Read Paite Chin 2 KRONIKIL 29 Bible Online

2 KRONIKIL 29 - Paite Chin bible

2 KRONIKIL 29

¹Hezekiah in kum sawmnih leh nga a upa a hih in vai a hawm pan a; Jerusalem ah kum sawmnih leh kua vai a hawm a; a nu min Abijah, Zekariah tanu ahi.

²Aman a pu David thilhih hih in TOUPA mitmuh in thil hoih a hih zel hi.

³Aman a vaihawmpat kum kha khatna ah TOUPA inn kongkhakte a hong a, a zem hoih hi.

⁴Siampute leh Levite a pilut a, suahlam sang mun za lai ah a pikhawm a, a kiang uah,

⁵“Nou Levite aw, ka thu ngaikhia un; noute kihihsiangthou phot unla, huchi in TOUPA, na pi leh pute uh Pathian inn hihsiangthou unla, Mun Siangthou a kipan ninte paikhia un.

⁶I pi leh pute un thil a hihkhialta ua, TOUPA Pathian mitmuh in thil hoihlou a na hih ua, a na lehngatsan ua, TOUPA omna a lehngatsan ua, a na nungngatta uhi.

⁷Inlim kongkhakte a khak ua, khawnvakte a hihmit ua, Israelte Pathian Mun Siangthou ah gimlimte a hal kei ua, haltum thillatte leng a lan kei uhi.

⁸Huaiziak in TOUPA hehna Judate leh Jerusalem tung ah a om a, na mit ua na muh bang un, gamchih mualchih a sepsep ding leh lamdangsak ding leh nuihzat ding in a nabawlta ahi.

⁹Ngai dih ua, i pi leh pute uh namsau a vuallelh sak in a om ua, i tanu leh i tapate uh, i zite uh, huaiziak in sal in a na om uhi.

¹⁰Ngai dih ua, a hehna mahmah a then theihna ding in TOUPA Israelte Pathian kiang ah thu khun ka tum hi.

¹¹Ka naute aw donlou in omkei un, TOUPA na sem na hi ua, a ma a nasem a om ding leh gimlim halmi ding in nou a hon telta ahi” a chi hi.

¹²Huchi in Levi mi Amasai tapa Mahathte, Kohath mi Azariah tapa Joelte; Merari tapate lak a Abdi tapa Kiste, Jehallelel tapa Azariah, Gershon, Jim tapa Joahte, Joah tapa Edente,

¹³Elizaphan tapate lak a mi Simri leh Jeuelte: Asaph tapate lak a mi Zekariah leh Mataniahte;

¹⁴Heman tapate lak a mi Jehuel leh Simeite; Jeduthun tapate lak a mi Semaiah leh Ujielte a kuan khia uhi.

¹⁵A unaute uh a samkhawm ua, a kihihsiangthou ua, TOUPA thu a kumpipa thupiak bang a TOUPA inn hihsiang ding in a lut uhi.

¹⁶Huchi in, siampute kihihsiang ding in TOUPA inn sunggil lam ah a lut ua, TOUPA biakin a thilnin a muh tengteng uh TOUPA inkong ah a lakhia uhi.

¹⁷Kha khatna ni khat ni’n apan ua, huai kha ni giat ni’n TOUPA inlim a tung ua; huchi in ni giat in TOUPA inn a hih siangthou ua; kha khatna, ni sawmlehguk ni’n a zouvek uhi.

¹⁸Huchi in kumpipa Hezekiah kiang ah kumpipa inn ah a lut ua, “TOUPA inn a haltum thillatna maitamte, huai a tuium-belsuan tengteng, tanghou siahna dohkante, huai a vanzat tengtengte ka hihsiang vekta uh.

¹⁹Kumpipa Ahaz in a vaihawm lai a thil a hihkhelh a, a paihmang tuium-belsuan tengteng leng ka bawl zou vek ua, ka hihsiangthou lai ua; huan, ngai dih, TOUPA maitam ma lam ah a om hi” a chi uhi.

²⁰Huchi in kumpipa Hezekiah bel zingkhang in a thou a, khua a miliante a samkhawm a, TOUPA inn ah a hoh uhi.

²¹Gam, Mun Siangthou leh Judate ading a khelh thoihna ding bawngtal sagih, belamtal sagih, belamnou sagih leh keltal sagih a kai tou ua. Aron tapa siampute TOUPA maitam a lan ding in thu a pia hi.

²²Huchi in bawngtalte a gou ua; siampute’n sisan a la ua, maitam a theh ua: belamtalte a gou ua, a sisan in maitam a theh ua; belamnoute leng a gou ua, a sisan in maitam a theh uhi.

²³Huan, keltalte khelh thoihna ding in kumpipa leh mipite kiang ah a hon kai ua, a tung uah a khut uh a nga uhi.

²⁴Siampute’n a gou ua, Israel mi tengteng ading a lemna bawlna ding in a sisan un maitam ah khelh thoihna a lan ua: Kumpipa’n a thupiak bang in Israel mi tengteng ading in a lan uhi.

²⁵Huchi in, David leh kumpipa zawlnei Gad leh zawlnei Nathan thupiak bang in TOUPA inn ah Levite dakkhutbette, pekgingte, kaihgingte tum ding in a koih a; thupiak a zawlneite zang a TOUPA piak lah a hingal a.

²⁶Levite bel David bawl tumging chi toh ading ua, siampute pengkul toh.

²⁷Huan, Hezekiah in maitam a haltum thillat lan ding in thu a pia a. Halmang thillat a hon lat pat un TOUPA la pengkul leh Israel kumpipa David bawl tumging toh a honsa uhi.

²⁸Huchi in, mipite’n Pathian a bia ua, la siamte’n la a sa ua, pengkul mutmite’n a mut ua, haltum thillat latkhit masiah huchibang in a hih nilouh uhi.

²⁹Thillat a latkhit un kumpipa leh a kiang a om tengteng in kun in Pathian a bia uhi.

³⁰Kumpipa Hezekiah leh miliante’n Levite bel David leh zawlnei Asaph phuahphatna lasa ding in thu a pia uhi. Huchi in, nuamsatak in phatna la a sa ua, a kun ua, Pathian a bia uhi.

³¹Huchi in Hezekiah in, “TOUPA ading in na kihihsiangthouta ua, hong nai unla, TOUPA inn ah kithoihna leh kipahthu genna thillat honglan un” a chi hi. Mipite’n kithoihnate, kipahthugenna thillatte a honlan ua: a utut in haltum thillat a hon lan uhi.

³²Mipite’n haltum thillat a honglat zah uh bawngtal sawmsagih leh belamtal za leh belamnou za nih ahi: hiaite tengteng TOUPA adia haltum thillat ding vek ahi.

³³Thillat tengteng bawngtal za guk, belamtal sang thum ahi.

³⁴Himahleh siampu a tawmlua ua, haltum thillat pen a sem seng kei ua; huaiziak in a unaute Levite’n a kimansak ma un siampute a kihihsiangthou tan in a huh uhi: Levite siampute sang in kihihsiangthou thu ah a ngentel zaw uhi.

³⁵Huchi in, haltum thillatte a tam a, haltum thillat chih ading a lemna thillat thaute, dawn ding thillat a dingte leng a tam mahmah hi. Huchi in TOUPA inn nasep dan hoihtak in a hih uhi.

³⁶Mipite adia Pathian inn a kintak a bawl ziak in Hezekiah leh mi tengteng a kipak mahmah ua; up louhpi a thil om guih a hih behlap hi.