Read Paite Chin 2 KRONIKIL 25 Bible Online

2 KRONIKIL 25 - Paite Chin bible

2 KRONIKIL 25

¹Amaziah bel a vaihawmpat tung in kum sawmnih leh nga a upa ahi a, Jerusalem ah kum sawmnih leh kua vai a hawm a; a nu min Jehoaddan, Jerusalem mi ahi.

²TOUPA mitmuh in thil hoih a hih a, himahleh a lungsim a pe bukim kei hi.

³Huchi in, hichi a honghi a, a gam a hong dinkip in a pa that, sikhate a that hi.

⁴Himahleh a tate uh a that kei a, Mosi Dan laibu a tuang, “Tate ziak in pate a si ding uh ahi kei, pate ziak in tate a si ding uh ahi sam kei, michih amau gitlouhna ziak in a si ding uh ahi” chi a TOUPA’N thu a piak bang in a hih hi.

⁵Amaziah in Judahte a kaikhawm a, Judah leh Benjamin mi tengteng a inkuan uh dungzui zel in sang heutu leh za heutute nuai ah a omsak hi.Kum sawmnih tunglam teng a sim a, mi teltuam, tei leh lum tawi thei, galkapthei mi nuai thum a om uhi.

⁶Huan, Israel gam a mi, mi hat hangsan nuai khat dangka talent za in a guailai hi.

⁷Himahleh, a kiang ah Pathian mi, mi khat a hong a, “Aw Kumpipa, Israel sepaihte na kiang ah pai kei le uh, TOUPA Israel mite, Ephraim suante huam in, na kiang ah a omkei hi.

⁸Hoh hile chin leng, hangtak in kidouna ah gamtang in: huchilou in zaw Pathian in melma mai ah nang a hon vuallel sak ding: Pathian in lah panpih theihna leh vuallelhsak theihna a nei ngal a,” a hong chi hi.

⁹Huchi in, Amaziah in Pathian mi kiang ah, “Ahihleh Israel sepaihte ka piaksa talent za bang i chih ta dia awi?” a chi a. Huan, Pathian mi’n, “TOUPA’N huai sang a tampi nang a honpe thei ahi” a chi hi.

¹⁰Huchi in Amaziah in Ephraim gam a kipan a sepaih hongpaite paikik ding in a khen a; huaiziak in Judate tung ah a heh mahmah ua, heh mahmah in a paikikta uhi.

¹¹Amaziah in lunglellou in mite a pikhia a, Chi Guam ah a hoh ua, Seir suante sing khat a that uhi.

¹²Sing khat dang Judate’n a hingmat ua, suangpi vum ah a pi ua, suangpi vum a kipan in a sawnkhe mengmeng ua, a kitam zan gawp uhi.

¹³Himahleh Amaziah in a kiang ah galkap ding a pailou ding a a sawlkik sepaihte’n Judah gam khuate, Samaria a kipan a Bethhoron pha in a sual ua, mi sang thum a that ua, gallak tampi a la uhi.

¹⁴Huchi in, hichi ahi a, Amaziah Edomte that a hongpai in Seir suante pathiante a honpua a, a pathian ding in a pangsak a, a bia ua, gimlimte a halsak chiat hi.

¹⁵Huaiziak in Amaziah tung ah TOUPA hehna a kuangta a, a kiang ah zawlnei a sawl a, huai min a kiang ah, “Na khut a kipan a a mite honkhe thei lou nam pathiante bangding mahmah a zong na hia?” a chi hi.

¹⁶Huchi in, hichi ahi a, a kiang a thu a genlai in kumpipa’n, “Kumpipa vaihawmpa ding in nang konbawl ua hia? Dai mai in: bang ding a na hinna tan ding na hia?” a chi a. Huchi in zawlnei in, “Pathian in hichibang a na hih ziak leh ka thuhilhna na ngaihkhiak louh ziak in nang hihmang lungsim in a nei chih ka thei hi, a chi a” a daita hi.

¹⁷Huchi in, Judah kumpipa Amaziah in a thuhilh a pom a, Israel kumpipa Jehu tapa Jehoahaz tapa Joash kiang ah, “Hong dih, kimatuah in i ki en ding” chi’n mi a sawl hi.

¹⁸Israel kumpipa Joash in Judah kumpipa Amaziah kiang ah, Lebanon tang a sidar sing kiang ah, “Na tanu ka tapa zi ding in nei sak dih” chi’n a thukhak a; huan, Lebanon tang a gamsa a hongpai a, ling a hong chil pukgawp mai hi.

¹⁹‘Nang ngai dih, Edom ka zou,’ na chi a, na lungsim in na kisa thei a, na inn ah om kinken mai in; nang leh Judah gam nangawn a siatna, nang dia poi ding thil bangdia tokkhe ding na hia?” chi’n mi a sawl hi.

²⁰Himahleh, Amaziah in a ngaikhe nuam kei a; Edomte pathiante a zon ziak a, Judah gam a a melmate uh khut a a piaktheihna ding a Pathian hih ahi.

²¹Huchi in, Israel kumpipa Joash a hohtou a; Judah kumpipa Amaziah toh Judah gam Beth-shemesh khua ah kimaituah in a ki enta ngei uhi.

²²Huan, Judate tan Israelte sang in a hongse zaw a; michih amau inlam chiat ah a paita uhi.

²³Israel kumpipa Joash in Judah kumpipa, Ahaziah tapa Jehoahaz ta Amaziah bel Beth-shemesh ah a man a, Jerusalem ah a pi a, Jerusalem kulh Ephraim kulh kongpi a kipan a kulh ning kongpi tan in tong za li tak a chimsak hi.

²⁴Huan, TOUPA inn leh kumpipa inn a gou koihkhawmna a dangkaeng leh dangka leh tuium-belsuan om tengteng a la a, hen a kawltang dingte toh, huan, Samaria kholam ah a pai nawnta hi.

²⁵Huchi in, Judah kumpipa Joash tapa Amaziah bel Israelte kumpipa Jehoahaz tapa Joash sih nung in kum sawmlehnga a damlai hi.

²⁶Amaziah thilhih dangte a bul apan a tawptan in ngai dih, Judah kumpipa leh Israel kumpipate vaihawm lai thugelhna bu ah a tuang kei maw?

²⁷Huchi in, Amaziah in Toupa zuih a tawpsan tak in Jerusalem ah thah a sawm ua, Lakish khua ah a tai a; himahleh khua ah mi a delhsak ua, huai ah a that uhi.

²⁸A luang sakol in a pua ua, a pi leh pute kiang ah Judah khopi ah a vui uhi.