Read Paite Chin 2 KRONIKIL 26 Bible Online

2 KRONIKIL 26 - Paite Chin bible

2 KRONIKIL 26

¹Huchi in, Judah mi tengteng in kum sawmlehguk a upa Uzziah a pi ua, a pa Amaziah sik in kumpipa ding in a bawlta uhi.

²Aman kumpipa a pi leh pute kiang a a ihmut nung in Eloth khua a bawlpha a, Judah gam ah a pang sak nawn hi.

³Uzziah bel a vaihawmpat tung in kum sawmlehguk a upa ahi a, Jerusalem ah kum sawmnga leh nih vai a hawm a, a nu min Jekoliah, Jerusalem mi ahi.

⁴A pa Amaziah thilhih bangbang hih sam in TOUPA mitmuh in thil hoihtak a hih zel hi.

⁵Pathian kilakna theisiam Zekariah damsung in Pathian zong ding in a kibawl chinten hi. Pathian a zon sung teng in Pathian in a lamzang sak hi.

⁶Philistiate sim ding in a kuan khia a, Gath kulhte, Jabneh kulh, Ashdod kulh a hihchim a; huchi in Ashdod gam ah leh Philistiate lak ah khua a bawl hi.

⁷Huchi in, Pathian in Philistiate lak ah leh Gurbaal a om Arabiate leh Meunimite lak ah a panpih hi.

⁸Ammonte’n Uzziah lak ah siah a liau sek ua; huchi in a honghat mahmah ziak un Aigupta gam tan in a min thangta uhi.

⁹Uzziah in Jerusalem ah a ning ah kongpi, guam kongpi, kulh kawina lai kongpi, insangte, a lamlai a, kulh in a um hi.

¹⁰Gamdai ah leng insang a lam a, gam tampi a neih ziak in tuilehte a toukhia a, phailam leh phaizang ah ganhon a nei hi; lou neimite leh uain sukmite tanglam leh gam hoihte ah a koih a, amah louma lam limsakmi tak ahi.

¹¹Uzziah in sepaih kidou mi kumpipa sepaih heutu Hanani nuai a mi Laigelhmi Jeiel leh heutu Maaseiahte’n a seh bangzel ua a pawlpawl a galkap mi a neilai hi.

¹²Mihat hangsan chiat, a inkuan upate tengteng sang nih leh za guk ahi uhi.

¹³A nuai uah sepaih sin siamsa ngen nuai thum leh sang sagih leh za nga melma lak a kumpipa panpihmi galsualmi taktak a om uhi.

¹⁴Huchi in, Uzziah in sepaih tengteng adin lum, tei, siklukhu, sikpuanak, thalpeu leh vaisuanglot adin suangte a kisakhol hi.

¹⁵Jerusalem ah mipilte theihkhiak khawlte a bawl a insang leh kulh ning chih ah thalkapna leh suang lian kuamkuam a na denna ding a koih a; a min gamchih mualchih ah a thangta a; a hat mahmah tan inn a lam a lamdangtak a panpih in a om hi.

¹⁶Himahleh a honghat nung in a lungsim a hongsang a, hoihlou hial in thil a hih a, TOUPA a Pathian tung ah thil a hihkhial a; gimlim maitam a gimlim hal ding in TOUPA biakin ah a lut hi.

¹⁷Huchi in, siampu Azariah in a zui a, mihangsan tak TOUPA siampu sawmgiat a tel uhi.

¹⁸Kumpipa Uzziah a khou ua a kiang ah, “Uzziah aw, TOUPA ding a gimlim hal na hih ding ahi kei hi, gimlim hal ding a sehtuam Aron tapa siampute hih ding ahizaw hi; Mun Siangthou a kipan pawtkhia in; thil na hihkhial hi; TOUPA Pathian lak a na thupina ding ahi kei hi,” a chi uhi.

¹⁹Huan, Uzziah a hehta a; gimlim halna ding meilakna a tawi hi, huchi a siampute tung a a heh laitak in TOUPA inn ah, gimlim halna chin ah siampute ma ah a tal a hong phakkheta hi.

²⁰Huchi in, siampu heutu Azariah leh siampu tengteng in a en ua, ngai in, a tal a hongphak a, huai a kipan in a vikkhe pah ua, ahi, TOUPA’N a gawt ziak in amah leng kintak in a pawt kheta hi.

²¹Kumpipa Uzziah bel a sih ni tan in a phakta a, a phak ziak in a inn tuam ah a omta hi: TOUPA inn a kipan hihkhiak in a omta a, huchi in a tapa Jotham bel a gam ua mite vaihawm in kumpipa inn a ukpa ding in a omta hi.

²²Uzziah thilhih dang tengteng bel a bul a kipan a a tawppha in Amoz tapa zawlnei Isai in a gelh hi.

²³Huchi in, Uzziah bel a pi leh a pute kiang ah a ihmu a, kumpipa a kivuina mun a a pi leh a pute lak ah a vui uhi. “Amah zaw phak ahi ngal a” a chi ua: huchi in, a tapa Jotham in a sik in vai a hawmta hi.