Read Paite Chin 2 KRONIKIL 21 Bible Online

2 KRONIKIL 21 - Paite Chin bible

2 KRONIKIL 21

¹Jehosaphat a pi leh pute kiang ah a ihmu a, a pute lak ah a pu David khopi ah a vui uhi. A tapa Jehoram a sik in a lalta hi.

²Aman unau, Jehosaphat tapate a nei a, Azariah, Jehiel, Zekariah, Azariah, Mikael leh Sephatiah ahi uh. Hiai tengteng Israel kumpipa Jehosaphat tapate vek ahi uhi.

³A pa un thil thupitak tak a pia a, dangkasik, dangkaeng, thil mantam pipite, Judah gam a kulhnei khuate toh; himahleh gamte pen Jehoram a pia a, a ta upapen a hih ziak in.

⁴Huchi in, Jehoram in a pa gamluah in a hong kihihhatta a, a unaute tengteng namsau in Israelte lak a intek tampi toh a that vek hi.

⁵Jehoram bel kum sawmthum leh nih a upa a hih in vaihawm apan a: Jerusalem ah kum giat vai a hawm hi.

⁶Ahab inkawte hih bang in Israel kumpipate lampi a zui hi: Ahab tanu zi in a nei hi: huchi in TOUPA mitmuh in thil hoihlou tak a hih hi.

⁷Himahleh, TOUPA’N David inkawte a hihmang nuam kei a, David kiang a thukhun ziak leh amah leh a suante tan a khawnvak neihsak thak a na chiam khit ziak in.

⁸Amah damlai in Edomte Judahte lak a kipan a hel ua, kumpipa a kibawl tawm ua.

⁹Huchi in Jehoram a sepaih heutute leh a kangtalai tengteng toh a kuan khia a, zan in a kuan a, amau leh kangtalai tung a heutute amau umkual Edomte a sual hi.

¹⁰Huchi in Edomte tunitan in Judahte lak ah a hel lailai uhi; huailai mah in Libnah khua leng a hel uhi. TOUPA, a pi leh pute uh Pathian a lehngatsan ziak in.

¹¹Huan, Judah gam tangte ah munsang a bawl a, Jerusalem mite a angkawm sak a, Judahte a pimang hi.

¹²Huchi in zawlnei Elijah a kipan a kiang ah lai a hongtung a “TOUPA, na pu David Pathian in hichi in a chi, ‘Na pa Jehosaphat lampite na tawn kei a, Judahte kumpipa Asa lampite leng na zuikei hi.

¹³Israel kumpipate lampi na zui zaw a, Judahte leh Jerusalem a omte Ahab inkuan bang in ang na kawmsak a, na unau, na pa inkuante nang sang a hoihzaw na thahlai ziak in.

¹⁴Ngai dih, TOUPA’N na mite, na tate, na zite, na gante hipi in a gawt ding a;

¹⁵gilpi natna thupi mahmah na nei ding a, niteng in natna ziak a na ngoi teng a tolhkhiak vek tan in na china ding hi” chi in.

¹⁶Huchi in, Ethiopia mite kiang a mi Philistiate leh Arabia te lungsim Jehoram sual ding in TOUPA’N a tokthou hi.

¹⁷Huchi in, Judate a vasual ua, a gam uah a lut ua, kumpipa inn a thil tengteng a la vek ua, a tapate, a zite uh leng; a tapa naupangpen Jehoahaz lousiah a tapa dang a nutsiat kei uhi.

¹⁸Huai nung in TOUPA’N hihdam theilouh gilnatna in a gawt a.

¹⁹Huan, hichi ahi a, a kum nihna a bei in a natna ziak in a ngoi a pilhkhia khia a, natna mulkimhuaitak in a sita hi. A mite’n a pa meipi a sehsak bang un a sehsak kei uhi.

²⁰A vaihawm tung in kum sawmthum leh nih ahi a, Jerusalem ah kum giat vai a hawm a, kuamah it louh in a si a, David khopi ah kumpipate han lou ah a vui uhi.