singphuk a siam mahmah uh chih ka thei ngal a; huchi in ngai dih, ka mite nang mite lak ah tel sam le uh,

⁹Sing tampi hon ngaihtuah sak ding: ka inn lam tup a thupi mahmah ding ahi.

¹⁰Ngai dih, na singphukmite huit buh pawt a a sing nih leh barli buh pawt a sing nih leh uain bath sing nih leh thau bath sing nih ka pe ding” chi in mi a sawl hi.

¹¹Huchi in Tura kumpipa Huram in, “Toupa’n a mite a it ziak in a kumpipa ding ua nang honbawl eive” chi in Solomon lai in a dawng hi.

¹²Huram in, “TOUPA, Israelte Pathian, lei leh van bawlpa, TOUPA inn leh kumpipa inn lam ding a pilna leh theihna nei tapa piltak kumpipa David pepa phat in om hen.

¹³Mi khutsiam, theihtheihna nei, ka pa Huram amah mah, k’on sawl a,

¹⁴Dan suan a mi numei khat tapa ngei, a pa bel Tura khua a mi, dangkaeng lam, dangkasik lam, dal lam, sik lam, suang lam, sing lam, puan sandup, dumpuang, puanmalngat, sandang khoihsa, gelh bangchibang leng siam, siam chiteng siam ahi a; nang mi khutsiamte leh ka pu na pa David khutsiamte lak ah a hongsem ding uhi.

¹⁵Huchi in huit buh, barli buh, thau, uain thu ka toupa’n a gen a sikhate hon khak hen;

¹⁶Huchi in kou Lebanon a sing na deih zahzah ka na phuk ding ua, tuipi ah Jopa tan in k’on tolhsak ding uh; huan, nang Jerusalem ah na nawn tou ding” a chi hi.

¹⁷Huan, Solomon in Israel gam a a pa David in a simsa, namdang mi tengteng a sim a, nuai khat leh sing nga leh sang thum leh za guk ahi uh.

¹⁸Huchi in van paw ding mi sing sagih leh mual a sing phuk mi sing giat leh, mipite sepdan ngaihtuahsak ding mi sang thum leh za guk a sep hi.