Read Paite Chin 2 KRONIKIL 31 Bible Online

2 KRONIKIL 31 - Paite Chin bible

2 KRONIKIL 31

¹Huchi in, huai tengteng a hihkhit un huai a Israel mi om tengteng in Judah gam tengteng leh Benjamin gam leh Ephraim leh Manasseh gam suangphuhte a hihzan ua, Aserte a phuk ua, munsangte leh maitamte a chipsak vek masiah uh Judah gam khuate ah a pai zel uhi. Huchi in, Israel suante tengteng a gam uah amau khua chiat ah a pai nawn uhi.

²Huan, Hezekiah in siampute leh Levite a pawl dan bangzel un michih siampute leh Levite’n a tuahchiat ding un, haltum thillat leh lemna thillat lan mi dingte, nasemmi dingte, kipahthu genmi ding leh TOUPA omna kongpi a ngakmi dingte pawl a bawlsak chiat hi.

³TOUPA dan a tuang bangbang in zingsang lam leh nitaklam haltum thillat dingte, khawlni leh kha thak leh hunbi nei Ankuang a dingte kumpipa tantuan ading gan a sep hi.

⁴Jerusalem a mipite TOUPA dan a a kihihhatna ding un siampute leh Levite tantuan pe ding in thu a pelai hi.

⁵Huai thupiak a dalhzaktakin Israel suante’n a buhte, uainte, thaute, khuaizute, a lou ua thilsuak masapente a hongpia ua; a bangkim uh sawm a khat leng a hongpia uhi.

⁶Israel suante leh Judah suante, Judah khuate a omte’n a bawng uleh belam uh sawm a khatte, TOUPA a Pathian uh tantuam dia a piaksawn uh sawm a khatte a honpia ua, a koih khawm ekok phet uhi.

⁷Kha thumna ah a koihkhawm pan ua, kha sagihna ah a koihkhawm khin uhi.

⁸Huchi in, Hezekiah leh a miliante un koihkhawm a muh un TOUPA leh a mi Israelte a phat uhi.

⁹Hezekiah in a thil koihkhawm tungtang thu uh huai siampute leh Levite a dong a.

¹⁰Zadok mi siampu heutu Azariah in a dawng a, mite’n TOUPA inn a thilpiak a hontawi tung ua kipan in i ne zel ua, i deihkhop ua, a om ekok lai hi; TOUPA’N mite a vualzawl zel a, hiai a om ekok laiteng i khamval uh eive, a chi hi.

¹¹Huchi in Hezekiah in TOUPA inn ah dantante bawl ding in thu a pia a; a bawlta uhi.

¹²Huan, thilpiakte sawm a khatte, Pathian a tuamte muanhuaitak in a nawn lut uhi: a heutu uh Levi mi Konaniah ahi a, a unau Shimei bel a zom ahi.

¹³Konaniah leh a unau Shimei nuai ah kumpipa Hezekiah leh Pathian inn a heutu Azariah seh in endikmi Jehiel, Azajiah, Nahath, Asahel, Jerimoth, Jozabad, Eliel, Ismakiah, Mahath leh Benaiahte a om uhi.

¹⁴Levi mi Imna tapa Kore, suahlam kongkhak ngakmi Pathian kiang a lungsim ut thu a thilpiak kempa leh TOUPA adia thilpiak leh thil siangthou hawmpa ahi.

¹⁵A nuai ah Eden, Miniamin, Jeshua, Semaiah, Amariah, Sekaniah, siampu khua ah nasep hunbi chiat ah a unaute uh a pawlpawl a lian a neute kiang a semmi a om uhi:

¹⁶Khangthu a sut pasal kum thum chiang tunglam, ni teng a TOUPA inn a nasep kul nei a pawl dandan bang ua hohsekte simlouh in.

¹⁷A inkuan uh pipute gelhna a siampu a sehte leh Levi mi kum sawmnih chiang tunglam a pawl dan bangzel ua nasemmi dia sehte;

¹⁸Pipute gelhna a tuang a ta neute tengteng uh, a zite uh, a tapate uh, a inkuan tengteng uh; a sepna bik ua siangthoutak a a ki hih siangthoute ahi uhi.

¹⁹Aron suan, khochih khaw pua a om siampute leh Levite suante gelhna a tuang peuhmahte tantuan pe ding mi sehtuam a om uhi.

²⁰Huchibang in Judah gam tengteng ah Hezekiah in a hih a. TOUPA a Pathian mitmuh in hoih leh dik leh muanhuai thil a hihsek hi.

²¹Pathian nasep lam thu ah, dan lam thu ah, thupiak lam thu ah, a Pathian zon thu ah a hih peuhmah ah a lungsim tengteng in a hih a, a lamzang zel hi.