Read Paite Chin 2 KRONIKIL 30 Bible Online

2 KRONIKIL 30 - Paite Chin bible

2 KRONIKIL 30

¹Huan, Hezekiah in Israel gam leh Judah gam teng ah mi a sawl a, Ephraim leh Manasseh gamte ah leng TOUPA Israelte Pathian ading in Paikan Ankuang neiding a Jerusalem a TOUPA inn a hongpai ding in lai a khak hi.

²Kumpipa leh a miliante leh Jerusalem a mipi teng in kha nihna ah, Paikan Ankuang neih a sawm uhi.

³Huailai in a luithei naikei ua, siampu kihihsiangthoute a tam naikei ua, Jerusalem a mipi a ki kaihkhop nailouh ziak un.

⁴A thil sawm uh kumpipa leh mipite ngaih in a dik hi.

⁵Huchi in Israel gam teng, Beer — sheba a kipan Dan pha in TOUPA Israelte Pathian adin Paikan Ankuang neiding a Jerusalem a hongpai ding a phuang ding in thu a hihkipta hi: a dan bangtak in huchibang a tam in a hihngei naikei uhi.

⁶Huchi in lai taipihmite kumpipa leh a miliante uh laitawi in, Israel leh Judah gam tengteng a pai ding in kumpipa thupiak bang in a pawt ua, “Nou Israel suante aw, Suria kumpipate khut a kipan pawt a a damsunte TOUPA, Abraham, Isak leh Israel Pathian lam hong nga nawn un, huchi a nou lam a hong ngat nawn theihna ding in .

⁷Nou zaw na pi leh pute uh leh na unaute uh, TOUPA a pi leh pute uh Pathian tung a thil hihkhial a om, segawp ding a donsak lou a na muhte uh bang in omkei un.

⁸Na pi leh pute uh bang in genhak nawn kei unla, TOUPA kiang ah kitulut zaw unla, tangtawn a dia a hih siangthou, a Mun Siangthou ah honglut unla, TOUPA na Pathian uh na sem un, huchi in a hehna thupitak na lak ua kipan a kiheimang sak ding hi.

⁹TOUPA lam na hong ngat nawn uleh na unaute uh leh na tate uh sal a man mite’n a hehpih ding ua, hiai gam ah a hongpai nawn ding uhi: TOUPA na Pathian uh lah chingtheitak leh zahngaithei tak ahi ngal a, amah lam na hong ngat peuhmah uleh a hon nuse kei ding hi” chi in.

¹⁰Huchi in lai taipihmite khochih ah Ephraim leh Manasseh gam tengteng ah Zebulun pha in a pai ua: himahleh amau a nuihsan in a simmawh uhi.

¹¹Himahleh Asherte leh Manassehte leh Zebulunte tampi a kitulut ua, Jerusalem ah a hoh uhi.

¹²Judah gamte ngial houh TOUPA thu a kumpipa leh miliante thupiak zui ding in Pathian in lungsim mun khat a pusak hi.

¹³Huchi in kha nihna ah tanghou silngou sohlouh Ankuangluina nei ding in mi tampi Jerusalem ah a hong kikhawm ua, a tam mahmah uhi.

¹⁴Huan, a thou ua, Jerusalem a maitamte a la ua, gimlim halna maitamte leng a la ua, Kidron lui ah a pai uhi.

¹⁵Huchi in kha nihna ni sawmlehli ni’n Paikan Ankuangluina a gou ua; siampute leh Levite a zum ua, a kihihsiangthou ua, haltum thillat toh TOUPA inn ah a lalut uhi.

¹⁶Huan, Pathian mi Mosi dan bangtak in amau munchiat ah ading ua; siampute’n Levite a kipan a a tan uh sisan a theh uhi.

¹⁷Mipi lak ah lah kihihsiangthou lou a tam ua; huaiziak in TOUPA ading a hih siangthou ding in a siangthouloute tuam ding in Levite’n Paikan Ankuangluina a gou uhi.

¹⁸Ephraim, Manasseh, Issakar, Zebulun mite tampi a ki hihsiangthou kei na ua, danlou bang in Paikan Ankuangluina a ne uhi. Himahleh Hezekiah amau ading in a thum a, “Chingthei TOUPA’N :

¹⁹Michih a lungtang a TOUPA, a pipute Pathian, Pathian zongte, Mun Siangthou siansakna Dan dungzui in kisiangsak kei mahleh, ngaidam hen” chi in.

²⁰Huchi in, TOUPA’N Hezekiah thumna a ngaikhia a, mipite a hihdamta hi.

²¹Israel mi Jerusalem a omte’n tanghou silngou sohlouh Ankuangluina nuamsatak in ni sagih a zang ua; Levite leh siampute’n kaihging ngaihtak toh TOUPA pahtawi a lasa in ni teng in TOUPA a phat uhi.

²²Huan, Hezekiah in siamtak in TOUPA kilawm tak a phat Levite a lungmuan hi. Huchi in TOUPA a pi le pute uh Pathian kiang a thupha tawi in lemna thillatte lan in ni sagih Ankuangluina a ne tawn tung uhi.

²³Huan, mipi in ni sagih dang Ankuanglui nawn a sawm ua; huchi in ni sagih dang nuamsatak in Ankuang a lui nawn uhi.

²⁴Huan, Judah kumpipa Hezekiah in mipite bawngtal sang khat leh belam sang sagih goh ding in a pia a; miliante’n mipite bawngtal sang khat leh belam sing khat a pia uhi; siampu tampite a kihihsiangthou uhi.

²⁵Huchi in Judah mipi tengteng siampute toh Levite toh, Israel gam a kipan a mipi hongpai tengteng leh namdang Israel gam a kipan a hongpai Judah gam a omte’n nuam a sa mahmah uhi.

²⁶Huchi in nuamsakna thupitak Jerusalem ah a om a: Israel kumpipa David tapa Solomon chiang ah huchibang himhim Jerusalem ah a om ngei naikei hi.

²⁷Huchi in siampu ;eh Levite a thou ua, mipite a vualzawl uhi: a aw uh ngaihkhiak in a om a, a thumna un a omna siangthou van a pha hi.