Read Paite Chin 2 KRONIKIL 24 Bible Online

2 KRONIKIL 24 - Paite Chin bible

2 KRONIKIL 24

¹Joash bel a vaihawmpat tung in kum sagih a upa ahi; Jerusalem ah kum sawmli vai a hawm a; a nu min Jibiah, Beer — sheba mi ahi.

²Joash in siampu Jehoiada damsung in TOUPA mitmuh in thil hoih a hih hi.

³Jehoiada in amah zi nih a guan a, tapa leh tanute a nei hi.

⁴Huan, hichi ahi a, huai nung in Joash in TOUPA inn bawl phat lungsim in a nei hi.

⁵Siampute leh Levite a kaikhawm a, “Judate khuate ah hoh unla kum teng a na Pathian inn uh bawl phatna ding in Israel mi tengteng kiang ah sum leh pai khonkhawm unla, zekai kei un” a chi hi. Himahleh Levite a kintat tuankei uhi.

⁶Huchi in, kumpipa’n siampu lianpen Jehoiada a sam a, a kiang ah, “Bangdia Levite TOUPA sikha Mosi leh Israel mipite seh theihsak a puanin adia thoh bikhiah seh Judah mi leh Jerusalem mite thoh ding a phutlou na hia?

⁷Migilou nu Athaliah tapate’n lah Pathian inn a hihse khinta ua, huan, TOUPA inn a thillat tengteng Baalte a pekhin behlap lai uhi” a chi hi.

⁸Huchi in, kumpipa’n thu a pia a, bawm a bawl ua, TOUPA in kongpi pawlam ah a koih ua.

⁹Gamdai a Pathian sikha Mosi in Israel mite hihding a thoh bikhiah a seh TOUPA ding a thoh ding in Judah gam tengteng leh Jerusalem ah thu a thangsakta hi.

¹⁰Huchi in miliante leh mipite a kipak ua, a dangkate uh a honla ua, a khon khit masiah uh bawm ah a hong koihkoih mai uhi.

¹¹Levite’n kumpipa upate kiang a bawm a hontawi ua, dangka tampi a om chih a theih un kumpipa Laigelhmi leh siampu kumpipa seh upa in bawm a kipan a bung khia a, a la ua, a mun ah a koih nawn uh. Huchibang in ni teng in a hih ua, dangka tampi a kholkhawmta uhi.

¹²Kumpipa leh Jehoiada in TOUPA inn nasem mite khut ah a pia ua, TOUPA inn bawlpha ding in suang sekmite, khutsiamte, TOUPA inn bawlpha ding in sik leh dal a khutsiamte leng a guai hi.

¹³Huchi in, nasemmite’n a sem pan ua, a sem hoih mahmah ua, Pathian inn a ngei bang geih in a bawlpha ua, ading kip nawnta hi.

¹⁴A zoh un dangka omlai teng kumpipa leh Jehoiada kiang ah a hontawi ua, huai in TOUPA inn a nasepna ding a tuium belsuante, latna tuium-belsuan, sikkeute leh dangkasik tuium belsuante nangawn a bawl uhi. Huchi in Jehoiada damsung in TOUPA inn ah haltum thillat a lan gige uhi.

¹⁵Jehoiada bel upa pi tekkun a dam in a sita. A sih in kum za leh sawmthum a upa ahi.

¹⁶Huchi in Israelte lak ah Pathian tung ah leh a inn tungtang a thil a hihhoih ziak in David khopi ah kumpipate lak ah a vui uhi.

¹⁷Jehoiada sih nung in Judah miliante a hong kuan ua, kumpipa kiang ah toukaina a bawl ua, Kumpipa’n a thu uh a na pom hi.

¹⁸Himahleh a pi leh pute uh Pathian TOUPA inn a lehngatsan ua, Aserte leh milimte na a semta uhi: huchi in, a khelhna uh ziak in Judate leh Jerusalem tung ah thangpaihna a hongtungta hi.

¹⁹Himahleh TOUPA kiang a pikik ding in a kiang uah zawlneite a sawl a, a mawhdante uh a theisak ua, himahleh a bil uh a doh nuam kei uhi.

²⁰Siampu Jehoiada tapa Zekariah tung ah Pathian kha a hongtung a, amah mipi tunglam ah ading a, a kiang uah, “Pathian in hichi in a chi, Bangdia lamzan theihlouh loh a TOUPA thupiak hihsia na hi ua? TOUPA na lehngatsan ziak un aman leng nou a hon lehngatsan ahi” a chi hi.

²¹Huchi in amah a sawmta ua, kumpipa thupiak in TOUPA biakin huangsung ah suang in a deng lumta uhi.

²²Huchibang in kumpipa Joash in a pa Jehoiada hehpihna theigige lou in a tapa a thatta hi. A sih kuan in, “TOUPA’N a hon ngaihtuah ding a, phu a hong laksak ding” a chi hi.

²³Huan, hichi ahi a, kum a bei in Suria sepaihte’n a hongsual ua; Judah gam leh Jerusalem ah a lut ua, a milian tengteng uh a hihman sak ua, Damaska kumpipa kiang ah gallak tengteng a khakvek uhi.

²⁴Suria sepaihte bel tawmchik kia a hong kuan ua; a pi leh pute uh Pathian TOUPA a lehngatsan ziak un TOUPA’N sepaih tampite a khut uah a pia ahi. Huchibang in Joash tung ah gawtna a tung sak uhi.

²⁵A paisan nung un, natna thupitak thuak in a paisan ua, amah mite ngei in siampu Jehoiada tapate sisan ziak in a sawm ua, a lupna a lum lai a that ua, a sita hi: David khopi ah a vui ua, himahleh kumpipate han ah a phum kei uhi.

²⁶Hiaite amah sawmmite ahi uh: Ammon mi Simeath tapa Zabad leh Moab mi Simrith tapa Jehozabad.

²⁷Huchi in a tapate tung ah thute, a tung a puakgik tak puaksak tungtang thute; Pathian in a bawlphat tungtang thute, ngai dih kumpipa tanchin hilhchianna bu ah gelh ahi. Huan, a sik in a tapa Amaziah in vai a hawmta hi.